بوكس جايلى اقپارات تاراتاتىن Boxing News جۋرنالى ورتا سالماقتاعى WBA (Super), IBO, WBC جانە IBF نۇسقالارى بويىنشا الەم چەمپيونى گەننادي گولوۆكيننىڭ (36-0, 33 كو) WBA (Regular) بەلبەۋىنىڭ يەگەرى امەريكالىق دەنيەل دجەيكوبسقا قارسى جەكپە-جەگىنىڭ الدىندا ەڭ ۇزدىك بەس جەكپە-جەگىن جاريالادى. بۇل تۋرالى vesti.kz حابارلادى.
5. گەننادي گولوۆكين – دەنيەل گيل, تكو 3
بۇل ايقاس 2014 جىلدىڭ 26 شىلدەسىندە نيۋ-يوركتەگى Madison Square Garden ارەناسىندا ءوتتى. جەكپە-جەك باستالا سالىسىمەن وتانداسىمىز قارسىلاسىن قىسپاققا الدى. العاشقى راۋندتا-اق اۆستراليالىق بوكسشىنىڭ جەر تايانىپ قالعان كەزى بولدى. ەكىنشى راۋند تا ءدال وسى باعىتتا ءوربىدى, دەنيەل گيل نوكداۋنعا ءتۇستى. ءۇشىنشى راۋندا گولوۆكيننىڭ كەزەكتى سوققىسىنان كەيىن تاعى دا نوكداۋن الدى. ورنىنان تۇرعانمەن, جەكپە-جەكتى جالعاستىرۋدان باس تارتتى.
4. گەننادي گولوۆكين — مەتتيۋ ماكلين, كو 3
قوس بوكسشىنىڭ اراسىنداعى كەزدەسۋ 2013 جىلى 29 ماۋسىمدا ءوتتى. WBA چەمپيوندىعىنا ۇمىتكەر بولعان مەتتيۋ ماكلين دە ءۇشىنشى راۋندتا جەڭىلدى. باۋىرىنا تيگەن سوققىدان بريتان بوكسشىسى اۋىر نوكاۋتقا ءتۇستى.
3. گەننادي گولوۆكين – مارتين ميۋررەي, تكو 11
2015 جىلدىڭ 21 اقپانىندا وتكەن جەكپە-جەكتە مارتين ميۋررەي 11-راۋندقا دەيىن شىداس بەردى. ءتورتىنشى راۋندتا بريتان بوكسشىسى ەكى مارتە نوكداۋن الدى.
2. گەننادي گولوۆكين — كەلل برۋك, تكو 5
كەلل برۋك قازاقستاندىق بوكسشىعا دەيىن 36 كەزدەسۋ وتكىزىپ, ءبىر دە ءبىر رەت جەڭىلىپ كورمەگەن. الايدا, كەزدەسۋدىڭ بەسىنشى راۋندىندا بريتان بوكسشىسىنىڭ جاتتىقتىرۋشىسى شارشى الاڭعا ورامالىن تاستاپ, جەڭىلگەنىن مويىندادى.
1. گەننادي گولوۆكين — داۆيد لەمە, تكو 8
2015 جىلدىڭ 17 قازانىندا وتكەن ايقاس سەگىز راۋندقا دەيىن سوزىلدى. سەگىزىنشى راۋندتا گولوۆكيننىڭ ايقىن باسىمدىعىن بايقاعان رەفەري جەكپە-جەكتى مەرزىمىنەن بۇرىن توقتاتتى. وسى جەڭىسىنىڭ ارقاسىندا گەننادي گولوۆكين IBF تيتۋلىنا يە بولدى.
دايىنداعان: ايان ءابدۋالي, "ەگەمەن قازاقستان"
