قازاقستاندىق بىتىمگەرشىلەرگە جاسالاتىن جەڭىلدىكتەر تۋرالى ايتتى

قر قورعانىس ءمينيسترىنىڭ ورىنباسارى تالعات مۇحتاروۆ ءماجىلىس دەپۋتاتتارىنا بۇۇ ميسسيالارىنا قاتىسىپ جۇرگەن قازاقستاندىق بىتىمگەرلەر تۋرالى ايتىپ بەردى, دەپ حابارلايدى قازاقپارات. ونىڭ سوزىنە قاراعاندا, بىتىمگەرشى ساربازداردىڭ قۇقىقتىق جانە الەۋمەتتىك قورعالۋى حالىقارالىق, سونداي-اق قازاقستان زاڭناماسىمەن لايىقتى دەڭگەيدە رەتتەلىپ وتىر. «الەۋمەتتىك قورعالۋى جاعى بىزدە ەسكەرىلگەن. بىرىنشىدەن, ءبىزدىڭ جاۋىنگەرلەر ءۇش ەسە جوعارى كولەمدە ەڭبەكاقى الادى جانە بىتىمگەرلىك قىزمەت كەزەڭىندە تەگىن تاماقپەن قامتاماسىز ەتىلەدى. سونىمەن قاتار ەلگە ورالعاننان كەيىن, اقىسىز نەگىزدە شيپاجايدا ەمدەلەدى. قىزمەت وتكەرگەن مەرزىمىندەگى 1 ايى 1,5 ايلىق مەرزىم رەتىندە ەسەپتەلەدى»,-دەدى ت. مۇحتاروۆ ماجىلىستەگى ۇكىمەت ساعاتىندا. وسى ورايدا ول بىتىمگەرلىك «قازبات» باتالونى 2000 جىلى قۇرىلعانىن ەسكە سالىپ ءوتتى. قورعانىس مينيسترلىگىنىڭ مالىمەتىنشە, «قازبات» ساپىنا ەنۋگە نيەتتىلەر قاتارى قالىڭ كورىنەدى. سوندىقتان دا ىرىكتەۋدىڭ قاتاڭ ءتارتىبى بەكىتىلگەن. وسى ورايدا دەنساۋلىق جاعدايى, سپورتتىق دايارلىعى, كاسىبي داعدىلارى, تىلدەردى مەڭگەرۋى, پسيحولوگيالىق تۇراقتىلىعى جانە باسقا دا جەكە قاسيەتتەرى ەسكەرىلەدى. ت. مۇحتاروۆتىڭ ايتۋىنشا, قازىرگى كەزەڭدە بۇل بولىمدەر تولىقتاي دايىندىقتان ءوتتى. ولار قالالىق جانە اۋىلدى جەرلەردە جاۋىنگەرلىك ءىس-قيمىلداردى جۇرگىزۋگە, تۇتقىنداردى بوساتۋ ارەكەتتەرىنە وقىتىلىپ, دايىندالدى. ونىڭ ىشىندە بارلاۋ شارالارىنا, پاترۋلدىك وپەراتسيالار جانە باسقا ماڭىزدى ءىس-قيمىلداردى يگەرىپ شىققان كورىنەدى.