«بولاشاق» باعدارلاماسىنا ەنەتىن وزگەرىستەر تالقىلاندى

قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆانىڭ توراعالىعىمەن شەت ەلدەردە كادر دايارلاۋ جونىندەگى رەسپۋبليكالىق كوميسسيانىڭ وتىرىسى ءوتتى. بۇل تۋرالى اقوردانىڭ ءباسپاسوز قىزمەتى حابارلايدى. وتىرىستا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋدا ايقىندالعان مىندەتتەرگە سايكەس, «بولاشاق» حالىقارالىق ستيپەندياسىن ودان ءارى جەتىلدىرۋ ماسەلەلەرى تالقىلاندى. مەملەكەتتىك حاتشى قويىلعان ماقساتتارعا قول جەتكىزۋ كوبىنە ساپالى بىلىمگە بايلانىستى بولاتىنىن اتاپ ءوتتى. سوندىقتان باعدارلامانى جەتىلدىرۋ ەلدەگى ادامي كاپيتالدىڭ باسەكەگە قابىلەتتىلىگىن ارتتىرۋعا سەپتىگىن تيگىزەدى. گ.ابدىقالىقوۆا وسى ماقساتپەن قۇرامىنا مۇددەلى مەملەكەتتىك ورگاندار وكىلدەرى, زاماناۋي حالىقارالىق ءبىلىم بەرۋ سالاسىنىڭ ساراپشىلارى جانە «بولاشاق» باعدارلاماسىنىڭ تۇلەكتەرى ەنگەن جۇمىس توبى قۇرىلعانىن اتاپ ءوتتى. جۇمىس توبى «قازاقستان-2050» ستراتەگياسىندا, «100 ناقتى قادام» ۇلت جوسپارىندا ايقىندالعان باسىمدىقتاردى ەسكەرە وتىرىپ, ۇسىنىستار ازىرلەدى. وتىرىس بارىسىندا جۇمىس توبىنىڭ ۇسىنىستارى تالقىلاندى. «بولاشاق» ستيپەندياسى ءۇش باعىت بويىنشا جەتىلدىرىلەدى. ولار: 1) ستراتەگيالىق مىندەتتەرگە سايكەس, ادامي كاپيتالدىڭ جاھاندىق باسەكەگە قابىلەتتىلىگىن ارتىرۋ جولىندا ستيپەنديانىڭ ءرولىن ايقىنداۋ جانە كۇشەيتۋ; 2) ستيپەندياتتاردى ىرىكتەۋدەگى جاڭا ۇستانىمداردى قالىپتاستىرۋ; 3) تۇلەكتەردىڭ الەۋەتىن جۇزەگە اسىرۋ ءىسىن دامىتۋ. ەلدىڭ ورنىقتى دامۋىن قامتاماسىز ەتۋ, ۇزاق مەرزىمدى پەرسپەكتيۆادا ونىڭ جاھاندىق باسەكەگە قابىلەتتىلىگىن ارتتىرۋ ماقساتىمەن جاستاردىڭ جوعارى دەڭگەيلى ءبىلىم الۋىنا ينۆەستيتسيا سالۋ قاجەت بولادى. باعدارلامانى ىسكە اسىرۋ جولدارىن جەتىلدىرۋ ۇمىتكەرلەردىڭ قازىرگى جانە كەلەشەكتەگى الەۋەتىن ايقىنداۋعا, ءبىلىم بەرۋدىڭ باسىم باعىتتارىن انىقتاۋعا جانە شەتەلدىك جوعارى وقۋ ورىندارىنا قويىلاتىن تالاپتاردى قايتا قاراۋعا باعىتتالعان كريتەريلەردى دامىتۋ مەن ۇمىتكەرلەردى ىرىكتەۋ جۇيەسىن قامتيتىن بولادى. جۇمىس توبى ۇسىنىستاردى ودان ءارى پىسىقتاۋ ءۇشىن قازاقستان رەسپۋبليكاسىنىڭ ۇكىمەتىنە جولدادى.