وتانىن ساتقاندار ازاماتتىقتان ايىرىلادى

قر پارلامەنتى سەناتىنىڭ دەپۋتاتى دارحان قالەتاەۆتىڭ ايتۋىنشا, كونستيتۋتسياعا ەنگىزىلگەن وزگەرىستەر بويىنشا وتانىن ساتقاندار ازاماتتىقتان ايىرىلادى, دەپ حابارلايدى قازاقپارات ءتىلشىسى. استانادا وتكەن ءباسپاسوز ءماسليحاتىندا جۋرناليستەر وسى وزگەرىستەرگە قاتىستى تۇسىنىكتەمە بەرۋدى سۇرادى. سەبەبى اتالعان وزگەرىستەرگە سايكەس, تەرروريستىك قىلمىستارمەن قاتار ەلدىڭ اسا ماڭىزدى مۇددەلەرىنە زيان كەلتىرگەنى ءۇشىن ازاماتتىقتان ايىرۋ جازاسى قاراستىرىلعان. ونداي شەشىم سوتتىڭ ۇكىمىمەن شىعارىلادى. جۋرناليستەر «ەلدىڭ اسا ماڭىزدى مۇددەلەرىنە زيان كەلتىرەتىن» قىلمىستاردىڭ ماعىناسىن اشىپ بەرۋدى ءوتىندى. «مەملەكەتتىك وپاسىزدىق, ەلدى ساتقانى ءۇشىن», - دەدى سەناتور قالەتاەۆ. ال وسىنى كەڭىرەك جازۋدىڭ قاجەتتىلىگىنە قاتىستى ول: «كونستيتۋتسيادا ونىڭ ءبارىن تاپتىشتەپ جازۋدىڭ قاجەتى جوق سياقتى. سەبەبى ونداي جازا ءبارىبىر سوتتىڭ شەشىمىمەن شىعارىلادى. ال ناقتى جازاعا كەلەر بولساق, جاڭا عانا ايتتىم عوي, ول - مەملەكەتتىك وپاسىزدىق. بالكىم, مەملەكەتكە ءىرى كولەمدە شىعىن كەلتىرگەنى ءۇشىن... ەندى, تاعى ايتامىن, ونى سوت انىقتايدى», - دەپ اتاپ كورسەتتى.