بۇل جەڭىس بولاشاق ءۇشىن كەرەك

ويىمىزداعى بولدى, كوڭىلىمىز تولدى! بۇل ويدى قازىر ءار قازاق بالاسىنىڭ كوكەيىنەن, قۋانىش كەرنەگەن كوڭى­لى­نەن, جارقىلداي كۇلگەن جۇزىنەن تانىپ, وقۋعا بولار ەدى. قازاق ەلى تاريحتىڭ تاعى دا ءبىر سىندارلى كەزەڭىنەن ءوتتى. كۇنى كەشە ەلىمىزدە بولىپ وتكەن قازاق­ستان رەسپۋبليكاسىنىڭ پرەزيدەنتى ساي­لاۋ­ىن تاريحتىڭ سىندارلى كەزەڭى دەمەسكە تاعى دا بولمايدى. سوعىس ءورتى تۇتانىپ, داۋ-دامايى كوبەيىپ, دۇرمەگى ۇلعايىپ بارا جاتقان باي دەيتىن, باقۋاتتى دەيتىن كوپ­تە­گەن اراب ەلدەرىندەگى جاعدايدى ويلاساق بولدى, سونداي ءورت پەن كەسەپاتتان, تەكەتىرەس ءارى قاراما-قايشىلىعى مول كوز­قا­راس­تار مەن پىكىرلەردەن ءوز ەلىڭنىڭ امان بو­لۋىن تاعى دا تىلەرىڭ بار. ويتكەنى, دۇنيە­نىڭ ءتورت بۇرىشىنىڭ ءبىر جەرىندە تۇتا­نىپ جاتقان ءورت دۇنيەنىڭ وزگە ءبىر بۇرىشىنا قاۋىپ پەن قاتەر توندىرمەيدى دەۋگە تاعى دا اۋىز بارمايدى. سول ءورتتى تۇتاندىرعىسى كە­لىپ, جانىعىپ جۇرگەندەردىڭ ءوز ەلىمىزدە بار ەكەندىگى دە جاسىرىن ەمەس. مىنە, وسى ءبىر ويلار قاۋمالاعان كوڭى­لىمىزدىڭ ءبىر ساتكە دە ورنىنا تۇسكەندىگىن ايتا وتىرىپ, 3 ءساۋىر كۇنى قازاقستان رەسپۋبليكاسى پرەزيدەنتىنىڭ سايلاۋىنىڭ ەلىمىزدە ويداعىداي وتكەندىگىنە قۋانامىز. جانە دە ورتالىق سايلاۋ كوميسسياسىنىڭ الدىن الا جاساپ وتىرعان ەسەبى بويىنشا, بۇل سايلاۋدا نۇرسۇلتان ءابىش ۇلى نازار­باەۆتىڭ جەڭىسكە جەتكەندىگى كوڭىلىمىزدەگى سول قۋانىشىمىزدى تاسى­تا تۇسەتىندىگىن دە جاسىرا الماس ەدىك. ءويت­كەنى, ەل تاۋەل­سىز­دىگىنىڭ 20 جىلىندا قا­زاق­ستان­دى الەم­گە تانىتقان, كەشەگى كۇنى تۇرا­لاپ قالعان ەكو­نوميكاسىن, حالقىمىزدىڭ جۇرەلەپ قال­عان تۇرمىسىن كوتەرىپ, بۇگىنگى كورىكتى كۇي مەن ءورىستى كۇنگە جەتكىزگەن نۇرسۇلتان نازارباەۆتىڭ دانالىعى مەن دارالىعىن, كەمەلدىلىگى مەن كەمەڭگەرلىگىن تاريح جانە ءجۇرىپ وتكەن جولىمىز ەرىكسىز مويىن­داتارى انىق. ەڭ باستىسى – تۋعان ەلى مەن تۋعان حالقى­نا, قازاقستاندى مەكەندەپ وتىرعان بار­لىق ۇلتتار مەن ۇلىستاردىڭ مۇددەسىنە ادال قىزمەت ەتە بىلگەن پرەزي­دەنتى­مىزدىڭ ادامي قاسيەتتەرىن وزگە ەلدەردىڭ حال­قى انىق تانىپ, سۇيسىنە بىلەتىندىگى جانە «نازارباەۆتاي پرەزيدەنتتەرىڭ بار قازاقتار, سەندەر باقىتتىسىڭدار!» دەگەن ءسوزدى سىنشى جات كوزدىڭ كورىپ تانۋى مەن ايتىپ كەلە جاتقاندىقتارى بىزگە ۇلكەن وي سالسا كەرەك-ءتى. اڭگىمەنىڭ ادالىن ايتار بولساق, قازاق بالاسى ءبىز نۇرسۇلتان نازارباەۆقا ءار­داي­ىم ريزامىز. ەڭ باستىسى قازاق بالاسىن شاشىراتىپ الماي, جەرىنىڭ تۇتاستىعىن, ەلىنىڭ امان­دى­عىن, مەملەكەتىنىڭ ابى­رويىن اسقاقتاتا بىلگەندىگى ءۇشىن ريزامىز! كۇنى كەشە دەيىك, قازاقستاننىڭ تمد ەلدەرىن بىلاي قويىپ, بۇكىل تۇركى الەمىندە تۇڭعىش بولىپ ەۋرو­پاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋى, استانا ءسامميتىن وتكىزۋى جانە استانا دەكلاراتسياسىنىڭ قابىلدانۋى الەم تاريحىنىڭ بەتتەرىنە ال­تىن ارىپتەرمەن جازىلىپ قالعاندىعى انىق. سول الەمدىك كونە تاريحتىڭ ءبىر بەتىنە قازاق دەگەن ەلدىڭ تاراۋىن ءوز قولىمەن جا­زىپ قالدىرا بىلگەن دە – نۇرسۇلتان نازارباەۆ! بۇل ەندى وشپەس تاريح, ولمەس كە­زەڭ بولىپ ماڭگىلىكتىڭ ماڭگىلىگىنە جالعا­سىپ كەتە بەرەر عۇمىرلى دۇنيە. سول عۇ­مىر­لى دۇنيەنىڭ الىپ اعىستارى مەن تول­قىن­دارى, الاپات داۋىلدارى مەن نوسەر جاۋ­ىن­دارى, ورەكپىگەن داۋلارى مەن ءوش­تەس­كەن كەكتەرى, ءبىر-بىرىنە كەزەنگەن وتتى دا وقتى قارۋلارى اراسىنان ءبىزدىڭ كيەلى دە قاسيەتتى ەلىمىزدى, قازاقتىڭ كەڭ بايتاق جەرىن, كورگەن قاسىرەتى دە, تارتقان بەينەتى دە, كەشكەن ازابى مەن مازاعى دا ءبىر باسىنا جەتەرلىك قا­زاق حالقىن بۇگىنگى كۇنى ايداي الەمگە تانىتىپ, شىعىسقا مۇرنىن ءشۇيى­رە قارايتىن زايىرلى ەۋ­روپانىڭ وزىنە تورە­لى­گىن جۇرگىزىپ, بيلىگىن ايت­قان قازاقستاندى سول بيىكتىككە كوتەرگەن دە  نۇرسۇلتان نازارباەۆ! الەم وسى كۇنى قا­زاق­ستاننىڭ جانە ونىڭ پرەزيدەنتى نۇرسۇلتان نازارباەۆتىڭ پىكىرىمەن ساناسىپ, ويىمەن وراي­لا­سىپ وتىراتىن بولسا, بۇل دا ءبىزدىڭ ەلىمىزدىڭ ايداي الەم الدىنداعى ابىرويىنىڭ اسىپ وتىر­­عاندىعىنىڭ كورى­نى­سى بول­­سا كەرەك-ءتى. قازىرگى ءدۇ­نيە بيلىكتىڭ ەسەرلىگىن كوتەرە الماي­تى­نى بار. دۇنيەگە ەستى باسشى, ەستى قاي­رات­كەر, ەستى ساياساتكەر قاجەت. وسى قاسيەت­تەر­دىڭ بارلىعى دا ءبىزدىڭ پرەزيدەنتىمىز نۇر­سۇلتان نازارباەۆتىڭ تۇلا بويى­نان تابى­لىپ جاتاتىندىعى تاعى دا داۋ تۋدىر­مايتىن ماسەلەنىڭ ءبىرى. اقىل مەن قاي­رات, سابىر مەن ۇستامدىلىق, كورەگەن­دى­لىك پەن كەمەڭگەرلىك, جەر-جاھاننىڭ تىرشىلىگىنىڭ تى­نىسىن تەرەڭ سەزىنە بىلۋشىلىك, ادام با­لا­سىنىڭ قاسىرەتىنە بەي-جاي قاراي الماي­تىن ىزگىلىك پەن مەيىرىمدىلىك, جىلاعاندى جۇباتا بىلەر, قۇلاعاندى سۇيەي بىلەر قايىرىمدىلىق, ادىلدىك پەن ادالدىق سياقتى ادامي اسىل قاسيەتتەر جۇرەگىنەن نۇر بولىپ توگىلىپ تۇرار پرەزي­دەنتى­مىزدىڭ وسى ءبىر قاسيەتتەرىنىڭ شاپا­عا­تى­نا جالعىز قازاقستاندىقتار – ءبىز عانا ەمەس, دۇنيە حالىقتارىنىڭ دا بولەنىپ كەلە جاتقاندىعىن دا ايتقان ءلازىم. ەلباسى­نىڭ جالپىادامزاتتىڭ مۇددەسى ءۇشىن سەمەي اتوم پوليگونىن جابۋى, ىرگەدەگى قىرعىز ەلى حالقىنىڭ جاعدايىنىڭ قيىن تۇسىندا جانە سوڭعى شيرەك عاسىر بويى ءتۇرلى جەلەۋ­مەن سوعىس پوليگونىنا اينا­لىپ وتىرعان اۋعانستانعا كومەك پەن قام­قورلىق قولىن سوزۋى, كەدەيشىلىك پەن جوقشىلىقتىڭ, اشارشىلىق پەن تويىپ تاماق ىشپەۋدىڭ ازابىن تارتىپ وتىرعان كەدەي مەملەكەتتەر ءۇشىن الەمنىڭ دامىعان ەلدەرىنىڭ ءبارىنىڭ دە وزدەرىنىڭ اسكەري بيۋدجەتىنىڭ جىل سايىن 1 پايىزىن بەرىپ وتىرۋ جونىندە دۇنيەگە العاش رەت وي ايت­قان ءبىزدىڭ پرەزيدەنتىمىزدى ادام مۇددەسىن بارىنەن دە بيىك قويىپ, بارىنەن دە قاسيەتتى سانايتىن الەمدىك دەڭگەيدەگى بىردەن-ءبىر ساياساتكەر ەكەندىگىن ادال نيەتتى ادامزات الدەقاشان تانىعاندىعى دا بار. ءبىز نۇرسۇلتان ءابىش ۇلى نازارباەۆتى قايتادان ءوز پرەزيدەنتىمىز ەتىپ سايلاۋ ارقىلى ءوز ەلىمىزدىڭ تاۋەلسىزدىگىنىڭ ودان ءارى بەكىپ, نىعايا ءتۇسۋىنىڭ جاڭا مۇمكىن­دىك­تەرىنە جول اشتىق. ءبىز قازاق ەلىندەگى ءبۇ­گىن­گى جاراستى ىنتىماق پەن بىرلىكتىڭ, تا­تۋ­لىق پەن دوستىقتىڭ تامىرىنا ودان ءارى بەكىپ, تەرەڭدەي ءتۇسسىن دەگەن نيەتپەن ءنار قۇيدىق. ءبىز تاۋەلسىز قازاقستاننىڭ ەكونو­مي­كالىق سالاداعى قۋاتىنىڭ جاڭا ءمۇم­كىندىكتەرىنىڭ وركەندەۋىنىڭ تەتىگىنە سەرپىن بەردىك. ءبىز بارلىق قازاقستاندىقتاردىڭ ءۇمىتتى بولاشاعىنىڭ جاڭا وتتارىن جاعىپ, جارقىن كۇندەرگە دەگەن سەنىمىن نىعايتا تۇستىك. ەلدىڭ ءوز ەلباسىنا دەگەن سول سەنىمى ءبىزدىڭ بۇگىنگى, ەرتەڭگى جانە بولاشاقتاعى بارلىق جەڭىستەرىمىز بەن جەتىستىكتەرى­مىز­دىڭ باستى كەپىلى بولىپ سانالاتىندىعى دا انىق. بۇل جولعى سايلاۋدا دا نۇرسۇلتان نا­زار­باەۆتىڭ جەڭىسكە جەتەتىندىگىنە كوڭىلى­مىز­دە ەشبىر كۇماننىڭ بولما­عان­دىعى دا انىق ەدى. ويتكەنى, تۋعان ەلىن تاعى دا ءبىر ابىرويلى اسۋعا شىعارۋ ءۇشىن 2020 جىلعا دەيىنگى بولاشاعىمىزدى بولجاپ وتىرعان ەلباسىنىڭ ساياساتى دا, قا­زاق­ستان حال­قى­نا ارناعان بيىلعى جول­داۋى دا بارلىق قازاقستاندىقتاردىڭ كوڭى­لى­نەن شىعىپ, سول پاتشا كوڭىلدەگى سەنىمدى نىعايتا تۇسكەندىگى ءبىزدى وسى ءبىر جەڭىسكە جەتكىزدى. وسى سايلاۋدا قازاقستان رەسپۋبليكا­سى­نىڭ پرەزيدەنتتىگىنە كانديدات نۇرسۇل­تان ءابىش ۇلى نازارباەۆتىڭ اقمولا وبلىستىق قوعامدىق شتابىنىڭ توراعاسى جانە سەنىمدى وكىلى بولعاندىعىمدى ءوز ءومى­رىم­نىڭ ەڭ ءبىر جاۋاپتى ءارى باقىتتى كەزە­ڭى­نىڭ ءبىرى دەپ سانارىم بار. وسى مىندەتتى اتقارۋ كەزىندە حالىقتىڭ, سونىڭ ىشىندە بار­شا كوكشەتاۋلىقتار مەن اقمولا­لىق­تار­دىڭ ەلباسىعا دەگەن ىقىلاسىنىڭ ءتۇپ­سىز تەرەڭدىگىن, نيەتتەرى مەن كوڭىلدەرىنىڭ سۇتتەي تازالىعىن, تىلەكتەرىنىڭ ادالدىعىن تاعى دا ءبىر تاني ءتۇستىم. قوعامدىق شتابتىڭ جانىنان قۇرىلعان قوعامدىق قابىلداۋعا كەلۋشىلەردىڭ قاتا­رى بىردە-ءبىر سيرەگەن جوق. ومىردەن كورگەنى دە, تۇيگەنى دە مول مەيرامبەك قيىقوۆ باس­­قار­عان بۇل قوعامدىق شتابقا قازاق­ستان رەسپۋبليكاسىنىڭ پرەزيدەنتتىگىنە كان­ديدات ن.ءا.نازارباەۆتىڭ اتىنا حالىق­تان 851 امانات كەلىپ ءتۇستى. مۇنىڭ باسىم كوپ­شىلىگى اقمولالىقتاردىڭ نۇرسۇلتان نازارباەۆقا دەگەن وزدەرىنىڭ ريزا­شى­لىق­تارىن ءبىلدىرىپ, العىستارىن ايتىپ, ساي­لاۋدا جەڭىسكە جەتۋىنە تىلەكتەستىكتەرىن جەتكىزىپ, وزدەرىنىڭ قولدايتىندىقتارىن ايتىپ جازعان حاتتارى ەدى. بيىلعى جىلدىڭ 13 قاڭتارى كۇنى «نۇر وتان» حالىقتىق-دەموكراتيالىق پارتياسى توراعاسىنىڭ ءبىرىنشى ورىنباسارى نۇرلان نىعماتۋليننىڭ باستاماسىمەن «قازاق­ستان-2020» جالپىۇلتتىق دەموكراتيالىق كۇشتەر كواليتسياسى قۇرىلعان ەدى. بۇل كوا­ليتسيانىڭ توڭىرەگىنە قازاقستانداعى ءبىراز ساياسي پارتيالار مەن قوعامدىق ۇيىمدار بىرىگىپ, ولار نۇرسۇلتان نازار­باەۆتىڭ قازاقستاندى يندۋستريالان­دىرۋ­دىڭ 2020 جىلعا دەيىنگى باعدارلاماسىن جۇزەگە اسىرۋعا جان-جاقتى قولداۋ كورسەتۋ ءۇشىن ءبىر مامىلەگە كەلگەن بولاتىن. مۇن­داي كواليتسيا ءبىزدىڭ وبلىسىمىزدا دا قۇرى­لىپ, ولار بارلىق اۋدانداردى ارالاپ شى­عىپ, حالىقپەن كەزدەسۋلەر وتكىزىپ, ءبىزدىڭ كانديداتىمىزدىڭ سايلاۋ الدىنداعى باع­دارلاماسىن كەڭىنەن ءتۇسىندىرىپ, ۇلت كوش­باس­شىسى نۇرسۇلتان نازارباەۆتىڭ قازاق­ستاننىڭ 20 جىلدىق تاريحىنداعى اتقار­عان ءىسى جايلى حالىقتىڭ كوڭىلىنەن شىعار­لىق اڭگىمەلەر ايتىپ, ەلدى بىرلىككە, ىنتى­ماققا جانە ءوز بولاشاقتارىن دۇرىس تاڭ­داۋعا شاقىردى. وبلىستىق كواليتسيانىڭ قۇرامىندا جۇمىس ىستەگەن كوكشەتاۋ مەن قاراوتكەلگە ەسىمدەرى بەلگىلى تۇلعالاردى بولە-جارماي-اق سولاردىڭ ارقايسىسىنا شىنايى العىسىمىزدى ايتامىز. بيىلعى سايلاۋدىڭ بارىنشا ءادىل ءارى تازا وتكەندىگىن ايتقان ءجون. ءبىزدىڭ وب­لىسىمىزدىڭ وزىندە 50-دەن استام شەتەلدىك بايقاۋشىلار جۇمىس ىستەدى. ولار ساي­لاۋعا دەيىن ۇگىت-ناسيحات جۇمىستارىنىڭ قالاي ءجۇرىپ جاتقاندىعىنا كوڭىل بولسە, سايلاۋ كۇنى داۋىس بەرەتىن ۋچاسكەلەردە بو­لىپ, ءوز بايقاۋلارىن جۇرگىزدى. ەۋروپاداعى قاۋىپسىزدىك جانە ىنتىماقتاستىق ۇيىمى­نىڭ حالىقارالىق بايقاۋشىسى كەتلين ۆيل­لي جانە گەرمانيا فەداراتيۆتى رەس­پۋب­ليكاسىنان كەلگەن بايقاۋشى ميحايل لاۋبش, رەسەي فەدەراتسياسى ورتالىق سايلاۋ كوميسسياسى توراعاسىنىڭ ورىنباسارى ستانيسلاۆ ۆاۆيلوۆ جانە دە پولشادان, بەلورۋسسيادان, سلوۆاكيادان كەلگەن باي­قاۋ­­شىلار دا وزدەرىنىڭ قورىتىندى اڭگى­مە­لەرىندە قازاقستانداعى بيىلعى سايلاۋدىڭ بارىنشا زاڭ اياسىندا, دەموكراتيالىق نەگىزدە جۇرگىزىلگەندىگىن اتاپ كورسەتتى. توقسان اۋىز ءسوزدى پرەزيدەنتتىككە كانديدات ن.ءا.نازارباەۆتىڭ اقمولا وبلىس­تىق قوعامدىق شتابى ءوزىنىڭ ميسسياسىن ويداعى­داي اتقارىپ شىقتى دەپ تۇيىندەر ەدىك. وسى ورايدا شتابتىڭ بارلىق مۇشە­لەرىنە العى­سىمدى ايتامىن. ەڭ باستىسى – نۇرسۇلتان نازارباەۆ ءۇشىن داۋىس بەرىپ, ەلىمىز بەن ەرىمىز­دىڭ مەرەيىن اسىرعان بارشا سايلاۋشى­لارعا ريزاشىلىعىمىزدى بىلدىرەمىز. بۇل جەڭىس ەلىمىزدىڭ بولاشاعى ءۇشىن كەرەك ەدى! سوعان قول جەتتى! قازاقستان رەسپۋبليكاسىنىڭ پرەزيدەنتى بولىپ ساي­لانعان حالقىمىزدىڭ ادال پەرزەنتى نۇر­سۇل­تان ءابىش ۇلى نازارباەۆتى بارلىق كوكشەتاۋلىقتار مەن اقمولالىقتاردىڭ اتىنان قۇتتىقتاي وتىرىپ, ەلىمىزدىڭ دە, ەلباسىنىڭ دا اماندىعىن تىلەيمىز. – وسى كۇنى مىنا جالىنداپ ورتەنىپ جاتقان دۇنيەدەن ەلىمدى قالاي امان-ساۋ الىپ قالامىن دەپ كۇنى-ءتۇنى الاڭداپ ءجۇرمىن, – دەگەن نۇرسۇلتان نازارباەۆتىڭ وسى ءبىر اۋىز ءسوزى ەلباسىنىڭ كەمەڭگەر كو­كەيىندەگى ادال ويىن تانىتىپ تۇرعاندىعى انىق. كانە, اعايىن, ەلىنىڭ مۇددەسىن ويلاۋ­مەن بار سانالى عۇمىرىن وتكىزىپ كەلە جاتقان, تاعى دا سول ۇلى مىندەتتەر مەن مۇددەلەر جولىندا, بولاشاعىمىز ءۇشىن, ءسىز بەن ءبىز ءۇشىن اتقا قونىپ, تاققا مىنگەن ەلباسىعا تىلەكشى دە تىرەۋشى بولايىق! جابال ەرعاليەۆ, اقمولا وبلىستىق ءماسليحاتىنىڭ دەپۋتاتى, قازاقستاننىڭ ەڭبەك  سىڭىرگەن قايراتكەرى. كوكشەتاۋ.