فيرۋزا ءشارىپوۆا جەكپە-جەك الدىنداعى سالماق ولشەۋ راسىمىنەن ءوتتى

رەسەيدىڭ بالاشيح قالاسىندا قازاقستاندىق كاسىپقوي بوكسشى فيرۋزا ءشارىپوۆا مەن رەسەيلىك يۋليا چەرنوبورودوۆا جەكپە-جەك الدىنداعى سالماق ولشەۋ راسىمىنەن ءوتتى, دەپ حابارلايدى allfight.ru. قوس بوكسشى ەكىنشى جارتىلاي جەڭىل سالماقتا شەكتەۋ قويىلعان 58,950 كەلىدەن اسپادى. ءشارىپوۆانىڭ سالماعى 58,9 كيلو بولسا, چەرنوبورودوۆا 58,7 كيلونى كورسەتتى. ايتا كەتەيىك, 4 ناۋرىز كۇنى وتانداسىمىز ماسكەۋدە كەزەكتى جەكپە-جەگىن وتكىزەدى. ونىڭ قارسىلاسى – رەسەيدىڭ ورتالىق فەدەرالدى ايماعىنىڭ چەمپيونى. كاسىپقوي بوكسقا العاش رەت شىعايىن دەپ تۇر. بۇعان دەيىن ءشارىپوۆا ناۋرىز ايىندا تيتۋلدى ايقاسىن وتكىزەتىندىگى حابارلانعان. الايدا, مەنەدجەرى سەرگەي زاۆيلەيسكي ەكەۋى قارجىلىق قيىندىقتارعا بايلانىستى رەيتينگتى جەكپە-جەك وتكىزۋدى ءجون كورىپتى. فيرۋزانىڭ سوڭعى ايقاسى 24 قىركۇيەك كۇنى الماتىدا سەربيالىق ميلەن ماتوۆيچكە قارسى وتكەن. جەرلەسىمىز ەكىنشى راۋندتا قارسىلاسىن نوكاۋتپەن جەڭگەن بولاتىن. قازىرگى ۋاقىتتا قازاقستاندىق بوكسشى ماسكەۋدە كىشى فلويد مەيۋەزەر اتىنداعى «بوكس اكادەمياسىندا» باپكەر سەرگەي كۋبىشەۆتىڭ قول استىندا جاتتىعىپ ءجۇر.