قوستانايدا پسيحياتر دارىگەردى ولتىرگەن قىلمىستىق توپ ۇستالدى

وسىدان ءۇش كۇن بۇرىن وبلىستىق پسيحياتريالىق اۋرۋحانانىڭ بۇرىنعى باس دارىگەرى,سوت  پسيحياتريالىق-ساراپتاۋ كوميسسياسىنىڭ ءتورايىمى, جوعارى ساناتتى سوت-پسيحياتريالىق ساراپشى راشيدا ساندىباەۆانى پىشاقتاپ ولتىرگەن كۇدىكتى ءۇش ادام قولعا تۇسكەن بولاتىن. وبلىستىق ىشكى ىستەر دەپارتامەنتى ءباسپاسوز قىزمەتىنىڭ حابارلاۋىنشا, ارنايى جەدەل-تەرگەۋ توبىنىڭ جۇرگىزگەن كەشەندى جەدەل-ىزدەستىرۋ شارالارىنىڭ ناتيجەسىندە ر.ساندىباەۆانى  ءولتىرۋدىڭ بارلىق مەحانيزمى, ءتاسىلى مەن سەبەبى تولىق اشىلدى. قاراعاندى وبلىسىنان ۇستالعان ءۇش ادام قىلمىستىڭ ورىن العانىن تولىق مويىنداپ, قامالدى. ەكىنشى ناۋرىز كۇنى تۇسكە دەيىن وبلىستىق پسيحياتريالىق اۋرۋحاناداعى №4 ءبولىمنىڭ مەڭگەرۋشىسى, جوعارى ساناتتى پسيحياتر-ناركولوگ دارىگەر, 45 جاستاعى زاۋرەش ءىزالدينا وسى ىسكە قاتىسى بار دەگەن كۇدىكپەن ۇستالدى. بۇل بىزگە  جەرگىلىكتى بۇقارالىق اقپارات قۇرالدارىنىڭ رەسمي ەمەس كوزدەردەن العان اقپاراتتاردى جاريالاۋىنان بەلگىلى بولدى. وبلىستىق ىشكى ىستەر دەپارتامەنتىنىڭ ءباسپاسوز قىزمەتى بۇل جونىندە ءالى ەشقانداي اقپارات بەرمەي وتىر. تەك عانا قازىر  قىلمىستىق توپتىڭ باسقا مۇشەلەرىن ۇستاۋ جانە ولاردىڭ كىنالارىن تولىق دالەلدەۋ ءۇشىن ءىس-قيمىل شارالارى جۇرگىزىلۋدە ەكەنىن عانا ايتتى. ەسكە سالا كەتسەك, وسى جىلدىڭ 20 اقپان كۇنى  سوت پسيحياتريالىق ساراپتاۋ كوميسسياسىنىڭ ءتورايىمى, كوپ جىلدار وبلىستىق پسيحياتريالىق اۋرۋحانانىڭ باس دارىگەرى بولعان, وبلىسقا بەلگىلى جوعارى ساناتتى پسيحياتر دارىگەر, جوعارى ساناتتى سوت پسيحياتريالىق ساراپشى راشيدا ساندىباەۆا ءوزىنىڭ پاتەرىندە ايۋاندىقپەن پىشاقتاپ ولتىرىلگەن بولاتىن. ونىڭ دەنەسىنە قىلمىسكەرلەر 30 جەردەن پىشاق ۇرعان. ءنازيرا جارىمبەتوۆا, «ەگەمەن قازاقستان»