ۇلتتىق تەستىلەۋ ورتالىعىنىڭ تۇسىندىرمەسى

تالاپكەرلەردى ۇلتتىق بىرىڭعاي تەستىلەۋگە دايارلاۋ ماقساتىندا «ەگەمەن قازاقستان» گازەتى مەن «ۇلتتىق تەستىلەۋ ورتالىعىنىڭ» بىرلەسكەن جوباسى نەگىزىندە جارىق كورگەن «وقۋ ساۋاتتىلىعى» بويىنشا تەستىلەۋ ماتەريالدارى (№42, 1 ناۋرىز, 2017 جىل) قالىڭ وقىرماندى بەي-جاي قالدىرعان جوق. جاڭا فورماتتاعى تەستىلەۋ ماتەريالدارىنىڭ ماتىندىك ساپاسىنا نازار اۋدارعان جۇرتشىلىق ينتەرنەت رەسۋرستارى مەن الەۋمەتتىك جەلىلەردە وي-پىكىرلەرىن ايتىپ, قىزۋ تالقىلادى. وسىعان وراي گازەتىمىزگە «ۇلتتىق تەستىلەۋ ورتالىعى» رمقك-نان كەلىپ تۇسكەن تۇسىندىرمەنى نازارلارىڭىزعا ۇسىنىپ وتىرمىز. ۇلتتىق تەستىلەۋ ورتالىعىنىڭ تۇسىندىرۋىنشە, قوعامدا شۋ تۋدىرىپ وتىرعان تەست تاپسىرماسى سىناما (بايقاۋ) تەستىلەرىندە عانا كەزدەسەدى. قازىرگى ۋاقىتتا اتالعان سۇراق سىناما تەست تاپسىرمالارى بازاسىنان الىنىپ تاستالدى. حالىقارالىق تاجىريبە بويىنشا وقۋ ساۋاتتىلىعىن باعالاۋدا ءتۇرلى فورماتتاعى ماتىندەر قولدانىلادى. ونى جالپىلاما جانە جالقى ماتىندەر تۇرىندە قاراستىرۋعا بولادى. جالپىلاما ماتىندەرگە ءبىر دۇنيەنى كوركەم-ادەبي تىلدە سۋرەتتەۋ جانە تەحنيكالىق سيپاتتاماسىن جاساۋ, بەلگىلى ءبىر تاقىرىپتاردى تالقىلاۋ, بايانداۋ, ول تۋرالى پىكىر مەن كوزقاراس ءبىلدىرۋ جاتادى. ال جالقى ماتىندەرگە اقپاراتتىق پاراقشالار, حابارلاندىرۋلار, شاقىرۋلار, كەستەلەر جانە گرافيكالار, دياگراممالار, كارتالار جانە تاعى باسقالار كىرەدى. ياعني, بايقاۋ سىناعىندا جاريالانعان «بۇدان كەيىن كينو تۇسىرەمىن بە, بىلمەيمىن» اتتى رەجيسسەر ە.تۇرسىنوۆتىڭ سۇحباتىنىڭ ءۇزىندىسى جالپىلاما ماتىنگە جاتادى. پەداگوگيكالىق ولشەم ەرەجەلەرىنە سايكەس, وقۋ ساۋاتتىلىعىن باعالاۋ ءۇشىن ماتىندەردى ءتۇرلى اشىق دەرەككوزدەردەن پايدالانۋعا بولادى (كىتاپتار, سوزدىكتەر, ەنتسيكلوپەديالار, عىلىمي-كوپشىلىك سايتتار, گازەتتەر جانە تاعى باسقالار). الەۋمەتتىك جەلىدە سىنعا ۇشىراعان تەست ماتەريالىنا پايدالانىلعان ءماتىن بەلگىلى كينودراماتۋرگ, رەجيسسەر ەرمەك تۇرسىنوۆتىڭ سۇحباتىنان الىنعان. دەرەككوزى – https://www.dalanews.kz/17266 سايتى. بۇل سۇحبات «قالا مەن دالا» گازەتىنىڭ سايتىندا 2016 جىلدىڭ 10 شىلدەسىندە جاريالانعان. سۇحبات ماتىنىندە بەلگىلى تۇلعانىڭ جەكە ومىرىنە قاتىستى سۇراق جوق. رەجيسسەردىڭ وتاندىق كينو سالاسىنا قاتىستى جالپى كوزقاراسى جازىلعان. تەك بايان ەسەنتاەۆا مەن نۇرتاس ادامبايدىڭ ەسىمدەرى سۇحبات ماتىنىندە كەزدەسەتىندىكتەن, №14 تاپسىرمادا ديستراكتور (بۇرىس جاۋاپ) رەتىندە قولدانىلدى. وسىنداي ديستراكتورلاردى ىرىكتەۋ ءادىسى تەست تاپسىرمالارىن شىعارۋ بارىسىندا (تەستولوگيا سالاسىندا) قولدانادى. وقۋشىعا الدىن الا تانىسىپ, تەست تاپسىرماسىنا جاۋاپ بەرۋگە تيەسىلى اقپارات الۋى ءۇشىن سۇحبات ءماتىنى بەرىلەدى. وقۋ ساۋاتتىلىعىنىڭ سۇراقتارى وقۋشىنىڭ تومەندەگىدەي داعدىلارىن تەكسەرۋگە ارنالعان: ءسوز ماعىناسى مەن ءماتىن قۇرىلىمىن ءتۇسىنۋ, دالەلدەر كەلتىرە ءبىلۋ, جەكە ويى مەن تاجىريبەسىنە سۇيەنە وتىرىپ وي قورىتۋ. بۇل ءماتىن دە وقۋشىنىڭ جوعارىدا ايتىلعان داعدىلاردى قالىپتاستىرۋى, دامىتۋى جانە  قابىلەتتەرىن تەكسەرۋى ءۇشىن بەرىلگەن. اتالعان ءماتىن بايقاۋ سىناقتارى نۇسقالارىنىڭ بىرىندە ۇسىنىلعان. وسى نۇسقاداعى ۇبت تاپسىرمالارى ەلىمىزدىڭ تۇكپىر-تۇكپىرىنە 200 مىڭنان استام تارالىممەن تارايتىن «ەگەمەن قازاقستان» گازەتىندە جاريالاندى. وسىلايشا, ينتەرنەت جەلىسىنە قولى جەتپەيتىن, ونلاين بايقاۋ سىناعىن تاپسىرۋعا مۇمكىندىگى جوق الىس وڭىرلەردەگى وقۋشىلارعا جاڭا فورمات بويىنشا ۇبت-عا دايىندالۋ مۇمكىندىگى قاراستىرىلىپ وتىر. ەلىمىزدىڭ باس باسىلىمى ارقىلى وقۋشىلار بيىلعى ۇبت-دا كەزدەسەتىن تاپسىرمالار ۇلگىسىمەن تانىسىپ, ەمتيحانعا دايىندالا الادى.