وقو-دا 5 جىلدا 47 مىڭ وتباسى باسپانامەن قامتىلادى

بيىلدان باستاپ وڭتۇستىك قازاقستاندا قۇرىلىس كولەمىنىڭ ءوسىمى 10 پايىزدان  اسىپ,  2021 جىلعا دەيىن  جىلىنا 1 ميلليون شارشى مەتردەن استام تۇرعىن ءۇي پايدالانۋعا بەرىلىپ وتىرادى. بۇل تۋرالى ايماقتىق كوممۋنيكاتسيالار ورتالىعىندا وتكەن ءباسپاسوز ءماسليحاتىندا  وبلىس اكىمىنىڭ ءبىرىنشى ورىنباسارى دارحان ساتىبالدى ءمالىم ەتتى, دەپ حابارلادى وقو اكىمدىگىنىڭ ءباسپاسوز قىزمەتى. مەملەكەتتىك  «نۇرلى جەر» تۇرعىن ءۇي قۇرىلىسى باعدارلاماسىنىڭ وڭىردەگى ىسكە اسىرىلۋ بارىسىن بايانداعان  دارحان امانگەلدى ۇلى  نەگىزگى بەس باعىتقا توقتالدى. «تۇرعىن ءۇي قۇرىلىسىنىڭ دامۋ جوسپارىنا سايكەس, وڭىرىمىزدە  5 جىلدا بارلىق قارجىلاندىرۋ كوزدەرى ارقىلى جالپى 47 619 وتباسىنى باسپانامەن قامتاماسىز ەتەتىن بولامىز»,  - دەدى دارحان امانگەلدى ۇلى. ءبىرىنشى باعىت - يپوتەكالىق نەسيە بەرۋدىڭ قولجەتىمدىلىگىن ارتتىرۋ. مۇندا حالىق تاراپىنان سۇرانىستى ىنتالاندىرۋ ماقساتىندا, ەكىنشى دەڭگەيدەگى بانكتەردىڭ يپوتەكالىق نەسيە بەرۋ كولەمىن ارتتىرۋ ءۇشىن, جىل سايىن رەسپۋبليكا بويىنشا 10 ملرد. تەڭگە سۋبسيديا بەرىلەدى. ياعني, قازىرگى تاڭدا بانكتەر ارقىلى بەرىلەتىن يپوتەكالىق نەسيە كولەمى جىلدىق 17 پايىزدى قۇراسا, باعدارلاما شەڭبەرىندە  ونىڭ 7 پايىزى  سۋبسيديا ءبولۋ ارقىلى جابىلاتىن بولادى. ال, تۇپكىلىكتى قارىز الىشۋعا 10 پايىزبەن, تۇرعىن ءۇيدى ساتىپ الۋعا نەسيە 15 جىلعا دەيىن بەرىلمەك.  نەسيە كولەمى - 15 ملن. تەڭگە. نەگىزگى تالاپتىڭ ءبىرى - قارىز الۋشىنىڭ شوتىندا ساتىپ الىناتىن تۇرعىن ءۇيدىڭ 30 پايىز مولشەرىندە قاراجاتى جينالۋى ءتيىس. باعدارلاما شەگىندەگى يپوتەكالىق نەسيە الۋ, تۇرعىندارعا اي سايىنعى تولەمىن 30 پايىزعا تومەندەتىلمەك.  بۇل شارا ءوز تاراپىنان, يپوتەكالىق نەسيەنى قولجەتىمدى ەتىپ, تۇرعىنداردىڭ باسپانا الۋىنا ۇلكەن مۇمكىندىكتەر تۋعىزباق. «باعدارلامانىڭ كەلەسى باعىتى - جەكە قۇرىلىس سالۋشىلاردى ىنتالاندىرۋ. جەكە قۇرىلىس سالۋشىلاردى ىنتالاندىرۋ ماقساتىندا ەكىنشى دەڭگەيدەگى بانكتەرگە  نەسيە بەرۋ كولەمدەرىن كەڭەيتۋ ارقىلى قۇرىلىس كومپانيالارىن قارجى رەسۋرستارىمەن قامتاماسىز ەتۋ كوزدەلىپ وتىر. بۇل ماقساتقا جىل سايىن رەسپۋبليكالىق بيۋدجەتتەن 11 ملرد.تەڭگە سۋبسيديا بولىنبەك. سۋبسيديا 3 جىلعا بەرىلىپ,  تۇرعىن ءۇي قۇرىلىس جيناق بانكى سالىمشىلارىنا دايىن تۇرعىن ءۇيدىڭ كەمىندە 50 پايىزى  ۇسىنىلاتىن بولادى. بۇل ءوز كەزەگىندە  157 ملرد.تەڭگەنى سۋبسيديالاۋعا مۇمكىندىك بەرىپ, 600 مىڭ. شارشى مەتر تۇرعىن ءۇي  سالۋعا سەبەپ بولماق» , - دەدى وبلىس اكىمىنىڭ ءبىرىنشى ورىنباسارى. ءۇشىنشى باعىت-تۇرعىن ءۇي قۇرىلىس جيناقتارى جۇيەسى ارقىلى كرەديتتىك باسپانا  سالۋ.  تۇرعىن ءۇي قۇرىلىس جيناق بانكى سالىمشىلارى, ونىڭ ىشىندە جەرگىلىكتى اتقارۋشى ورگاندا ەسەپتە تۇرعان كەزەكتەگى ادامدار ءۇشىن قولجەتىمدى تۇرعىن ءۇي كولەمىن ارتتىرۋ ءۇشىن كرەديتتىك باسپانا سالۋ جالعاساتىن بولادى. مۇندا نەسيەلىك ءۇي قۇرىلىسى 2 باعىت ارقىلى ىسكە اسىرىلماق.  بىرىنشىدەن, مەرزىمدىلىگى 2 جىلعا دەيىن بولىنگەن قاراجاتتى قۇرىلىستىڭ جاڭا جوبالارىنا قايتا جۇمساۋ ارقىلى جاو-نىڭ وبليگاتسيالار شىعارۋى جولىمەن جۇزەگە اسادى.  2017-2021 جىلدار ارالىعىندا رەسپۋبليكا بويىنشا «بايتەرەك» ۇبح اق-نىڭ وبليگاتسيالارى ارقىلى 805,7 ملرد.تەڭگە ءبولۋ جوسپارلانىپ وتىر.   نەسيەلىك تۇرعىن ءۇيدىڭ قۇنى 1 شارشى مەترى –140 مىڭ تەڭگەگە دەيىن بولماق.  وسىلايشا وبلىس بويىنشا 2017-2021 جىلدار ارالىعىندا شامامەن 78,2 ملرد.تەڭگەگە نەسيەلىك ۇيلەر سالىنىپ, 558,6 مىڭ شارشى مەتردى قۇرايتىن 7146 پاتەر پايدالانۋعا بەرۋ جوسپارلانىپ وتىر. ەكىنشىدەن, بانكتەرگە شارتتى سالىمدار سالۋ ارقىلى جۇزەگە اسادى. تۇرعىن ءۇي قۇرىلىس جيناق بانكى ەكىنشى دەڭگەيلى بانكتەرگە تومەنگى پايىزبەن قارجى بەرىپ, ول قارجى تۇرعىن ءۇي سالاتىن كومپانيالارعا 7 پايىزبەن  ۇسىنىلماق. بۇل شارا تۇرعىن ءۇي سالۋ كولەمىن ەدۋىر ارتتىرادى دەپ كۇتىلۋدە. ءتورتىنشى باعىت - حالىقتىڭ الەۋمەتتىك ءالسىز توپتارى ءۇشىن جالعا بەرىلەتىن  تۇرعىن ءۇي قۇرىلىسى. 2017-2021 جىلدار ارالىعىندا وڭىرىمىزدەگى رەسپۋبليكالىق بيۋدجەتتەن ارەندالىق تۇرعىن ۇيلەر قۇرىلىسىنا 159,6 ملرد. تەڭگە قاراستىرىلعان. بۇگىنگى كۇنگە وبلىستا تۇرعىن ءۇي كەزەگىنە 43 مىڭنان استام ادام تىركەلگەن. بۇل رەسپۋبليكا بويىنشا 3-ءشى كورسەتكىش. اتالعان جىلدار ارالىعىندا 427,9 مىڭ شارشى مەتر ارەندالىق تۇرعىن ءۇي 6816 پاتەر قۇرىلىسىن جۇرگىزۋ جوسپارلانۋدا. باعدارلاماداعى بەسىنشى باعىتى - جەكە تۇرعىن ءۇي قۇرىلىسىن دامىتۋ. بۇل باعىتتىڭ شەڭبەرىندە كوپتەگەن وزىق الەمدىك  قالالاردىڭ ۇلگىسىندە بىرىڭعاي ساۋلەتتىك ستيلدە جەكە تۇرعىن ۇيلەر سالۋعا باسىمدىق بەرىلەدى. سونداي-اق 2018 جىلى وبلىستا 2 پيلوتتىق جوبانى جۇزەگە اسىرۋ كوزدەلۋدە. ونىڭ ءبىرىنشىسى, شىمكەنت قالاسىنىڭ «بوزارىق» مولتەك اۋدانىندا ىسكە اسادى.   «بوزارىق» تۇرعىن ءۇي كەشەنى ينۆەستيتسيالىق جوباسى بويىنشا 74 گا  جەر تەلىمىنە 293 جەكە تۇرعىن ءۇي سالۋ كوزدەلۋدە. ال ەكىنشىسى, شىمكەنت قالاسىنىڭ «تاسكەن» تۇرعىن الابىندا جۇزەگە اسادى.  جوسپار  بويىنشا جالپى اۋدانى 180 گا جەرگە 1050 جەكە تۇرعىن ءۇي بوي كوتەرەدى.