پرەزيدەنتتىڭ موراتوري جاريالاۋ وكىلەتتىگى ساقتالادى

"قولدانىستاعى كونستيتۋتسيا بويىنشا مەملەكەت باسشىسىنىڭ زاڭ شىعارۋ جانە زاڭ كۇشىندەگى قاۋلى شىعارۋ قۇقىعى بولعان. ەندى "قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تۇزەتۋلەر ەنگىزۋ تۋرالى" زاڭ جوباسىنا ساي, كونستيتۋتسيانىڭ 45-بابىنىڭ 2-تارماعىنا ساي پرەزيدەنتتىڭ بۇل قۇزىرەتى الىنىپ تاستالماق. وزدەرىڭىز بىلەسىزدەر, تاۋەلسىزدىك جىلدارىندا پرەزيدەنت ءۇش رەت موراتوري جاريالاپ, داعدارىس كەزىندە بۇل كاسىپكەرلەردىڭ قولداۋىن تاپتى, ءتىپتى, بانكروت بولۋدان ساقتادى. جاڭا زاڭ جوباسى تۋرالى كاسىپكەرلەردىڭ الاڭداۋشىلىقتارى بار. قاجەت كەزدە مەملەكەت باسشىسىنىڭ موراتوري جاريالاۋ قۇقىعى ساقتالا ما؟ ەگەر ساقتالاتىن بولسا, قانداي نورمالار نەگىزىندە؟" - دەپ سۇرادى ءماجىلىس دەپۋتاتى ازات پەرۋاشەۆ جۇمىس توبى جەتەكشىسى ادىلبەك جاقسىبەكوۆتەن. "مۇنداي قۇقىق پرەزيدەنتتە ساقتالادى. كونستيۋتتسيانىڭ 45-بابىنىڭ 1-تارماعىندا پرەزيدەنت كونستيتۋتسيا زاڭدارىن ساقتاۋ بويىنشا رەسپۋبليكا اۋماعىندا كۇشىنە ەنەتىن قاۋلى شىعارا الادى. ءسىزدىڭ ساۋالىڭىزدا ايتىلعان نورمالار وسى قاۋلىلار شەڭبەرىندە شىعارىلادى. وسى باپتا پرەزيدەنتتىڭ جوعارىداعى قۇقىعى ساقتالادى", - دەدى جاقسىبەكوۆ.