2017 جىلى قازاقستاننىڭ ءۇش مۇناي وڭدەۋ زاۋىتى جاڭعىرتىلادى

2017 جىلى قازاقستاننىڭ ءۇش مۇناي وڭدەۋ زاۋىتىن جاڭعىرتۋ جوبالارى اياقتالادى. سودان كەيىن وڭدەۋ كولەمى 14,5 ملن-نان 17,5 ملن توننا مۇنايعا دەيىن ارتاتىن بولادى. بۇل تۋرالى قر ۇكىمەتىندەگى ءباسپاسوز كونفەرەنتسياسىندا ەنەرگەتيكا ءمينيسترى قانات بوزىمباەۆ ايتتى, دەپ جازادى primeminister.kz. مينيستر 2017 جىلدىڭ ەكىنشى جارتىسىندا پاۆلودار جانە اتىراۋ زاۋىتتارىن جاڭعىرتۋ جۇمىستارى اياقتالاتىنىن, ال 2018 جىلدىڭ ءبىرىنشى جارتىسىندا شىمكەنت زاۋىتىن جاڭعىرتۋ جۇمىستارىن اياقتاۋ جوسپاردا بار ەكەنىن ايتتى. «جولداۋدا مەملەكەت باسشىسى مۇناي وڭدەۋ كولەمىن ۇلعايتۋ قاجەتتىگىنە ەكپىن ءتۇسىردى. مۇناي وڭدەۋ زاۋىتتارىن جاڭعىرتۋ تازا مۇناي ونىمدەرىن, بەنزين, ديزەل وتىنى, اۆياوتىن ءوندىرىسىن ۇلعايتۋعا مۇمكىندىك بەرەدى», - دەدى مينيستر. وسىلايشا, 2019 جىلى مينيسترلىك ەلىمىزدىڭ ىشكى سۇرانىستارىن وتاندىق مۇناي ونىمدەرىمەن تولىقتاي قامتاماسىز ەتىپ, جانار-جاعارماي ماتەريالدارىن يمپورتتاۋدى شەكتەيدى دەپ كۇتىلۋدە. بۇگىندە رەسەي فەدەراتسياسىنان ىشكى نارىققا تاسىمالدىڭ 30%-دىق تاۋەلدىلىگى بار. ەگەر 70% تۇتىنۋشىلىق ءبىزدىڭ ءۇش مۇناي وڭدەۋ زاۋىتتارىنىڭ ەسەبىنەن قامتامسىز ەتىلسە, 30% وتىن سىرتتان اكەلىنەدى. سىرتتان تەك رەسەي فەدەراتسياسىنان تاسۋ مۇمكىندىگى بار, دەپ ناقتىلادى مينيستر. سونداي-اق,  رف-نىڭ كوتەرمە ساۋدا باعاسىنا قازاقستان ەشقانداي جولمەن ىقپال ەتە المايدى. بۇل جاعدايدان شىعۋدىڭ جالعىز مۇمكىندىگى – جەدەلدەتىپ زاۋىتتاردى جاڭعىرتۋدى اياقتاۋ. «ارينە, ءبىز جانارماي قۇيۋ بەكەتتەرىندەگى باعالاردى بەلگىلەپ قويا الامىز. بىراق بۇل نە نارسەگە اكەلەدى؟ رەسەيلىك كوتەرمە باعامەن ساتۋشىلار بىزگە تاسي المايدى, سەبەبى وزدەرى شىعىنعا باتادى. كەيىن جانارماي قۇيۋ بەكەتتەرىندە 30%-دىق تاپشىلىق ورىن الادى. بۇنداي جاعدايدى باستان كەشكەنبىز. يا, بەنزين قىمبات, بىراق ول جوق ەمەس, بار. جانە بۇل بەنزيننىڭ ارزان بولىپ, بىراق جوق بولۋىنان جاقسى. تاپشىلىق ورىن السا, جانارماي ساپاسىنىڭ ناشار بولۋى ورىن الادى», - دەدى مينيستر. ونىڭ ايتۋىنشا, رف نارىعىنداعى باعا بەلگىلەۋ جاعدايىنا تاۋەلدىلىك وتاندىق مۇناي وڭدەۋ زاۋىتتارىنىڭ جاڭعىرتىلعانىنا دەيىن ساقتالادى. «وتكەن جىلى مەن بارلىق ءۇش زاۋىتتى ارالادىم, ءتيىستى كومپانيالاردىڭ الدىنا مىندەتتەرىن جۇكتەدىم, قارجى بار, مەردىگەرلەر تارتىلدى, قاجەتتى جابدىقتار بار, وپتيميستىك كوزقاراس بار. وتكەن جىلدان بەرى بارلىق ءۇش باعىت بويىنشا جۇمىس قارقىنىن جىلدامداتتىق», - دەپ ءسوزىن تۇيىندەدى ق. بوزىمباەۆ.