بيزنەسمەندەردىڭ فرانشيزا ساتىپ الۋىنا ۇكىمەت اقشا ءبولۋى مۇمكىن

ۇكىمەت فرانشيزا بويىنشا شىعىنداردى سۋبسيديالاۋ ماسەلەسىن قاراستىرادى, دەلىنگەن "اق جول" پارتياسىنىڭ وسى ماسەلە تۋرالى دەپۋتاتتىق ساۋالىندا, دەپ جازادى informburo.kz. "اق جول" پارتياسى فراكتسياسى اتاقتى ماركالاردىڭ فرانشيزاسىن ساتىپ الۋ ءۇشىن بيزنەسمەندەرگە ۇكىمەتتىڭ قولداۋ بەرۋىن سۇرايدى. ال بۇرىن مۇنداي قولداۋ ءوزىمىزدىڭ جاڭا برەند جاساۋشىلارىمىزعا بەرىلەتىن ەدى. "اق جول" پارتياسىنىڭ ساۋالىنا جاۋاپ رەتىندە ۇكىمەت حالىقارالىق فرانچايزينگتىڭ باسىم باعىتتارىن زەرتتەيتىنىن ايتتى. "2025 جىلعا دەيىن شيكىزاتتىق ەمەس سەكتوردى ەكى ەسە ارتتىرۋ تۋرالى پرەزيدەنتتىڭ تاپسىرماسى بار. ول ءۇشىن مەملەكەت باسشىسى "ۆەلوسيپەدتى قايتا ويلاپ تاپپاي" بۇرىننان قالىپتاسقان جاھاندىق ءوندىرىس تىزبەگىن ارى قاراي الىپ كەتۋدى ۇسىنادى. ول ءۇشىن ەلگە ترانسۇلتتىق كومپانيالاردىڭ كەلۋىن ىنتالاندىرۋ كەرەك", - دەلىنگەن ساۋالدا. فرانچايزينگتىڭ ءبىر ارتىقشىلىعى سوندا, اتاقتى كومپانيالار ءونىمدى دايىنداۋ ادىستەرى مەن تەحنولوگيالارىن وزدەرى كەلىپ ۇيرەتەدى. سونىمەن قاتار, ءونىمنىڭ ساپاسىنا دا وزدەرى جاۋاپ بەرەدى. بۇل ءوز كەزەگىندە قازاقستانداعى باقىلاۋ ورگاندارىنا دەگەن تاۋەلدىلىكتەن ارىلتىپ, جەمقورلىقتىڭ جولىن كەسپەك. "الەمدىك كوشباسشى كومپانيالاردىڭ فرانشيزاسىنىڭ تىم قىمباتتىعىنا قاراماستان, جيىرما ءبىرىنشى عاسىردا شاعىن جانە ورتا بيزنەستىڭ 50 پايىزى فرانچايزينگ جۇيەسىمەن جۇمىس ىستەيتىنى بەلگىلى", - دەيدى اقجولدىقتار. پارتيانىڭ دەپۋتاتتىق فراكتسياسى فرانچايزينگ بويىنشا وزدەرىنىڭ ناقتى ۇسىنىستارىن ءبىلدىرىپ, الەم بويىنشا قازاقستانعا ەڭ قاجەتتى كومپانيالاردىڭ ءتىزىمىن جاساۋدىڭ قاجەتتىلىگىن العا تارتتى. "دەپۋتاتتىق ساۋالعا جاۋاپ بەرگەن ساعىنتاەۆ ۇكىمەتتىڭ دۇنيەجۇزىلىك بانكپەن بىرلەسىپ شاعىن جانە ورتا بيزنەستىڭ باسەكەلەستىگىن ارتتىرۋ جوباسى دايىندالۋدا. وسى جۇمىستار اياسىندا "اتامەكەن" كاسىپكەرلەردىڭ ۇلتتىق پالاتاسى جانىنان تاسىمالداۋشىلاردى دامىتۋ قىزمەتى قۇرىلماق", - دەپ حابارلايدى "اق جول" پارتياسى.