تارازدىق جاستار زيالى قاۋىم وكىلدەرىمەن كەزدەستى

تاراز مەملەكەتتىك پەداگوگيكالىق ينستيتۋتىنىڭ ۇيىمداستىرۋىمەن «ۇرپاقتار ساباقتاستىعى» جوباسىنىڭ اياسىندا جامبىل وبلىسىنداعى زيالى قاۋىم وكىلدەرىمەن جاستاردىڭ ەرەكشە فورماتتاعى كەزدەسۋى ءوتتى, دەپ حابارلايدى تارمپي-دىڭ اقپاراتتىق-يميدجدىك قىزمەتىنىڭ جەتەكشىسى جاندار اسان. وقۋ ورنىنىڭ «جەرۇيىق» ەتنوگرافيالىق ورتالىعىندا وتكەن باسقوسۋدا ينستيتۋت رەكتورى داريا قوجامجاروۆا شارانىڭ ءمانى مەن ماڭىزىنا توقتالىپ ءوتتى. – ءتول تاريحىمىزدىڭ تۇڭعيىعىنا ۇڭىلەر بولساق, تاعدىر تالايى ۇنەمى قىل ۇستىندە بولعان, «اتتىڭ جالىندا, تۇيەنىڭ قومىندا كۇن كەشكەن» قازاق حالقى نەبىر زوبالاڭدى باستان وتكەردى. ازاتتىقتىڭ اق تاڭى اتىپ, بابالار اڭساعان ەگەمەندىكتى الدىق. تاۋەلسىز ەل اتاندىق. مەملەكەت باسشىسى نۇرسۇلتان نازارباەۆتىڭ ساليقالى ساياساتىنىڭ ارقاسىندا الەمگە ايگىلى بولدىق. جاھاندانۋ جاعدايىندا ءومىر ءسۇرىپ جاتقان وسكەلەڭ ۇرپاقتى قوعام تالاپتارىنا ساي قالىپتاستىرۋ وڭاي شارۋا ەمەس ەكەندىگى بەلگىلى جايت. بۇل تۇرعىدا حالقىمىزدىڭ عاسىرلار بويى جيناقتاپ, بابادان بالاعا مۇرا بولىپ جەتكەن باي تاجىريبەسىن قولدانۋ كەزەك كۇتتىرمەيدى. وسى ورايدا, اعا بۋىن وكىلدەرىمەن تىعىز-قارىم قاتىناس ورناتىپ, قۇرمەتتەۋ ءبىزدىڭ باستى پارىزىمىز. سىزدەر وسىناۋ يگىلىكتى ءىستىڭ نەگىزگى ۇيىتقىسى بولىپ تابىلاسىزدار, – دەدى د. قوجامجاروۆا. ءوز كەزەگىندە د. قوناەۆ اتىنداعى حالىقارالىق قورىنىڭ جامبىل وبلىستىق بولىمشەسىنىڭ توراعاسى امانكەلدى قارەنتاەۆ ۇلتتىق سانا قازاقتى تۇتاستاندىراتىن قۇندىلىق ەكەندىگىن جانە ول مەملەكەتتىك يدەولوگيانىڭ, قازىرگى قوعام دامۋىنىڭ نەگىزگى ىرگەتاسى بولاتىندىعىن ايتتى. – رۋحاني تۇرعىدا جاقسى تاربيەلەنگەن ۇرپاق مىندەتتى تۇردە ەلشىل, ۇلتجاندى ازامات بولىپ قالىپتاسپاق. بۇنى ءومىردىڭ ءوزى دالەلدەپ وتىر. وتكەننىڭ ۇلاعاتىن, ۇلتتىق بولمىستى, وزىندىك مادەني قۇندىلىقتاردى باعالاي وتىرىپ, بولاشاقتى باعامداي الامىز, – دەدى ول. سونىمەن قاتار, باسقوسۋ بارىسىندا ەل اعالارى جاستارعا ۇرپاقتار ساباقتاستىعىن ساقتاۋ, رۋحاني-ادامگەرشىلىك قاتىناستاردى دامىتۋ, ەلدە بولىپ جاتقان وقيعالار جايىندا پىكىرلەرىن ءبىلدىرىپ, وزدەرىنىڭ ومىرلىك تاجىريبەلەرىمەن ءبولىستى. وقۋ ورنىنىڭ ونەرلى ستۋدەنتتەرى دايىنداعان كونتسەرتتى تاماشالاعاننان كەيىن قوناقتار كەزدەسۋ باعدارلاماسىن سايكەس ينستيتۋتتا جاڭادان اشىلعان «بالالاردىڭ سويلەۋ ءتىلىن تۇزەتۋ مەن دامىتۋعا قولداۋ كورسەتۋ» مەن «ءوزىن-ءوزى تانۋ» ورتالىقتارىندا بولدى. سونىمەن قاتار, ارداگەرلەر ج. بالاساعۇن اتىنداعى تۇركىستان ولكەسىنىڭ تاريحىن زەرتتەۋ ورتالىعى مەن «باۋىرجانتانۋ» عىلىمي-زەرتتەۋ ورتالىعىندا اتقارىلىپ جاتقان جۇمىستارمەن تانىستى.