قازاقستان ونىمدەرى رەسەيدە تانىستىرىلدى

رەسەي فەدەراتسياسىندا وڭىرلىك ساۋدا جەلىلەرىندە قازاقستاندىق ونىمدەردى تانىستىرۋعا باعىتتالعان اكتسيا ءوتتى, دەپ حابارلايدى قازاقپارات. «بۇل ازىرشە تاجىريبە رەتىندە قازاقستاندىق وندىرۋشىلەرمەن بىرگە وتكىزىلگەن جوبا. ونىڭ باستى ماقساتى – قازاقستاندىق ءونىمدى رەسەيدەگى ساتىپ الۋشىلارعا كەڭىنەن تانىستىرۋ», - دەپ اتاپ ءوتتى «KAZNEX INVEST» باسقارۋشى ديرەكتورى جالەل بولاتوۆ. ونىڭ ايتۋىنشا, قازاقستاندىق تاۋارلار رەسەيلىك تۇتىنۋشىلار ءۇشىن تاڭسىق ەمەس, دەگەنمەن, ريتەيل جەلىلەرىنىڭ سورەلەرىنە شىعۋعا ءبىرشاما قيىندىقتار بولعاندىقتان, رەسەيلىك تۇتىنۋشىلارعا جەتپەي جاتادى. اكتسيا بارىسىندا شامامەن 40-قا تارتا تاۋار ءتۇرى ۇسىنىلدى. ونىڭ ىشىندە – كونديتەرلىك ونىمدەر, شوكولاد, ۇن ونىمدەرى, ماكارون, شىرىن مەن سۋسىندار, ماي ونىمدەرى بار. اتالمىش شارا رەسەيدىڭ ءنوۆوسىبىر, ەكاتەرينبۋرگ, بارناۋىل, كەمەروۆو, تومسك جانە نوۆوكۋزنەتسكتە ءبىر ۋاقىتتا ءوتتى. بۇل شامامەن 900-دەن استام ساۋدا نۇكتەسى. قازاقستاندا شىعارىلعان تاۋارلاردى دۇكەن سورەلەرىنە جىلجىتۋ باعدارلاماسىنىڭ ارقاسىندا قر تاۋارلارى رەسەيدىڭ جەتەكشى وڭىرلىك جەلىلەرىنە كىرە الدى. جالەل بولاتوۆتىڭ حابارلاۋىنشا, شارا بيىل جالعاسىن تابادى جانە بۇل قازاقستاندىق تاۋارلاردىڭ رەسەيدە كوپ تانىمال بولۋىنا ىقپال ەتپەك.