«ءبىر انىن قازاعىمنىڭ سالىپ كەتسەم...»

وڭتۇستىك قازاقستان وبلىستىق «وتىرار» عىلىمي-امبەباپ كىتاپحاناسىندا «ولمەيتۇعىن ۇلى اعىس» اتتى جوباسىنىڭ العاشقى تۇساۋكەسەرى بەلگىلى اقىن, ءانشى, سازگەر, حالىقارالىق «الاش» جانە الەكساندر فادەەۆ اتىنداعى ادەبي سىيلىقتاردىڭ يەگەرى, ساحا (ياكۋتيا) رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى تۇرسىناي ورازباەۆاعا ارنالعان «ءبىر ءانىن قازاعىمنىڭ سالىپ كەتسەم...» اتتى ادەبي-سازدى ەسكە الۋ كەشىمەن اشىلدى. وڭتۇستىك قازاقستان وبلىسىنىڭ سايرام اۋدانىنداعى قايناربۇلاق اۋىلىنىڭ تۋماسى تۇرسىناي ورازباەۆاعا اقىندىق, انشىلىك, سازگەرلىك قاسيەت اكەسىنەن قونعان سىڭايلى. ورازباي دومبىرا, سكريپكا, باياندا وينايدى ەكەن. وتباسىنداعى 14 پەرزەنتتەن ىلەسكۇل, فاتيما, تۇرسىناي, ەرجان عانا ءتىرى قالىپتى. سول سەبەپتى دە اتا-اناسى ىرىمداپ قىزدارىنا ىلەسكۇل, تۇرسىناي دەگەن ەسىم قويعان كورىنەدى. ىلەسكۇل قوبىز تارتۋدىڭ شەبەرى. ال جاستايىنان ولەڭ-جىرعا اسىق بولعان, عاشىق بولعان تۇرسىناي تىم ەرتە ەسەيگەن. س. م. كيروۆ اتىندىعى قازاق مەملەكەتتىك ۋنيۆەرسيتەتىنىڭ (قازىرگى ءابۋ ناسىر ءال-فارابي اتىنداعى قازاق ۇلتتىق ۋنيۆەرسيتەتىنىڭ) جۋرناليستيكا فاكۋلتەتىن, ماسكەۋدەگى ماكسيم گوركي اتىنداعى ادەبيەت ينستيتۋتىنىڭ جوعارى ادەبيەت كۋرسىن بىتىرگەن. شىمكەنتتەگى وبلىستىق قازاق دراما تەاترىندا, راديوكوميتەتىندە, «وڭتۇستىك قازاقستان» گازەتىنىڭ رەداكتسياسىندا قىزمەت ىستەگەن. كەيىننەن ارمان  قالا – الماتىعا اۋىسقان. 1983 جىلى  قازاقستان جازۋشىلار وداعىنىڭ حاتشىسى قالاۋبەك تۇرسىنقۇلوۆ باستاعان دەلەگاتسيانىڭ قۇرامىندا ساحا  (ياكۋتيا) رەسپۋبليكاسىندا وتكەن قازاق ادەبيەتى, مادەنيەتى, مەن ونەرىنىڭ كۇندەرىنە قاتىسقان.  سوندا  جەرگىلىكتى حالىقتىڭ «سارداانا» ءانىن  ناشىنە كەلتىرە ورىنداعانى ءۇشىن وعان ساحا (ياكۋتيا) رەسپۋبليكاسىنا ەڭبەك سىڭىرگەن مادەنيەت قىزمەتكەرى اتاعى بەرىلەدى. ۋاقىت وتە كەلە قىزىنىڭ اتىن دا سارداانا دەپ قويادى. «شىن مانىندە اقىندىق ايەلدەن باستاۋ العان», «ونەرگە قاشاندا شىنايى تازالىق كەرەك», – دەپ ۇعىنعان ول ءاردايىم پوەزياعا ادالدىق تانىتقان. «تاڭ شاپاعى», «ىڭكار جۇرەك اۋەنى», مەن سەنىڭ كوكتەمىڭمىن», «گۇلسەزىم», «عاشىق ءانىم», «نۇرلى ءانىم», «دومبىرا مەن حومۋس» (ساحا تىلىندە), «ارمانىمنىڭ وتتارى» (ورىس تىلىندە), «تۋعان دالام» (تۋۆا تىلىندە) اتتى جىر جيناقتارى جارىق كورگەن. ساحا اقىن-جازۋشىلارىنا ارنالعان «سارداانا – اسياگۇل» دەگەن ءان جيناعى شىققان. «ماسكەۋ مەن استانا», قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازارباەۆ جايلى جازىلعان «نۇر ساۋلەتتى نۇر-اعا»,  «تۇركىستان», «سايرام سازى», «قايناربۇلاق – بال بۇلاق», «تولە ءبيدىڭ ۇرپاعىمىز», «تاۋەلسىز مەملەكەتتەر دوستاستىعى حالىقتارىنا ارنالعان «دوستىق تۋرالى جىر», «ناۋرىز – سالتاناتىم سەن», «سايىپقىران ساربازىم», «كۇنىم, ايىم, جۇلدىزىم!»,  «گۇلسەزىم», «جايناپ قاراعانىڭ-اي!» اندەرى حالىق اراسىندا كەڭىنەن تانىمال. وبلىستىق «وتىرار» كىتاپحاناسىنداعى «وڭتۇستىك قالامگەرلەرى» اتتى ارنايى بولمەدە اقىننىڭ بۇرىشى اشىلىپ, قالامگەردىڭ كىتاپتارى مەن ماراپاتتارى ورىن العان. وسىلايشا «قازاعىمنىڭ ءبىر ءانىن سالىپ كەتسەم...», دەپ ارمانداعان  تۇرسىناي ورازباەۆا شىن مانىندە «ولمەيتۇعىن ۇلى اعىسقا» اينالىپ وتىر. قارلىعاش ۇسەنقۇلوۆا, م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى اقپاراتتىق  ءبىلىم بەرۋ ورتالىعىنىڭ كىتاپحاناشىسى. شىمكەنت قالاسى