بۇگىن وسكەمەن قالاسىنداعى №1 مەكتەپكە قازاقتىڭ ۇلى اقىنى, فيلوسوف, عۇلاما عالىم شاكارىم قۇدايبەردى ۇلىنىڭ ەسىمى رەسمي تۇردە بەرىلىپ, ءبىلىم ورداسىندا وسى قۋانىشقا وراي تۇساۋكەسەر ءراسىمى ءوتتى.
مەكتەپ ديرەكتورى رايحان جانعازىقىزى قۇتتىقتاۋ سوزىندە تاربيە وشاعىنا ويشىل اقىننىڭ ەسىمىن بەرۋ وڭايعا تۇسپەگەنىن, وسى ءساتتى 12 جىل بويى اسىعا كۇتكەندەرىن ايتتى.
-كوپتەن بەرى كوكەيدە جۇرگەن ارمانىمىز ورىندالىپ وتىر. مەكتەبىمىزدىڭ شىڭعىستاۋدىڭ ءۇش شىڭىنىڭ ءبىرى, عۇلاما عالىم شاكارىمنىڭ ەسىمىمەن اتالىپ وتىرعانى ءبىز ءۇشىن ۇلكەن ماقتانىش, زور قۋانىش. ءبىلىم ورداسىندا شاكارىمتانۋ كۋرسى وقىتىلادى. وقۋشىلارىمىز اقىننىڭ ولەڭدەرى مەن فيلوسوفيالىق ويلارىن جاتقا بىلەدى دەسەك تە بولادى. بۇل تاراپتا مەكتەپ ىشىندە كوپتەگەن جۇمىستار جۇرگىزىلەدى, - دەدى مەكتەپ ديرەكتورى.
تۇساۋكەسەر راسىمىنە قاتىسقان وسكەمەن قالالىق ءبىلىم ءبولىمىنىڭ باسشىسى مادەنيەت احمەتوۆا مۇعالىمدەر مەن وقۋشىلاردى مەرەيلى مەزەتپەن قۇتتىقتاپ, شاھارداعى قازاق مەكتەپتەرىنىڭ سانىنىڭ جىلدان جىلعا ارتىپ كەلە جاتقانىن اتاپ ءوتتى.
-وسكەمەندەگى 34 مىڭعا جۋىق وقۋشىلاردىڭ 15 مىڭدايى قازاق مەكتەپتەرىندە وقيدى. قۇدايعا شۇكىر, تاۋەلسىزدىكتىڭ ارقاسىندا قازاق تىلىندە ءبىلىم بەرەتىن وقۋ ورىندارى كوبەيىپ كەلەدى. بۇل باعىتتاعى جۇمىستار ءالى دە جالعاسادى. وقۋشىلار, سىزدەرگە ايتارىم, شاكارىم اتالارىڭنىڭ «ادامدىق بورىشىڭ – حالقىڭا ەڭبەك قىل» دەگەن تاماشا ءسوزى بار. ويشىلدىڭ وسىنداي سوزدەرىن سانالارىڭىزعا ءسىڭىرىپ, كەلەشەكتە حالىققا ادال ەڭبەك ەتەتىندەرىڭىزگە كامىل سەنەمىز, - دەدى ول.
سونىمەن قاتار بۇل كۇنى مەكتەپتە شاكارىم اتىنداعى كابينەتتىڭ تۇساۋكەسەر ءراسىمى ءوتتى.
ازامات قاسىم,
«ەگەمەن قازاقستان»
وسكەمەن
سۋرەتتەردى تۇسىرگەن
– ەسىمحان ورىنباەۆ
