كونستيتۋتسيالىق رەفورماعا بايلانىستى 6 مىڭ ۇسىنىس ءتۇستى - جاقسىبەكوۆ

جۇمىس توبىنا كونستيتۋتسيالىق رەفورماعا بايلانىستى 6 مىڭ ۇسىنىس ءتۇستى. ولار كونستيتۋتسيانىڭ 98 بابىنىڭ 63 بابىنا قاتىستى ماسەلەلەردى قوزعاپ جاتىر. بۇل تۋرالى بۇگىن اقوردادا بيلىك تارماقتارى اراسىنداعى وكىلەتتىكتەردى قايتا ءبولۋ جونىندەگى جۇمىس توبىنىڭ قورىتىندى وتىرىسى بارىسىندا جۇمىس توبىنىڭ جەتەكشىسى ادىلبەك جاقسىبەكوۆ مالىمدەدى. "مەملەكەت باسشىسىنىڭ وكىلەتتىگى تۋرالى بولىمگە قاتىستى 40-تان اسا ۇسىنىس كەلدى. پارلامەنت وكىلەتتىگى جايلى 88 ۇسىنىس كەلىپ ءتۇستى. جالپى قازاقستاندىقتار پارلامەنت جۇمىسىن كۇشەيتۋ ماسەلەسىن قولداپ وتىر",  - دەدى ول. سونىمەن قاتار جاقسىبەكوۆ پارلامەنتتىك رەسپۋبليكاعا كوشۋ تۋرالى ۇسىنىستاردىڭ بولعانىن ايتتى. "دەپۋتتاتىق كورپۋستىڭ تالاپتارىن كۇشەيتۋ ۇسىنىلدى. ۇكىمەتتىڭ جۇمىسى جايلى ايتاتىن بولساق, قازاقستاندىقتار ۇكىمەتتىڭ پارلامەنتكە ەسەپ بەرۋگە مىندەتتىلىگىن كۇشەيتۋدى ۇسىنادى. سونداي-اق, بۇل جەردە شەشىمدەردىڭ ءماجىلىس جانە سەناتپەن كەلىسىمگە كەلۋ ارقىلى قابىلدانۋ كەرەكتىگى ايتىلادى. جانە ۇكىمەتتىڭ تەك ءماجىلىس الدىندا ەمەس, سونداي-اق, جالپى پارلامەنت الدىندا ەسەپ بەرۋ قاجەتتىلىگى تۋرالى ۇسىنىستار كەلدى", - دەدى جاقسىبەكوۆ. ال كونستيتۋتسيالىق كەڭەسكە قاتىستى ول 18 ۇسىنىستىڭ كەلگەنىن ايتتى. "كونستيتۋتسيالىق كەڭەستى قۇرۋ ءتارتىبىن وزگەرتۋ, سونداي-اق, كونستيتۋتسيالىق سوتتى قايتا قۇرۋ تۋرالى ۇسىنىس ءتۇستى. ال ەڭ كوپ  - 2148 ۇسىنىس قۇقىق قورعاۋ جانە سوت ورگاندارىنىڭ جۇمىسى جايىندا بولدى. وندا سۋديالارعا دەگەن تالاپتاردى كۇشەيتۋ تۋرالى, زاڭگەر ماماندىعىنىڭ ەڭبەك ءوتىلى مەرزىمىن ۇزارتۋ تۋرالى ايتىلدى", - دەدى جۇمىس توبىنىڭ جەتەكشىسى. "ادۆوكاتتاردان دا كوپ ۇسىنىس ءتۇستى. ولار ادۆوكاتتاردىڭ وكىلەتتىگىن ارتتىرىپ, ايىپتالۋشىلار قۇقىقتارىنىڭ كەپىلىن ارتتىرۋ جانە سوتتىڭ سانكتسياسى بولماعان كەزدە قاماۋ مەرزىمىن 72 ساعاتتان 48 ساعاتقا قىسقارتۋ تۋرالى ۇسىنىس ءبىلدىردى", - دەدى جاقسىبەكوۆ. ونىڭ ايتۋىنشا, ازاماتتار دەپۋتاتتارعا جاس بويىنشا شەكتەۋ قويىپ, قايتا سايلانۋعا شەكتەۋ قويۋدى ۇسىندى. سونىمەن بىرگە, حالىققا اكىمدەردى تاعايىنداۋ مۇمكىندىگىن بەرۋ جايى دا ءسوز ەتىلدى. "سۇراقتاردىڭ كوبى كونستيتۋتسيانىڭ 26-بابىنا وزگەرتۋ ەنگىزۋگە قاتىستى ەكەنىن ايتا كەتەيىك. بۇل ماسەلە بويىنشا اشىق پىكىرتالاس بولدى - ءتۇرلى پىكىر بولدى. ازاماتتاردىڭ ءبىر بولىگى وزگەرىس ەنگىزۋگە جاقسى باعا بەردى, ال كوپشىلىك وزگەرىسكە قارسى. سونداي-اق, مەملەكەتتىك ءتىلدىڭ ءرولىن كۇشەيتۋ مەن اعىلشىن تىلىنە رەسمي ستاتۋس بەرۋ جانە ەتنيكالىق قازاقتاردى قابىلداۋ ءتارتىبىن جەڭىلدەتۋ بويىنشا ۇسىنىستار بولدى", - دەپ اتاپ ءوتتى ول. جۇمىس توبىنىڭ باسشىسى بۇگىن بۇكىلحالىقتىق تالقىلاۋ قورىتىندىلارى ەسكەرىلگەن كونستيتۋتسياعا وزگەرىس ەنگىزۋ جوباسى پرەزيدەنتتىڭ قاراۋىنا بەرىلەتىنىن ايتتى.