الەمدى مەيىرىمگە تولتىرۋ – ادامزاتتىڭ ءوز قولىندا

«بوبەك» ۇلتتىق عىلىمي-پراكتيكالىق, ءبىلىم بەرۋ جانە ساۋىقتىرۋ ورتالىعىندا «ءوزىن-ءوزى تانۋ» رۋحاني-ادامگەرشىلىك ءبىلىم بەرۋ باعدارلاماسىنىڭ اۆتورى سارا نازارباەۆا «ءوزىن-ءوزى تانۋ» ادامنىڭ ۇيلەسىمدى دامۋى گۋمانيتارلىق كوللەدجىنىڭ ءبىتىرۋشى تۇلەكتەرىمەن كەزدەستى. وسكەلەڭ ۇرپاقتىڭ رۋحاني-ادامگەرشىلىگى مول ازامات رەتىندە قالىپتاسۋىنا ەرەن ەڭبەك ءسىڭىرىپ كەلە جاتقان «بوبەك» قورىنىڭ تورايىمىمەن وتكەن كەزدەسۋ تاعىلىمدى, تاربيەلىك ماڭىزى زور, يگىلىكتى شارا بولدى. كەزدەسۋ سارا الپىس­قىزى­نىڭ سۇيىسپەن­شىلىك ساباعىنان باستالدى. جينالعان كوپ­شىلىك ءوزىنىڭ اينالاسىنداعى جاقىن­دارىنا, شاكىرتتەرىنە, بالالارى مەن اعايىن-تۋىسىنا قالاي مەيىرىمدى, شاپاعاتتى بولۋدىڭ ۇلگىسىن كورسەتەتىنى انىق. ويتكەنى, بۇل باسقوسۋدا سونداي ۇيلەسىم سالتانات قۇردى. تاربيەنىڭ باستاۋ­ى ادامنىڭ ءبىر-بىرىنە دەگەن مەيىرىمدىلىك پەن سۇيىسپەنشىلىك قارىم-قاتىناسىنان تۇرادى. كوللەدج تۇلەكتەرى وزدەرىنىڭ جادىندا ماڭگىگە ساقتالاتىن مۇنداي ماعىنالى كەزدەسۋلەردىڭ ءوز ءتاجى­ريبەلەرىنە قاجەتتىگىن, بولاشاقتا وسى تاعىلىمداردى پايدالاناتىندارىن جەتكىزدى. – «ءوزىن-ءوزى تانۋ» اتتى رۋحاني-ادامگەر­شىلىك ءبىلىم بەرۋ يدەياسى قوعامنىڭ دامۋىنا ەڭ قاجەتتى باعدارلاما دەسەك ارتىق ەمەس, – دەدى كەزدەسۋدە سارا الپىسقىزى. – الەمدى مەيىرىمگە تولتىرۋ – ادام­زاتتىڭ ءوز قولىندا. ول ءۇشىن ءبىر-بىرىمىزگە مەيىرىمدى بولىپ, جان جىلۋىمىزدى اياماۋىمىز كەرەك. جۇرەكتەن شىققان جىلى ءسوز جۇرەككە جەتەتىنى ءسوزسىز. ەرتەرەكتە اجەلەرىمىز: «ءومىر­گە ادام بولىپ كەلگەن سوڭ, ادام بولىپ قالۋىمىز كەرەك», – دەپ ءجيى ايتىپ وتىراتىن. سول دالا اكادەميكتەرى سالىپ كەتكەن سارا جولدى قاراپ وتى­رىپ, ءوزارا تۇسىنىستىك, ادامي قاسيەت, سۇيىسپەنشىلىك, مەيىرىم مەن قايىرىم ادام بويىنداعى ەڭ اسىل قاسيەتتەر ەكەندىگىنە, سول قاسيەتتەردى ادام وزىنەن ىزدەۋىنەن باستاۋ الاتىنىنا كوز جەتكىزەسىڭ. ال ءبارىنىڭ باستاۋى – ماحاببات, ادامزاتقا دەگەن سۇيىسپەنشىلىك. ءوزىن-ءوزى تانۋ ءپانىنىڭ ماقساتى دا سول. سونداي-اق, كوللەدج تۇلەك­تەرى وزدەرىنىڭ ەڭبەك جولىندا جالپى­ادامزاتتىق قۇندى­لىقتار مەن رۋحاني ادامگەرشىلىك قاسيەت ۇندە­س­تىك تاپقان وسى ورتادان العان ءبىلىمنىڭ ۇلكەن ومىرلىك ازىق بولعا­نىن تەبىرەنە باياندادى. قا­زىرگى زامان تالابى ىزگىلىكتى ۇرپاق تاربيەلەۋ بولسا, جاس بۋىننىڭ تاۋەلسىز, ەركىن ويلى ازامات بولىپ وسۋىنە ءوزىن-ءوزى تانۋ ءپانىنىڭ بەرەرى مول. اتالمىش كوللەدجدە ءبىلىم نارىمەن سۋسىنداعان تۇلەكتەر جان­نا جۇكەشباەۆا, ايدانا سوۆەتباەۆا, ماقپال يۋسۋپوۆا, ولجاس وسپانوۆ, ايدا ماناپ, ساۋلەتحان جۇمابەك, داۋلەت تىلەگەن, انار سەرىكوۆا بۇگىن­دە جاس تا بولسا ءوز سالا­سىنىڭ ۇزدىك ماماندارى اتانىپ, رەس­پۋب­ليكالىق, وبلىستىق دارەجەدەگى ءارتۇرلى شارالارعا بەلسەنە اتسالىسۋدا, ءتۇرلى دەڭگەيدەگى ماراپاتتاردان دا قۇرالاقان ەمەس. كوللەدج تۇلەگى, ى.التىن­سارين اتىنداعى №159 مەكتەپ-گيمنازيانىڭ «ءوزىن-ءوزى تانۋ» ءپانىنىڭ وقىتۋشىسى مايرا تولە­گەن «ءوزىن-ءوزى تانۋ» ءپانى تالاي شاكىرتتىڭ جۇرەگىنە نۇر سىيلاپ, مەيىرىم شاپاعاتىنا, سۇيىسپەنشىلىككە بولەگەنىن ايتتى. «اتالمىش ءپاندى وقىتۋ بارىسىندا وقۋشىلاردىڭ وزىنە دەگەن سەنىمىنىڭ قالاي پايدا بولاتىنىنا كۋا بولدىم. جەكە تۇلعا رەتىندە قالىپتاسقىسى كەلەتىن كەز كەلگەن ءجاسوسپىرىم ەركىندىكتى, تاۋەلسىزدىكتى سۇيەدى. ولارمەن تەڭ دارەجەدە سويلەسە وتىرىپ, وسى ساباق­تىڭ ارقاسىندا شاكىرتتەر ار­ماندارىنىڭ سون­­شالىقتى اس­قاق ەكەنىنە كوزىم جەتتى. ءبىز وسى اسقاق ارماندارعا ءوزىمىزدىڭ دۇ­رىس باعىتىمىز ار­قىلى قانات ءبى­تىرۋگە ءتيىسپىز», – دەدى مايرا تولەگەن. بۇگىنگە دەيىن كوللەدجدەن تالاي تۇلەكتەر قانات قاعىپ, بولاشاققا اتتاندى. ولار ەندى ءوز شاكىرتتەرىن تاربيەلەپ, تۋعان حالقى ءۇشىن ەڭبەك ەتۋدە, سونىمەن قاتار, ءتۇرلى دودالاردا ءوز ءبىلىم­دەرى مەن مۇمكىندىكتەرىن سىناۋدا. ولاردىڭ اراسىندا ۇزدىك شىعىپ, بايگە الىپ جاتقاندارى دا از ەمەس. ماسەلەن, الماتى قالاسى №3 جببم باستاۋىش سىنىپ مۇعالىمى ماقپال يۋسۋپوۆا «جىلدىڭ ۇزدىك مۇعالىمى - 2016» اتانسا, الماتى وبلىسى, جامبىل اۋدانى, ىنتىماق اۋىلىنداعى ىنتىماق ورتا مەكتەبىندە ەڭبەك ەتىپ جاتقان رىسبيكە اداي اۋدان­دىق «ۇزدىك جاس مامان» باي­قاۋىندا جۇلدەگەر اتانعان. ال جامبىل وبلىسى, شۋ اۋدانى, دالاقاينار اۋىلىنداعى ت.ءاشىم­باەۆ اتىنداعى ورتا مەك­تەپ­تىڭ مۇعالىمى ءابۋتالى ماع­جان «ءوزىن-ءوزى تانۋ» پانىنەن مۇعا­لىم­­دەر اراسىندا وتكەن اۋداندىق وليم­­پيادادا ءى ورىندى جەڭىپ الدى. ءبىر ايتا كەتەرلىگى, كەزدەسۋ بارىسىندا ەرەكشە باستاما كوتەرىلىپ, تۇلەكتەر قاۋىم­داستىعى قۇرىلدى. بۇل قۇرىلعان قاۋىم­داستىق الداعى ۋاقىتتا كوپتەگەن يگىلىكتى ىستەردىڭ اتقا­رىلۋىنا ۇيىتقى بولماق. مەملەكەتتىڭ تۇپقازىعى – جاس­تار بولعان­دىقتان ولاردان اعا بۋىننىڭ كۇتەر ءۇمىتى زور ەكەندىگىنە, جاقسى شاكىرت تاربيەلەۋ – ۇستاز مىندەتى ەكەن­دىگىنە ەكپىن تۇسىرە, ءسوزىن قورىت­قان سارا الپىسقىزى كەزدەسۋ قوناقتارىنىڭ ەڭبەكتەرىنە جەمىس تىلەدى. تاعىلىمدى كەش ادەمى ءان, ايشىقتى بيگە ۇلاسىپ, جينال­عاندارعا ۇمىتىلماستاي اسەر قالدىردى. گۇلزەينەپ سادىرقىزى, «ەگەمەن قازاقستان» الماتى