لەنين تاۋەلسىزدىككە جول بەرە مە؟

«قوشتاسۋدىڭ قيىنى-اي» دەگەن سياقتى, پاۆ­لوداردىڭ كەڭەستىك كەزەڭمەن قوشتاسۋى دا ۇزاققا سوزىلىپ بارادى. كوممۋنيزمنىڭ ەلەسى ءالى ءجۇر. وبلىس پەن شاھاردىڭ اتىن اۋىستىرۋدى ايتپاي-اق قويالىق, ەلىمىزدىڭ تاۋەلسىزدىك العانىنا شيرەك عاسىر ۋاقىت بولسا دا قالاداعى كوشەلەر اتاۋى ءباز-باياعى قالپىندا, ءارىسى رەسەي, بەرىسى رەۆوليۋتسيو­نەر تۇلعالاردىڭ اتىندا. ارينە, ايتىسىپ-تارتىسىپ ءجۇرىپ ساناۋلى كوشە قازاق قايراتكەرلەرىنىڭ ەسىمدەرىن يەلەندى. بىلتىر وبلىستىق ونوماستيكالىق كوميسسيانىڭ شەشىمىمەن ءاليا مەن مانشۇككە, باۋىرجان اتامىزعا 8-9 كوشە اتاۋلارى بۇيىردى. ارينە, قا­لادان ەمەس, اۋىلداردان. بوگا­­تىر اۋىل­ىنداعى رازين كوشە­سىنە, ماي­تۇبەك اۋىلىنداعى لەنين كو­شە­سىنە, ميحايلوۆكا اۋىلىن­داعى سوۆەتسكايا كوشە­سىنە, اقسۋ قالاسىن­داعى تسارەۆ كوشە­سىنە باۋىرجان مومىش­ ۇلىنىڭ ەسىمى بەرىلدى. ەندى بوگاتىر اۋىلىنداعى پۋگا­چەۆ كوشەسى, الاكول اۋىلىنداعى لە­نين كوشەسى, جەلەزين اۋىلىنداعى سادوۆايا كوشەسى, تسەركوۆنايا اۋىلىن­داعى نوۆايا كوشەسى, اقسۋ قالاسىنداعى كەڭەستەر كوشەسى ءاليا مولداعۇلوۆا اتىمەن اتالادى. اقسۋ قالاسىنداعى ەنتۋزياستار كوشەسى مانشۇك مامەتوۆا بولىپ وزگەرتىلدى. وسىلايشا, شالعايداعى اۋىلدارداعى كوشەلەر قازاقتىڭ قاھار­مان پەرزەنتتەرىنىڭ ەسىمدەرىن يەلەندى. كەرەكۋ وڭىرىندەگى ونوماستيكالىق احۋال ايتىلۋداي-اق ايتىلىپ, جازى­لۋداي-اق جازىلىپ جاتىر عوي. مى­سالى, پاۆلودار قالاسىنداعى سۋۆو­روۆ كوشەسىن ولجاباي باتىردىڭ داڭقتى ەسىمىمەن اتاۋ كەرەك دەپ ايتى­لىپ كەلە جاتقالى قاشان. بىراق, ناتيجە شامالى بولىپ تۇر. باستى­سى, تاۋەلسىزدىك توڭىرەگىندەگى, مەملە­كەتتىلىك ماسەلەسىندەگى ناسيحات جۇ­مىسى كەمشىن ءتۇسىپ جاتقانداي. ءايت­پەسە, تاۋەلسىز ەلدەگى كوشە اتاۋلارىنا دەيىن مەملەكەتتىك مۇددەمەن استاسىپ جاتۋى ءتيىس قوي. ايتپاقشى, جۋىردا وبلىس اكىمىنىڭ ەسەپتى كەزدەسۋىندە قالانىڭ قۇرمەتتى ازاماتى ەۆگەني ازاروۆ كوڭىلگە قو­ناتىن ۇسىنىس جاسادى: – بۇگىندە شاھاردان سىرتقارى شىعاتىن جولداردىڭ دەنى استاناعا قاراي باعىتتالعان. سوندىقتان وبلىس ورتالىعىنىڭ باستى, ورتالىق كۋتۋزوۆ كوشەسىن ەلوردانىڭ قۇر­مەتىنە استانا كوشەسى, ال لەنين كو­شە­سىنە تاۋەلسىزدىكتىڭ 25 جىلدىعى اتاۋىن بەرسەك دۇرىس بولار ەدى, – دەدى. ازاروۆ ايتۋىن ايتتى-اۋ, ايتسە دە, تولىقتاي شەشىم قابىلدانبايىنشا كوڭىل شىركىن سەنبەيدى عوي. بۇل ۇسىنىس تا ساعىزشا سوزىلىپ كەتپەسە جارار ەدى. كەلمەسكە كەتكەن قوعامنىڭ كوسەمى تاۋەلسىزدىككە جۋىق ارادا جول بەرە قويار ما ەكەن؟ فاريدا بىقاي, «ەگەمەن قازاقستان» پاۆلودار