قازاق ءتىلىن قانشالىقتى بىلەسىز؟

ورال قالاسىندا 330 ادام «قازتەست» سىناعىنان ءوتتى. ءدال وسى كۇندەرى باتىس قازاقستان وبلىسىنىڭ تەرەكتى, ءبورىلى جانە شىڭعىرلاۋ اۋداندارىندا تاعى 2000 ادام مەملەكەتتىك ءتىلدى مەڭگەرۋ دەڭگەيىن باعالاۋ جۇيەسىنە ساي ارنايى تەست تاپسىرىپ جاتىر. – 2020 جىلى قازاقستان رەسپۋبليكاسى ازاماتتارىنىڭ 90%-ى «قازتەست» تاپسىرىپ, مەملەكەتتىك ءتىلدى مەڭگەرگەنىن كورسەتۋى كەرەك, – دەيدى باتىس قازاقستان وبلىستىق تىلدەردى دامىتۋ باسقارماسىنىڭ باسشىسى ماحامبەت يحسانعالي. بۇل – ءماجبۇرلى شارا ەمەس, ازىرگە ەرىكتى ءىس. مەملەكەتتىك ءتىلدى مەڭگەرۋ دارەجەسى 5 توپقا بولىنگەن. تەستىنى العاش تاپسىرۋشى اۋەلى دياگنوستيكالىق سىناقتان ءوتىپ, ءوزىنىڭ ءتىل مەڭگەرۋ دەڭگەيىن انىقتايدى. كەيىن تەستى قايتا تاپسىرىپ, ءوز دەڭگەيىنە سايكەس سەرتيفيكات الا الادى. بولا­شاقتا «قازتەست» سەرتيفيكاتىنسىز قىزمەتكە الىنبايتىن لاۋا­زىمدار ءتىزىمى ۇكىمەتتە ازىرلەنىپ جاتىر ەكەن. – سىناقتى قازاقستان رەسپۋبليكاسى ءبىلىم ءجا­نە عىلىم مينيسترلىگى تەستىلەۋ ورتالىعىنىڭ ماماندارى الادى. ءبىز ۇيىمداستىرۋ ماسەلەلەرى جاعىنان كومەكشىمىز. جىل سوڭىنا دەيىن وبلىستا 10 مىڭ ادام «قازتەست» سىناعىنان ءوتۋى جوس­پار­لانعان, – دەيدى ماحامبەت يحسان­عالي. – «قازاقستان-ورال» تەلەارناسىنىڭ 70 قىزمەتكەرى «قازتەست» سىناعىن تاپسىردىق. سىناق ناتيجەسى 1 ايدىڭ ىشىندە دايىن بولادى ەكەن. سۇراقتار وزىمە قيىن بولعان جوق. اۋديوساۋالدار دا بار. ەكى جارىم ساعات ىشىندە 150 سۇراقتىڭ دۇرىس جاۋابىن بەلگىلەپ شىقتىق, – دەيدى رەداكتور لۇقپان ەلەۋ. ءتىل سىناعىن تاپسىرعانداردىڭ اراسىندا باتىس قازاقستان وبلىسى بويىنشا «حالىققا قىزمەت كورسەتۋ ور­تا­لىعى» دەپارتامەنتىنىڭ دە 70 مامانى بار. ورتالىقتىڭ قۇجاتتامالىق جانە قۇقىقتىق قامتاماسىز ەتۋ ءبولى­مىنىڭ قىزمەتكەرى جانسۇلۋ مۇسا­قۇلوۆا وتكەن جىلدىڭ سوڭىندا 216 مامان وسىنداي تەست تاپسىرعانىن, الداعى ماۋسىم ايىندا ولار دياگنوستيكالىق سىناقتا كورسەتكەن دەڭ­گەيىن قايتا قورعاپ, سەرتي­فيكات الاتىنىن جەت­كىزدى. قازبەك قۇتتىمۇرات ۇلى, «ەگەمەن قازاقستان» ورال