بولاشاقپەن جالعايتىن كوپىر

مەملەكەت باسشىسى قا­زاقستان حالقىنا جولداۋى ارقىلى ەندى ەلى­مىزدىڭ ءۇشىنشى جاڭعىرۋى باستالعانىن الەم جۇرتشىلىعىنا جاريا ەتتى. بۇل جاڭعىرۋ «قازاقستان-2050» ستراتەگياسىنىڭ ماقساتتارىنا باستايتىن سەنىمدى كوپىر بولماق. ەلباسىمىز وسىعان بايلانىستى بەس نەگىزگى باسىمدىقتى اتادى. «ولار ەكونوميكانىڭ الەمدىك ءوسىمىنىڭ ورتا دەڭگەيدەن جوعارى قارقىنىن قامتاماسىز ەتۋگە جانە 30 وزىق ەلدىڭ قاتارىنا قاراي تۇراقتى تۇردە ىلگەرىلەۋگە لايىقتالعان», دەدى پرەزيدەنت. جولداۋمەن مۇقيات تانىسىپ شىققان ادام ءۇشىنشى جاڭعىرۋدىڭ قازاقستان حالقى مەن ەل ەكونوميكاسىنىڭ دامۋىنا ەرەكشە سەرپىن بەرەتىنىن بىردەن بايقايدى. مىسالى, تۇراقتى ەكونوميكالىق دامۋ ىشكى جالپى ءونىمنىڭ ءوسۋىن قامتاماسىز ەتەدى. ءوز كەزەگىندە ول ەلىمىزدى الەمدەگى دامىعان مەملەكەتتەر توبىنا قوسىلۋىن جاقىنداتا تۇسەدى. ءسويتىپ, ەكونوميكالىق ءوسىمنىڭ جاڭا مودەلىن ەنگىزۋ ارقىلى ەڭبەك ونىمدىلىگى 2020 جىلعا قاراي 1,3 ەسەگە ارتادى. ەلباسىمىز جاڭا ەۋرازيالىق لوگيس­تي­كالىق ينفراقۇرىلىمدى دامىتۋ ماڭىزدى باسىمدىقتاردىڭ ءبىرى ەكەنىنە دە توقتالدى. الەمدىك ساۋدا ورتالىقتارى بويىنشا بىرىڭعاي لوگيستيكالىق جەلىلەر قۇرۋ قازاقستان اۋماعى ارقىلى جۇك تاسىمالىن ەسەلەپ ارتتىرادى. جا­قىن جىلدارى ونىڭ جالپى كولەمى كەم دەگەن­دە 20 ميلليون تونناعا جەتپەك. دامىعان مەملەكەتتەردە شاعىن جانە ورتا كاسىپكەرلىك ەل ەكونوميكاسىنىڭ تىرەگى سانالادى. بولاشاقتا ءبىزدىڭ ەلى­مىزدە دە شاعىن جانە ورتا بيزنەستىڭ وركەندەيتىنىنە سەنىمىمىز مول. مەملەكەت باسشىسى وسى ماسەلەگە بايلانىستى: «ءبىزدىڭ ستراتەگيالىق ماقساتتارىمىزدىڭ ءبىرى – ەلدىڭ ىشكى جالپى ونىمىندەگى شاعىن جانە ورتا بيزنەستىڭ ۇلەسى 2050 جىلعا قاراي كەم دەگەندە 50 پا­يىز بولۋىن قامتاماسىز ەتۋ», دەدى. پرەزيدەنتىمىز شاعىن جانە ورتا بيزنەستى دامىتۋعا باستاپقى كەزدەن-اق ەرەكشە نازار اۋدارىپ كەلەدى. ەندى, مىنە, بۇل ماسەلە الدىڭعى كەزەكتە قولعا الىناتىن ىستەردىڭ بىرىنە اينالاتىن بولادى. سونىڭ ناقتى دالەلى رەتىندە بۇدان بىلاي قازاقستان ازاماتتارى بيزنەسىن جۇرگىزۋ ءۇشىن اۋىلدا دا, قالادا دا 16 ميلليون تەڭگەگە دەيىن نەسيە الۋلارىنا مۇمكىندىك جاسالىپ وتىرعاندىعىن اتار ەدىك. مۇنى بارشا قازاقستاندىق, ونىڭ ىشىندە شاعىن بيزنەسپەن اينالىسقىسى كەلەتىندەر وزدەرىنە كورسەتىلگەن شىنايى قولداۋ دەپ قابىلداعانى انىق. جولداۋدا ءتورتىنشى باسىمدىق رەتىن­دە ادامي كاپيتال ساپاسىن جاقسارتۋ ماسەلەسى اتالعان. ەڭ الدىمەن, ءبىلىم بەرۋ جۇيەسىنىڭ اتقاراتىن ءرولى وزگەرۋى ءتيىس. ويتكەنى, بۇگىندە الدىمىزعا ءبىلىم بەرۋدى ەكونوميكالىق ءوسۋدىڭ جاڭا مودەلىنىڭ ورتالىق بۋىنىنا اينالدىرۋ مىندەتى قويىلىپ وتىر. الداعى ۋاقىتتا وقىتۋ باعدارلامالارى وقۋشىلاردىڭ ءوز بەتىمەن ىزدەنۋ داعدىلارىن دامىتۋعا قاراي باعىتتالماق. راس, اعىلشىن ءتىلى – جاڭا تەحنولوگيا, جاڭا يندۋستريا جانە جاڭا ەكونوميكا ءتىلى. بۇدان بىزدەر دە شەت قالا المايمىز. ونىڭ ۇستىنە, بۇگىندە اقپاراتتاردىڭ 90 پايىزى اعىلشىن تىلىندە جاريالانادى ەكەن. جالپى, ءۇشىنشى جاڭعىرۋدى ەلى­مىز­دى قازىرگىدەن دە بيىك بەلەستەردى با­عىندىرۋعا باستايتىن جول دەپ قابىل­داعا­نىمىز ءجون. ال وعان جەتۋ, ونى ب­اعىن­دىرۋ بارلىعىمىزدان جۇدىرىقتاي جۇ­مىلىپ ەڭبەك ەتۋدى قاجەت ەتەدى. كارىباي قوجاعۇل, ۇيعىر اۋداندىق ءماسليحاتىنىڭ دەپۋتاتى الماتى وبلىسى