رەكتورلار كەڭەسىنىڭ بايىپتاماسى

قۇرامىنا ەلىمىزدىڭ تاڭداۋلى ۇلتتىق, مەملەكەتتىك, اكتسيونەرلىك مارتەبەدەگى 41 ۋنيۆەرسيتەتى ەنەتىن رەسپۋبليكالىق رەكتورلار كەڭەسىنىڭ كەزەكتى ماجىلىسىندە ەلباسىنىڭ ءۇشىنشى جاڭعىرۋ تۋرالى حالىققا جولداۋى اياسىنداعى ءبىلىم جانە عىلىم ماسەلەسى تالقىلاندى. كەڭەس جۇمىسىن اشقان ءبىلىم جانە عىلىم ءمينيسترى ەرلان ساعاديەۆ جوعارى وقۋ ورىندارى الدىندا تۇرعان ماقسات-مىندەتتەردى جۇيەلەپ ايتىپ ءوتتى. سالا باسشىسى سەرپىندى تەحنولوگيالىق جاڭ­عىرۋ ۇدەرىسىندە رەكتورلار مەن جەتەكشى عالىمدار جاۋاپكەرشىلىگىنە دە توقتالدى. سونداي-اق, ساياساتتانۋشى ماماندار مەن عىلىمي ورتالىقتاردىڭ رەفورمالار ءمانىن تۇسىندىرۋدەگى ءرولىن باسشىلاردىڭ قاپەرىنە سالدى. اتالعان كەڭەس توراعاسى, ل.ن.گۋمي­لەۆ اتىنداعى ەۋرازيا ۇلتتىق ۋنيۆەر­سيتەتىنىڭ رەكتورى ەرلان سىدىقوۆ ار­نايى بايانداماسىندا: «مەملەكەت باسشىسىنىڭ جاڭا بەلەسىمىزدى انىق­تايتىن جولداۋى قوعامنىڭ بار سالاسىنا, سونىڭ ىشىندە اسىرەسە جوعارى ءبىلىم سالاسىنا زور قوز­عاۋ سالىپ وتىر. ويتكەنى, ءبىر سالاعا دا جاۋاپتى ازاماتتار – بىلىكتى دە ءبىلىمدى مامان­دار. كەشە عانا ۇلتتىق عىلىم اكا­دەمياسىنىڭ مە­رەيتويىنا بايلانىس­تى وتكەن سالتاناتتى جيىندا ەلباسى عىلىم­عا تىڭ كۇش قوسۋ مەن زەردەسى جوعارى عا­لىم­­دار شوعىرىن قالىپتاستىرۋدىڭ ما­ڭى­زىنا ايرىقشا توقتالدى. نۇرسۇلتان نازارباەۆتىڭ «عالىمدار ءداۋىر سۇرا­نى­سىنا ساي ءوز دۇنيەتانىمىن, عى­لى­مي قوزقاراسىن قايتا قاراۋى كەرەك» دەگەن تاپسىرماسى جولداۋداعى نەگىزىگى تۇجىرىمدامالاردىڭ ءمانىن ايقىنداي تۇسەدى», دەپ اتاپ كورسەتتى. مۇنان كەيىن سويلەگەن ءبىلىم جانە عىلىم مينيسترلىگى جوعارى جانە جوو-دان كەيىنگى ءبىلىم دەپارتامەنتىنىڭ ديرەكتورى دارحان احمەد-زاكي, سترا­تەگيالىق جوسپارلاۋ جانە ۇيلەستىرۋ دەپارتامەنتىنىڭ ديرەكتورى نۇرگۇل شامشيەۆا, ۇلتتىق تەستىلەۋ ورتالى­عىنىڭ ديرەكتورى رامازان الىمقۇلوۆ جاڭا تالاپ اياسىنداعى ءوز سالالارىنىڭ جۇمىس جوسپارلارىمەن, يگىلىكتى باستامالارىمەن جانە كەڭەسىپ شەشەتىن ورتاق ماسەلەلەرمەن تانىستىردى. بۇل رەتتە سالا دامۋىنداعى تىڭ ءوز­گەرىس­تەرگە ىقپال ەتەتىن باسقارۋ مەن اكا­­دە­­ميا­لىق ەركىندىك جايى, سترا­تەگيا­لىق جوس­پارلاۋ ەرەكشەلىگى, ۋنيۆەرسيتەت جا­ع­دايىنداعى ىرگەلى عىلىم مەن قول­دانبالى عىلىمدى دامىتۋ ءمانى, وقۋعا قابىلداۋ مەن قاجەتتى ماماندار دايار­لاۋدىڭ ءتيىمدى جولدارى جان-جاقتى ءسوز بولدى. تالقىلاۋعا قاتىسقان رەكتورلار ەل­با­سىنىڭ جولداۋىن, سونداي-اق كە­شەگى ۇلتتىق عىلىم اكادەمياسىنىڭ 70 جىلدىق سالتاناتىندا سويلەگەن ءسو­زىن زور كاسىبي جاۋاپكەرشىلىكپەن قابىل­داعاندارىن جانە ايقىندالعان ماڭىزدى عىلىم-ءبىلىم مىندەتتەرىن جۇزەگە اسىرۋ بويىنشا ءىس-شارالار جوسپارىن قۇرىپ, ورىنداۋعا كىرىسىپ كەتكەندەرىن مالىمدەدى. ءلايلا ەدىلقىزى, «ەگەمەن قازاقستان» استانا