جەمقورلىقپەن كۇرەسكە ءدىن وكىلدەرى اتسالىسادى

جەمقورلىقپەن كۇرەسكە ءدىن وكىلدەرى مەن قوعامدىق ۇيىمدار دا اتسالىسادى, دەپ جازادى حابار24. بۇل جايىندا «جەمقورلىققا جاپپاي قارسىلىقتى قالىپتاستىرۋدا رۋحانيات پەن ادامگەرشىلىك» اتتى دوڭگەلەك ۇستەلدە ايتىلدى. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى بۇل باستامانىڭ ناتيجە بەرەتىنىنەن ءۇمىتتى. ەلىمىزدە 3 جارىم مىڭعا جۋىق ءدىني بىرلەستىك بار. ال مەشىتتەر سانى 2,5 مىڭعا جەتكەن. اگەنتتىك قىزمەتكەرلەرىنىڭ ايتۋىنشا, جەڭ ۇشىنان جالعاسقان جەمقورلىقتىڭ زيانىن حالىققا ءدىني تۇرعىدان ءتۇسىندىرۋ كەرەك. وسىلايشا مەملەكەت دامۋىن تەجەيتىن اۋىر كەسەلدىڭ تامىرىنا بالتا شابۋعا بولادى, دەيدى ماماندار. "بۇگىنگى وتىرىستان كەيىن, مەنىڭ ويىمشا, ءبىر قۇجات قابىلدانىپ, ول ءدىني بىرلەستىكتەر ارقىلى, ءدىن ماسەلەسىمەن اينالىساتىن مينيسترلىك, اگەنتتىك بار سولار ارقىلى حالىقپەن جۇمىس ىستەلەدى", - دەيدى قر پارلامەنتى ءماجىلىسىنىڭ دەپۋتاتى ەرسۇلتان بەكتۇرعانوۆ. "جەمقورلىققا قاتىستى قاسيەتتى قۇراندا ايتىلعان, پايعامبارىمىزدىڭ حاديستەرىندە قاتتى ەسكەرتىلگەن. جالپى ءبىزدىڭ دىنىمىزدە حارام دەپ بەلگىلەنگەن. ياعني ۇلكەن كۇناعا جاتادى. پارا بەرۋشى دە, پارا الۋشى دا, ورتاداعى ادام دا. يسلام ءدىنى ونى قارالايدى. تىيىم سالادى", - دەيدى استانا قالاسىنىڭ باس يمامى ناۋرىزباي تاعان ۇلى.