بۇل – كوكەيگە قونىمدى ەتىپ شەشۋگە قوسىمشا مۇمكىندىك

پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ 20 اقپان كۇنگى ۇكىمەت ساعاتىندا ءبىلىم جانە عىلىم ءمينيسترى ەرلان ساعاديەۆكە سۇراق قويعان بولاتىن. وندا تومەندەگى ماسەلە كوتەرىلىپ, بىلاي دەلىنگەن ەدى: «اعىلشىن ءتىلىن مەڭگەرمەي, قازاقستان جالپىۇلتتىق پروگ­رەسكە جەتە المايتىنى ەلباسى جولداۋىندا ايقىن ايتىلدى. زامان كوشىنە ىلەسۋدىڭ ەندى بۇدان باسقا جولى جوق. سونىمەن بىرگە, جولداۋداعى ءار سوزگە زەر سالىپ قاراساق, پرەزيدەنت وسى جونىندە دە كەڭىنەن ويلاسۋعا مۇمكىندىك بەرگەنىن كورەمىز. «بۇل ماسەلەنى تياناقتى ويلانىپ, اقىلمەن شەشۋ كەرەك», دەدى ەلباسى. جولداۋدا اعىلشىن ءتىلىن ەن­گى­زۋ­گە ءار مەكتەپتىڭ دايىن­دىعىن سارا­لاۋعا دەيىن ايتىل­عان. «مەك­تەپتەردىڭ جانە مۇعا­لىم­دەردىڭ دەڭگەيى, اسىرەسە, اۋىل مەن قالادا ءارتۇرلى. بىلىكتى پەداگوگتاردىڭ جەتىسپەۋ پروبلەماسى دا بار. سوندىقتان, وسىنىڭ بارلىعىن ەسكەرىپ, اعىلشىن ءتىلىن كەزەڭ-كەزەڭىمەن ەنگىزۋىمىز كەرەك», دەلىنگەن وندا. مۇندا بارلىعى دا – مەكتەپتەردىڭ دەڭگەيى دە, مۇعالىمدەردىڭ دەڭگەيى دە, اۋىل مەن قالا مەكتەپتەرى دەڭگەيىنىڭ ايىرماسى دا ەسكەرىلىپ تۇر. بارلىعىن ەسكەرگەندىكتەن دە پرەزيدەنت جول­داۋدا وسى ماسەلە بويىنشا «ءتيىستى ۇسىنىستار بەرۋدى تاپسىرامىن» دەپ قاداپ تۇ­رىپ ايتتى. بۇدان ارتىق نە كەرەك؟ زامان ءۇشىن, قوعام ءۇشىن, ادام ءۇشىن اسا ماڭىزدى ماسەلەنى كو­كەي­گە قونىمدى ەتىپ شەشۋ ءۇشىن قوسىم­شا مۇمكىندىك بەرىلىپ تۇرعان جوق پا؟ پرەزيدەنت تاپسىرماسىنا وراي ءسىز باسقاراتىن مينيسترلىك وسى ماسەلە, ياعني ءۇش ءتىلدى وقۋ­عا كەزەڭ-كەزەڭىمەن كوشۋدى جۇزە­گە اسىرۋ جونىندە قانداي ناق­تى ۇسىنىستار دايىنداۋدا؟ جول­داۋ­دان كەيىن وسى باعىتتاعى جۇمىس­قا قانداي دا ءبىر وزگەرىس, تۇزەتۋ ەنگىزۋ كوزدەلىپ وتىر ما؟».