بوكسشى ايدوس ەربوسىن ۇلىنىڭ كەلەسى قارسىلاسى بەلگىلى بولدى

قازاقستاندىق كاسىپقوي بوكسشى ايدوس ەربوسىن ۇلىنىڭ (4-0, 4 KO) كەلەسى قارسىلاسى انىقتالدى. بۇل تۋرالى vesti.kz حابارلادى. كاسىپقوي رينگتەگى بەسىنشى كەزدەسۋىن امەريكالىق مايكل ميتچەلگە قارسى 23 ناۋرىزدا اقش-تىڭ نيۋ-يورك قالاسىندا وتكىزەدى. جەكپە-جەك ورتا سالماق دارەجەسىندە وتەدى. ايدوس كاسىبي بوكستا وتكىزگەن ءتورت كەزدەسۋىن دە ۋاقىتىنان بۇرىن جەڭگەن. ونىڭ ەكەۋىن ۋكراينادا, قالعان ەكەۋىن الماتىدا وتكىزدى. سوڭعى رەت شارشى الاڭعا وتكەن جىلدىڭ مامىر ايىندا شىققان. 25 جاستاعى بوكسشى جاركەنت قالاسىندا تۋعان. الماتى قالاسىنا كوشىپ كەلگەننەن كەيىن بوكسپەن 11 جاسىنان باستاپ اينالىسقان. اۋەسقوي بوكستا – قازاقستان چەمپيوناتىنىڭ جۇلدەگەرى. سونىمەن قاتار, «Astana Arlans» ساپىندا شارشى الاڭعا شىققان. ايتا كەتەيىك, نيۋ-يوركتە تاعى ءبىر وتانداسىمىز WBA (Super), IBO, WBC جانە IBF بەلبەۋلەرىنىڭ يەگەرى گەننادي گولوۆكين (36-0, 33 كو)  18 ناۋرىز كۇنى Madison Square Garden ارەناسىندا امەريكالىق دەنيەل دجەيكوبسپەن (32-1, 29 كو) جۇدىرىقتاسادى.