قازاقستاندا بولشەكتىك نارىقتاعى ءدارى-دارمەك باعاسى رەتتەلەتىن بولادى

بۇگىنگى تاڭدا حالىقارالىق تاجىريبە زەرتتەلۋدە جانە «حالىقتىڭ دەنساۋلىعى جانە دەنساۋلىق ساقتاۋ جۇيەسى تۋرالى» قر كودەكسىنە تۇزەتۋلەر پىسىقتالۋدا. بۇل تۋرالى قر ۇكىمەتىندەگى ءباسپاسوز كونفەرەنتسياسىندا قر دەنساۋلىق ساقتاۋ ءمينيسترى ەلجان ءبىرتانوۆ مالىمدەدى. مينيستر ەگەر ءدارى-دارمەكتى ساتىپ الۋ سالاسىندا 2015 جىلدان باستاپ باعا بەلگىلەۋ جۇيەسى تابىستى جۇمىس جاساپ كەلە جاتسا, دەنساۋلىق ساقتاۋ مينيسترلىگىنىڭ بولشەكتىك نارىقتىڭ باعاسىنا اسەر ەتۋگە ەشقانداي وكىلەتتىگى جوق ەكەنىن اتاپ ءوتتى. وسىعان بايلانىستى بولشەك ساۋدادا, ياعني ءدارىحانالاردا ساتىلاتىن ءدارى-دارمەك باعاسى كتمكك قاجەتتىلىكتەرىنە بيۋدجەت قاراجاتىنان ساتىپ الىناتىن ءدارى-دارمەك باعاسىمەن سالىستىرعاندا 3-4 ەسەگە كوتەرىپ جىبەرگەن جاعدايلار ورىن الىپ جاتادى. «حالىقتىڭ دەنساۋلىعى جانە دەنساۋلىق ساقتاۋ جۇيەسى تۋرالى» قر كودەكسىنە وزگەرىستەر ەنگىزگەن سوڭ عانا مەملەكەت بولشەكتىك سەگمەنتتى رەتتەۋگە قۇقىلى بولادى. "بىزگە تەز ارادا ءىس-قيمىل جوسپارىن ازىرلەپ, كاسىپكەرلەرمەن بىرگە بارلىق نيۋانستاردى تالقىلاۋ قاجەت. 2017 جىلدىڭ تامىزىنا قاراي سايكەس زاڭ جوباسىن ازىرلەپ, ۇكىمەتكە ەنگىزۋدى جوسپارلاپ وتىرمىز», – دەپ باسا ايتتى ە. ءبىرتانوۆ. بىرەر كۇن بۇرىن دەنساۋلىق ساقتاۋ مينيسترلىگى وسى ۇلگى تابىستى ەنگىزىلگەن ەلدەردىڭ حالىقارالىق ساراپشىلارى ەنگەن جۇمىس توبىمەن كەزدەسۋ وتكىزدى. ە. ءبىرتانوۆ اتالعان قاجەتتى شارا تاياۋ ارادا قازاقستاندا دا ەنگىزىلەتىنىن ايتتى.