قوس «ەڭبەك ەرى» – قىزىلوردادا

قىزىلورداعا قوس بىردەي «قازاقستاننىڭ ەڭبەك ەرى» كەلدى. «ۇلتتىق عىلىمي كارديوحيرۋرگيالىق ورتالىق» اق ديرەكتورى, پروفەسسور يۋري پيا مەن «ۇلتتىق نەيروحيرۋرگيا ورتالىعى» اق باسقارما توراعاسى, مەديتسينا عىلىمدارىنىڭ دوكتورى, پروفەسسور سەرىك اقشولاقوۆ ايماقتىڭ دەنساۋلىق ساقتاۋ سالاسىنىڭ قىزمەتكەرلەرىمەن كەزدەستى. مەملەكەت باسشىسىنىڭ ۇلت جوسپارى – بەس ينس­تيتۋتتىق رەفورماسىن ءجۇ­زەگە اسىرۋ ماقساتىندا اي­ماققا كەلىپ, «100 ناقتى قادام» اياسىندا ىسكە اساتىن مىندەتتى الەۋمەتتىك مەديتسينالىق ساقتاندىرۋعا بايلانىستى وزدەرىنىڭ وي-پىكىرلەرىمەن بولىسكەن قوس «ەڭبەك ەرى» دەنساۋلىق ساقتاۋ سالاسىنداعى باسقا دا ماسەلەلەر جونىندە ءسوز قوزعادى. سونداي-اق, اتال­عان سالاداعى سوڭعى جاڭا­لىقتارىمەن ءبولىسىپ, مەدي­تسيناداعى الەمدىك ءتاجىري­بەلەردى تىلگە تيەك ەتتى. سا­پار بارىسىندا يۋري پيا 59 جاستاعى قىزىلوردالىق ناۋقاستىڭ جۇرەگىنە اشىق ءارى جاڭاشىل وتا جاسادى. ال سەرىك اقشولاقوۆ 15 ناۋ­قاسقا دارىگەرلىك كەڭەس بەردى. سەرىك اقشولاقوۆ پەن يۋري پيانى قىزىلوردا وبلىسىنىڭ اكىمى قىرىمبەك كوشەرباەۆ ارنايى قابىلداپ, كەزدەستى. – ءبىزدىڭ وبلىسىمىزدا دەنساۋلىق ساقتاۋ سالاسىن دامىتۋ ءۇشىن اۋقىمدى جۇمىستار اتقارىلۋدا. ءوت­كەن جىلى قابىلدانعان مەملەكەتتىك «دەنساۋلىق» باعدارلاماسى اياسىندا 28 ينديكاتورلى كورسەتكىشكە قول جەتكىزۋ ماقساتىندا ايماقتىق جوسپار دايىندالدى. 2016 جىلى ءبىز ورتاشا ءومىر ءسۇرۋ ۇزاقتىعىن 72 جاسقا ۇزارتۋدى ماقسات ەتىپ, ول كورسەتكىشكە قول جەتكىزدىك, – دەدى وبلىس اكىمى. سىر ەلىنە ساپارلاپ كەل­گەن «ەڭبەك ەرلەرىنە» كۇرىش­تەن جاسالعان ءوز پورترەتتەرى ەستەلىككە سىيعا تارتىلدى. كارتينا اۆتورى – سۋرەتشى قايىربەك زاكىروۆ. مارتەبەلى مەيماندار وبلىستىق مەديتسينالىق ورتا­لىقتىڭ بايقوڭىر قا­لا­سىنداعى فيليالىنا, عارىش­كەرلەر مۇراجايى مەن قورقىت اتا مەموريالدىق كەشەنىنە بارىپ, «سويۋز مس» عارىش كەمەسىنىڭ ۇشۋ ءساتىن تاماشالادى. سونداي-اق, ءىىى ينتەرناتسيونال اۋىلىنىڭ تۇرعىندارىمەن كەزدەستى. ەرجان بايتىلەس, «ەگەمەن قازاقستان» قىزىلوردا وبلىسى