وڭىردەگى وركەندى ىستەر

قاراعاندى وبلىسىنىڭ اكىمى نۇرمۇحامبەت ابدىبەكوۆتىڭ حالىق الدىنداعى ەسەپ بەرۋ كەزدەسۋى بولىپ ءوتتى. اتالمىش ءىس-شاراعا قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ پەن پارلامەنت سەناتىنىڭ دەپۋتاتى سەرگەي ەرشوۆ قاتىستى. سونداي-اق, ەڭبەك ارداگەرلەرى, ءماسليحات دەپۋتاتتارى, مەملەكەتتىك ورگانداردىڭ باسشىلارى, قوعامدىق بىرلەستىكتەر مەن اقپارات قۇرالدارىنىڭ وكىلدەرى جينالدى. سەلەكتورلىق رەجىمدە وبلىستىڭ بارلىق اۋداندارى مەن قالالارى قوسىلعان كەزدەسۋ رەسمي سايتىندا جانە فەيسبۋكتەگى «سارىارقا» پاراقشاسىندا ونلاين رەجىمدە العاش رەت جۇرگىزىلدى. القالى جيىندا وتكەن جىلدىڭ وڭ ناتيجەلەرى مەن الدا­عى جوس­پارلى مىندەتتەر جايى كەڭىنەن تال­قىلاندى. قازاقستان ونەركاسىبىنىڭ قا­را شاڭىراعى بولىپ سانا­لا­تىن قاراعاندىنىڭ اتقارۋشى ور­گاندارى مەشىن جىلىندا مە­جە­لەگەن جۇمىستار «قازاق­ستان-2050» ستراتەگياسىندا, بەس ينستيتۋتتىق رەفورمانى ىسكە اسىرۋ جونىندەگى «100 ناقتى قادام» ۇلت جوسپارى مەن قازاقستان حالقىنا جىل سايىن­­­­عى جولداۋلارىندا ەل پرە­زيدەنتى نۇرسۇلتان ءابىش ۇلى نازارباەۆ قويعان مىندەتتەردى شە­شۋگە جانە رەفورمالاردى جال­عاستىرۋعا باعىتتالعان. ايتالىق, تۇرعىن ءۇي قۇرى­لىسى, اگروونەركاسىپ كەشەنىن دامى­تۋ, شاعىن جانە ورتا بيزنەستى قول­داۋ جونىندەگى مەملەكەتتىك باع­دار­لامالاردى ىسكە اسىرۋ ءۇشىن قويىلعان ناقتى مىندەتتەر بىل­تىرعى جىلى ەكونوميكالىق دامۋ­داعى باسىم باعىتتار بولدى. مىسالى, وتكەن جىلى ەكونو­ميكالىق ءوسىم 1,3 پايىزعا قام­تاماسىز ەتىلىپ, ايماقتىڭ جالپى وڭىرلىك ءونىمى 3,3 ترلن تەڭگەنى قۇ­راپتى. بۇل – رەسپۋبليكا بوي­ىنشا 4-ءشى ورىنعا تابان تىرەگەن تولايىم تابىس پەن كولەمدى كورسەت­كىش. ونەركاسىپتە, اۋىل شا­رۋا­شى­لىعىندا, كولىك قىزمەتىندە, تۇرعىن ۇيلەردى پايدالانۋعا بەرۋ, قارجى سالاسى جانە باسقا دا بىرقاتار كورسەتكىشتەر بويىنشا جۇيەلى جۇمىستار اتقارىلعان. ناقتى كورسەتكىشتەر بويىنشا, ورتاشا جالاقى 9,4% پايىزعا وسكەن جانە 123 مىڭ تەڭگەدەن اسقان. ايماق باسشىسى ءمالىم ەت­كەندەي, ءوندىرىسى مەن ونەركاسىبى وركەن جايعان ايماق رەتىندە قاراعاندى 2016 جىلعى ونەر­كاسىپتىك ءوندىرىس كولەمىن 1,9 ترلن تەڭگەگە جەتكىزىپ, 2015 جىلعا قاراعاندا 4,9%-عا ارتتىرعان. ءوڭىردىڭ ورىستەۋىندەگى بىرقاتار كورسەتكىشتەردىڭ وڭ سەر­پىن الۋىن بىلتىرعى جىلعى شى­عارىلعان تاۋارلاردىڭ باسىم بولىگى وڭدەۋ ونەركاسىبىنە تيەسىلى – 1,5 ترلن تەڭگەنى قۇراعاندىعىنان-اق انىق اڭعارۋعا بولادى. سونىمەن بىرگە, 2016 جىلى ايماقتا كاسىپكەرلىكتى دامىتۋ بوي­ىنشا جالپى قۇنى 141 ملرد تەڭگەنى قۇرايتىن 10 جوبا ىسكە قوسىلىپ, مىڭعا تارتا جاڭا جۇمىس ورنى اشىلعان. جىل ىشىندە 141 ملرد تەڭگەنىڭ ونەر­كاسىپتىك ءونىمى شىعارىلسا, بۇل 2015 جىلعى كور­سەتكىشكە قاراعاندا 50 ملرد تەڭ­گەگە ارتىق كورسەتكىش. وبلىستا توقتاپ قالعان 5 كا­سىپورىننىڭ جۇمىسى جان­دان­دى­رىلعاندىعىن دا جىلدىق ەسەپتەن ەستىگەن ەسەلى ەڭبەك دەپ تۇيدىك. نەگىزگى كاپيتالعا تارتىلعان ينۆەستيتسيالار كولەمى 2016 جىلى 315 ملرد تەڭگەنى قۇراپ, بۇل قار­جىنىڭ تورتتەن ءبىر بولىگى وڭدەۋ ونەركاسىبىنە جۇمسالىپتى. ەسەپتى مالىمەتتەر بويىنشا, كەن ءوندىرۋ سالاسىنا تارتىلاتىن ينۆەستيتسيالار – 31,6 پايىزعا, اۋىل شارۋاشىلىعىندا – 25,3 پايىزعا, تۇرعىن ءۇي قۇرىلىسىندا 3 پايىزعا ۇلعايعان. بۇعان مەم­لەكەتتىك قولداۋ شارالارى, «نۇرلى جول» باعدارلاماسى, داعدارىسقا قارسى قابىلدانعان شارالاردى ىسكە اسىرۋ ىقپال ەتكەنى ءسوزسىز. نۇرمۇحامبەت ابدىبەكوۆ ءوز بايانداماسىندا, سونداي-اق, 2017 جىلى 350 ملرد تەڭگە ينۆەستيتسيا تارتۋ مىندەتى العا قويىلىپ وتىرعاندىعىن, ترانسۇلتتىق كوم­پانيالاردى تارتۋ بويىنشا جۇمىستار جالعاساتىندىعىن ءما­لىمدەدى. سۇراق قويۋشىلاردىڭ ىشىندە تەمىرتاۋ تۇرعىنى نايل شاۆالەەۆ ايماق باسشىسىنان وڭ جا­عالاۋدى ەسكى قالامەن باي­لانىستىراتىن كوپىردىڭ قاشان جوندەلەتىنىن سۇ­رادى. ونىڭ ايتۋىنشا, ءۇش جىل­دان بەرى كوپىر مۇلدەم ابات­تاندىرىلماي كەلەدى جانە ناشار جاعدايدا. وبلىس باسشىسى اتالعان كوپىردىڭ جوندەلەتىنىنە سەندىردى. 2017 جىلى تەمىرتاۋدا كولىك جول­دارىن جوندەۋگە 2 ملرد تەڭگە بولىنبەك. «ۇستىمىزدەگى جىلى تەمىر­تاۋ, بالقاش, جەزقازعان سياق­تى ءىرى قا­لالاردا جول ينفرا­قۇرىلىمىنا باسا نازار اۋدارى­لاتىن بولادى. جاقىندا تەمىر­­­تاۋدا قالا اكىمىنىڭ ەسەپ بە­رۋىندە بولدىم. حالىق ال­دىن­دا بايانداما جاسادىق – 2 ملرد تەڭگەگە جۋىق قارجى جول ين­فرا­قۇرىلىمىنا جۇمسالماق. 30 شاقىرىمنان استام اۆتوكولىك جولدارى جوندەلەدى. بۇل كوپىر دە جوندەۋ ايماعىنا ەنەدى», دەدى نۇرمۇحامبەت ابدىبەكوۆ. كەزدەسۋ بارىسىندا اكىمگە حا­لىق تاراپىنان وتىزعا تار­تا سۇراق قويىلدى. سۇراق قويۋشىلاردىڭ بارلىعى دە­رلىك قاناعاتتانارلىق جاۋاپ الدى, سونىمەن قاتار, ءوڭىر باس­شىسىنىڭ جەمىستى جۇمىس­ىنا العىس بىلدىرۋشىلەر دە بولدى. ميراس اسان, «ەگەمەن قازاقستان» قاراعاندى وبلىسى