SMART-تاقيا زاعيپتار ءۇشىن جاسالدى

SMART-تاقيا – اقتاۋلىق وقۋشى ويىنىڭ جەمىسى. اقتاۋ قالاسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ 12 سىنىپ وقۋشىسى ساتتىعالي جولداسوۆ ءبىر ايعا جۋىق ۋاقىت ەڭبەكتەنگەن ءوز تۋىندىسىن كوزى كورمەيتىن جانە ناشار كورەتىن جاندارعا ارنادى. – تاقيادا قاراپايىم ۇيالى تەلەفوننان الىنعان قوزعالىس ەسەپتەگىشى بار. ول دىرىلدەتكىش موتورعا سيگنال بەرەدى. ادام جۇرگەن كەزدە تاقياداعى سەنسورلار الداعى كەدەرگىلەردى قاراپ وتىرادى دا, قانداي دا ءبىر كەدەرگىنى بايقاعاندا SMART-تاقيا دىرىلدەي باستايدى. سودان كەيىن تاقيالى ادام ءتيىستى جاعىنا بۇرىلىپ, قوزعالىس باعىتىن وزگەرتە الادى. جوبا «اردۋينو» ميكروپلاتاسىندا جاسالدى, – دەيدى ساتتىعالي ءوز ىزدەنىسى تۋرالى. جوقتان بار جاساپ, كوزى كورمەيتىن جانە ناشار كورەتىن جاندارعا جاردەم قولىن سوزعىسى كەلگەن وقۋشى ءوز تۋىندىسىنىڭ زاعيپ جاندارعا كومەگى بولسا دەپ ۇمىتتەنەدى. گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى