«قازاق ەلى» انيماتسيالىق ءفيلمى كايرداعى فەستيۆالدە جۇلدە الدى

«قازاق ەلى» انيماتسيالىق ءفيلمى كاير قالاسىندا ءوتىپ جاتقان ونىنشى حالىقارالىق انيماتسيالىق فيلمدەردىڭ فورۋمىنا قاتىسىپ «ەڭ ۇزدىك تولىقمەتراجدى فيلم» جۇلدەسىنە يە بولدى. سونىمەن قاتار, كارتينانىڭ كومپوزيتورى رۋسلان شىنىقۇلوۆ جانە ءفيلمنىڭ اۋەنىن جازۋعا قاتىسقان مۋزىكانت جانبولات ءادىلوۆ قۇرمەت ديپلومدارىمەن ماراپاتتالدى. ەستەرىڭىزگە سالا كەتسەك, قر مادەنيەت جانە سپورت مينيسترلىگى تاپسىرىسى بويىنشا «ساق-دالا» جشس تۇسىرگەن «قازاق ەلى» انيماتسيالىق ءفيلمى وتكەن  جىلى مامىر ايىندا كوپشىلىك نازارىنا ۇسىنىلىپ, كينوتەاترلاردان كورسەتىلگەن بولاتىن. جاسالۋىندا 2D جانە 3D-تەحنولوگيالار پايدالانىلعان اتالمىش تۋىندى بولاشاق حاندار – جانىبەك پەن كەرەيدىڭ بالالىق شاعى مەن ەسەيۋ جىلدارى تۋرالى باياندايدى. ءفيلمنىڭ جارىققا شىعۋىنا اتسالىسقاندار قاتارىندا قر مادەنيەت جانە سپورت ءمينيسترى ارىستانبەك مۇحامەدي ۇلى, تاريح عىلىمدارىنىڭ دوكتورى جامبىل ارتىقباي جانە بەلگىلى جازۋشى دۋلات يسابەكوۆ تە بار. كارتينانىڭ رەجيسسەرى – باتىرحان داۋرەنبەكوۆ. - فيلم شەتەلدە كورسەتىلىپ, جوعارعى باعاسىن الىپ جاتقانىنا وتە قۋانىشتىمىن. وسىنداي جەڭىستەر الداعى كۇنگە دەگەن سەنىمىڭدى ارتتىرىپ, جاڭا بەلەستەردى باعىندىرۋعا شابىت بەرەدى. ءفيلمنىڭ ءتۇسىرۋ توبىن وسى جەڭىسپەن قۇتتىقتايمىن,-دەدى ءفيلمنىڭ رەجيسسەرى باتىرحان داۋرەنبەكوۆ. حالىقارالىق انيماتسيالىق فورۋمى جىل سايىن مىسىر استاناسى كاير قالاسىندا اقپان ايىندا وتەدى. فەستيۆالدىڭ ۇيىمداستىرۋشىلارى – مىسىردىڭ مادەنيەت دامۋ قورى جانە انيماتسيا قاۋىمداستىعى. بايقاۋدىڭ باستى ماقساتى – انيماتسيالىق فيلمدەردى قولداۋ, تاجىريبە الماسۋ جانە جاس رەجيسسەرلاردىڭ كوركەم جانە تەحنيكالىق بىلىمدەرىن ارتتىرۋ. بيىل فورۋم شەڭبەرىندە گەرمانيا, شۆەيتساريا, اقش, قىتاي, رەسەي, اۆستراليا, قازاقستان, فرانتسيا, سينگاپۋر, سلوۆاكيا, اۆستريا, ءباا, وڭتۇستىك كورەيا سىندى باسقا دا ەلدەردەن كەلىپ تۇسكەن 90-نان استام قىسقامەتراجدى جانە تولىقمەتراجدى فيلمدەر ۇسىنىلعان. تولىقمەتراجدى انيماتسيالىق فيلمدەرگە باعا بەرىپ, ەڭ ۇزدىگىن انىقتاعان قازىلار القاسىنىڭ قۇرامىنا ابباس ءال ابباس (توراعا), تارەك راشاد جانە سامي رافي كىردى.