دجەيكوبس گولوۆكيندى سىنعا الدى

ورتا سالماقتا WBA (Regular) بەلبەۋىنىڭ يەگەرى دەننيەل دجەيكوبس (32-1, 29 كو) الداعى قارسىلاسى WBA (Super), IBO, WBC جانە IBF تۇجىرىمدارى بويىنشا الەم چەمپيونى گەننادي گولوۆكيندى (36-0, 33 كو) سىنعا الدى. بۇل تۋرالى vesti.kz حابارلادى. ونىڭ ايتۋىنشا, گولوۆكيننىڭ اتاعى جەر جارىپ تۇرعانمەن, ول تەك وزىنەن ءالسىز, شارشى الاڭدا سوڭعى جىلدارىن وتكىزىپ جۇرگەن بوكسشىلارمەن جۇدىرىقتاسقان. «تالانتىما 100 پايىز سەنىمدىمىن. ال جاتتىعۋ بارىسىندا قارسىلاسىمدى جەڭۋگە دەگەن سەنىمدىلىگىم ودان سايىن ارتا تۇسەدى. فيزيكالىق قابىلەتىم جەتكىلىكتى. جىلدامدىعىمنىڭ, بويىمداعى كۇشىمنىڭ, دەر كەزىندە شەشىم قابىلداي ءبىلۋىمنىڭ ارقاسىندا گەنناديدىڭ العاشقى جەڭىلىسىنە سەبەپشى بولامىن دەپ ويلايمىن. ول اۋەسقوي بوكستا 400-گە جۋىق كەزدەسۋ وتكىزدى دەپ ەستىدىم. بىراق مەن دە ودان قۇرالاقان ەمەسپىن. شامامەن 200 مارتە رينگكە شىققانمىن. سوندىقتان مەنىڭ دە تاجىريبەم جەتكىلىكتى. وزىڭە سەنىمدى بولۋ – جەڭىسكە جەتۋدىڭ ءبىر جولى», – دەدى دجەيكوبس. «گولوۆكيننىڭ وكىلدەرى كەرەمەت جۇمىس اتقاردى. وعان قارسى شارشى الاڭدا سوڭعى جىلدارىن وتكىزىپ جۇرگەن سپورتشىلارمەن جەكپە-جەكتەر ۇيىمداستىردى. ولار سونداي-اق, ناعىز ورتا سالماقتىڭ بوكسشىلارى ەمەس ەدى. وسىدان بارىپ جۇرت ونى جەڭىلۋدى بىلمەيتىن باتىر كورىپ ءجۇر», – دەدى ول. ايتا كەتەيىك, گولوۆكين مەن دجەيكوبس اراسىنداعى ايقاس 18 ناۋرىز كۇنى نيۋ-يورك قالاسىنداعى Madison Square Garden ارەناسىندا وتەدى. ەلىمىزدە بۇل بوكس كەشىن «قازاقستان» جانە «KazSport» تەلەارنالارى تىكەلەي ەفيردە كورسەتەدى. قازاقستاندىق بوكسشى سوڭعى 23 جەكپە-جەگىن ۋاقىتىنان بۇرىن اياقتاسا, دجەيكوبس 12 ۇرىسىن قاتارىنان نوكاۋتپەن جەڭگەن.