رەسپۋبليكا بويىنشا 27 گيدروتەحنيكالىق قۇرىلىس قاناعاتتانعىسىز جاعدايدا

پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا ورتالىق جانە جەرگىلىكتى اتقارۋشى ورگانداردىڭ 2017 جىلعى سۋ تاسقىنى كەزەڭىنە دايىندىعى تۋرالى ماسەلە قارالدى, دەپ جازادى primeminister.kz. اۋىل شارۋاشىلىعى مينيسترلىگى گيدروتەحنيكالىق قۇرىلىستاردىڭ سۋ تاسقىنى كەزەڭىنە دايىندىعى بويىنشا ءىس-شارالار كەشەنىن قابىلدادى. سۋ تاسقىنىنا قارسى كوميسسيا قۇرىلدى. بۇل تۋرالى اۋىل شارۋاشىلىعى ۆيتسە-ءمينيسترى قايرات ايتۋعانوۆ باياندادى. 2017 جىلعى 17 اقپانداعى جاعداي بويىنشا رەسپۋبليكالىق مەنشىكتە «قازسۋشار» رمك تەڭگەرىمىندە 2 177 گيدروتەحنيكالىق قۇرىلىس, ولاردىڭ ىشىندە 78 سۋ قويماسى, 83 سۋ تورابى, 26 بوگەت جانە 1 990 باسقا دا قۇرىلىستار بار. جالپى بارلىق سۋ قويمالارى ىسكە قوسىلعان جانە 2017 جىلعى كوكتەمگى سۋ تاسقىنىن قابىلداۋعا سىيىمدىلىققا يە, دەپ اتاپ ءوتتى ۆيتسە-مينيستر. «سۋ رەسۋرستارى جونىندەگى كوميتەتتىڭ باسسەيندىك ينسپەكتسيالارى توتەنشە جاعدايلار, ەكولوگيا اۋماقتىق ورگاندارىمەن جانە جەرگىلىكتى اتقارۋشى ورگاندارمەن بىرگە 761 گيدروتەحنيكالىق قۇرىلىسقا ۆيزۋالدى زەرتتەۋ جۇرگىزدى. رەسپۋبليكا بويىنشا 27 گيدروتەحنيكالىق قۇرىلىس قاناعاتتانعىسىز جاعدايدا ەكەنى انىقتالدى, سۋ تاسقىنى جانە سەل كەزىندە قيراۋ قاۋپى ۇلعايۋدا. باسسەيندىك ينسپەكتسيالار وسى گيدروتەحنيكالىق قۇرىلىستاردىڭ يەلەرىنە انىقتالعان ولقىلىقتاردى جويۋ تۋرالى ۇيعارىمدار بەردى جانە تاسقىن سۋدى قاۋىپسىز وتكىزۋ بويىنشا شارالار قابىلداۋ قاجەتتىگى تۋرالى حاتتار جىبەردى», - دەدى ق. ايتۋعانوۆ. سۋ تاسقىنىنا قاتىستى توتەنشە جاعدايعا «قازسۋشار» رمك 10 مىڭ م³ كولەمدە ينەرتتى ماتەريالداردىڭ, 678 توننا جانار-جاعارماي ماتەريالدارىنىڭ, 41 مىڭ دانا ىدىس-قاپتىڭ اپاتتى قورىن جاساقتادى, سونداي-اق 246 بىرلىك ارنايى تەحنيكا جانە 31 بىرلىك ءجۇزۋ قۇرالى ازىرلەنگەن. «جالپى بۇگىنگى تاڭدا رەسپۋبليكالىق مەنشىكتەگى نىساندارداعى سۋ شارۋاشىلىعى جاعدايى تۇراقتى جانە تۇراقتى باقىلاۋدا», - دەپ سەندىردى ۆيتسە-مينيستر.