سينگاپۋردا قازاقستاننىڭ تۋريزم مۇمكىندىكتەرى ۇسىنىلدى

2017 جىلعى 17-19 اقپاندا سينگاپۋردا تۋريستىك اگەنتتىكتەرىنىڭ ۇلتتىق قاۋىمداستىعى (National Association of Travel Agents of Singapore) ۇيىمداستىرعان «NATAS Travel Fair» اتتى مەرەيتويلىق 50-ءشى تۋريستىك كورمە وتكىزىلدى, دەپ جازادى primeminister.kz. كورمە بارىسىندا سينگاپۋر جۇرتشىلىعىنا قازاقستاننىڭ تۋريزم الەۋەتى مەن 2017 جىلدىڭ باستى ءىس-شاراسى «ەكسپو-2017» حالىقارىلىق كورمەسى تانىستىرىلدى. وسىمەن, قازاقستان اتالعان كورمەگە ءۇشىنشى رەت قاتىسىپ وتىر. «قازاقستان - ۇلى دالا ەلى» اتتى پاۆيلونىن قازاقستان رەسپۋبليكاسىنىڭ سينگاپۋرداعى ەلشىلىگى ۇيىمداستىرعان. قازاقستاندىق پاۆيلوننىڭ نەگىزگى سەرپىنى ەلىمىزدىڭ تۋريستىك الەۋەتىن سينگاپۋر جۇرتشىلىعى جانە تۋريستىك وپەراتورلارى اراسىندا تانىستىرۋعا جانە «ەكسپو-2017» كورمەسىنە تارتۋعا باعىتتالعان. سينگاپۋردىڭ تۋريستىك اگەنتتىكتەرىنىڭ ۇلتتىق قاۋىمداستىعىنىڭ پرەزيدەنتى دەۆيندەر وري قازاقستاندىق پاۆيلوندى ارالاۋ بارىسىندا سينگاپۋرلىق تۋريستەردىڭ قازاقستانعا اعىنىنىڭ ايتارلىقتاي ارتقاندىعىن, ونىڭ ۇستىنە, سينگاپۋردىڭ «ەكسپو-2017» كورمەسىنە قاتىساتىنىن ەسكەرە وتىرىپ, استاناداعى ەكسپو كورمەسىنىڭ ۇيىمداستىرىلۋى الەمدىك تۋريستىك نارىقتا قازاقستانعا قاتىستى قىزىعۋشىلىققا وڭ سەرپىنىن تيگىزەتىندىگىن باسا ايتتى. ءىس-شارا وتكىزىلۋىنىڭ ءۇش كۇنى ىشىندە كورمەگە 111 مىڭنان استام ادام كەلدى. قازاقستاندىق پاۆيلوندى 8 مىڭنان استام ادام تاماشالادى.