قازاقستان 117 ەلگە 960-تان استام تاۋار ءتۇرىن ەكسپورتتايدى

قازاقستان 117 ەلگە 960-تان استام تاۋار ءتۇرىن ەكسپورتتايدى. بۇل تۋرالى قر ينۆەستيتسيالار جانە دامۋ ءمينيسترى جەڭىس قاسىمبەك مينيسترلىكتىڭ كەڭەيتىلگەن القا ماجىلىسىندە ءمالىم ەتتى, دەپ جازادى primeminister.kz ءمينيستردىڭ ايتۋىنشا, فەرروحرومدى 188 مىڭ تونناعا 21% زاتتاي ارتىعىمەن ەكسپورتتالعان, دەگەنمەن اقشالاي ەكسپورتتىق ءتۇسىم 15 ملن دوللارعا تومەندەگەن, كاتودتى مىستىڭ ەكسپورتى فيزيكالىق كولەمدە 36 مىڭ تونناعا وسكەن, بىراق تومەندەگەن قۇندىق ءمانى  90 ملن اقش دوللارىنان استام. (كاتودتى مىستىڭ ەكسپورتتىق باعاسى ورتاشا ەسەپپەن 950 دوللارعا, سارى فوسفور 1400 دوللارعا تومەندەدى.) وسىعان بايلانىستى قىتاي, يران, تۇركيا نارىعىنا شىعۋ جونىندەگى, ساۋدا ميسسيالارىن ۇيىمداستىرۋ, ەكسپورتتىق كەلىسىمدەردى قارجىلاندىرۋ, شىعىندى وتەۋ كەلىسىمدەرىن جۇزەگە اسىرۋ جولىمەن ەكسپورتتاۋشىلارعا كومەكتەسۋ جۇمىستارى كۇشەيتىلدى. وسى جۇمىستاردىڭ ناتيجەسىندە ەلەكتروتەحنيكا (+38,8%-تەن 134,3 ملن دوللارعا دەيىن), دايىن مەتالل بۇيىمدارى (+11,4% 92,2 ملن دوللارعا دەيىن), رەزينا جانە پلاستماسسا بۇيىمدارى (+14,5% 55 ملن دوللارعا دەيىن), قۇرىلىس ماتەريالدارى (+43,6%-تەن 50,2 ملن دوللارعا دەيىن), جانە تاعى باسقا دايىن ءونىم ەكسپورتى ارتاتىن بولادى. سونداي-اق, ج. قاسىمبەك اتالعان جۇمىستى كۇشەيتۋ ءۇشىن قر ۇكىمەتى جانىنان ەكسپورت جونىندەگى ۇلتتىق كەڭەس, ال كازەكسپورتگارانت بازاسىندا مامانداندىرىلعان ۇلتتىق كومپانيا «KAZAKH EXPORT» قۇرىلعانىن ايتىپ ءوتتى. جالپى, 2017 جىل وڭدەلگەن ەكسپورت ءوسىمىنىڭ قالپىنا كەلگەن جىلى بولادى دەپ كۇتىلۋدە.