ەلەۋسىنوۆ: الداعى كۇندەرى اقش-قا جول جۇرەمىن

وليمپيادا چەمپيونى دانيار ەلەۋسىنوۆ اقش-تا وتكىزەتىن جاتتىعۋلارى, جاڭا جاتتىقتىرۋشىسى جايلى وي ءبولىستى. بۇل تۋرالى vesti.kz حابارلادى. «وسى ايدىڭ سوڭىندا نەمەسە الداعى ايدىڭ باسىندا امەريكاعا جول جۇرەمىن دەپ جوسپارلاپ وتىرمىن. ازىرگە انىق-قانىعى بەلگىسىز. بىراق اعاممەن (داۋرەن ەلەۋسىنوۆ – كاسىپقوي بوكسشى) جانە اكەممەن بىرگە جاتتىعاتىنىم انىق», – دەدى ريو وليمپياداسىنىڭ چەمپيونى. اقش-تا ەلەۋسىنوۆ جاڭا باپكەردىڭ قول استىندا جاتتىعادى. بۇل جونىندە ول: «وليمپيادانىڭ الدىندا كەلىپ, دەرەك سانتوسپەن بىرگە دايىندالدىم. بوكسشىلارعا دەگەن قارىم-قاتىناسىن, جاتتىعۋ تاسىلدەرىن كوردىم. بىلىكتى باپكەر, ادامي تۇرعىدان دا جاقسى كىسى. ونىمەن بىرگە جۇمىس ىستەۋ دە ىڭعايلى», – دەدى ول. «اقش-قا وتباسىمدى تولىعىمەن الىپ كەتەمىن. ۋاقىتىمنىڭ كوبى سول جاقتا وتەتىندىكتەن جاقىندارىم ىلعي دا مەنىڭ قاسىمدا, ماعان قولداۋ بەرىپ جۇرەدى. ارينە, مۇحيتتىڭ ارعى بەتىندە قالىپ قويامىن دەپ ايتپايمىن. جەكپە-جەكتەرىمنەن كەيىن قازاقستانعا ءجيى كەلىپ تۇرامىن», – دەدى دانيار. ايتا كەتەيىك, 25 جاستاعى بوكسشى وتكەن جىلدىڭ تامىز ايىندا 69 كيلو سالماقتا وليمپيادا چەمپيونى اتانعان. ال كاسىپقوي بوكسقا اۋىسۋ تۋرالى 12 قاڭتاردا شەشىم قابىلدادى. مۇندا ول جارتىلاي ورتا سالماقتا (66 كيلوعا دەيىن) جۇدىرىقتاسادى. العاشقى جەكپە-جەگى وسى جىلدىڭ مامىر ايىندا قىتايدا وتەدى. كاسىپقوي بوكستاعى دانياردىڭ باستى قارسىلاستارى تۋرالى اقپاراتتى مىنا جەردەن بىلە الاسىز.