قازاقستان ەشكى ءسۇتىن ەكسپورتتاماق

اقمولا وبلىسىنىڭ تسەلينوگراد اۋدانىنداعى اسىلتۇقىمدى ەشكى شارۋاشىلىعى وسى كوكتەمدە ەشكى ءسۇتىن وندىرە باستايدى, دەپ جازادى حابار24. اتالعان شارۋاشىلىق بۇدان 3 اي بۇرىن قاجىمۇقان اۋىلىنىڭ ىرگەسىنەن اشىلعان.  قازىر مۇندا 72 ەشكىگە ارنالعان ساۋىن الاڭى مەن جىلىنا 4 مىڭ توننا ءسۇت وڭدەي الاتىن زاۋىت دايىن تۇر. ياعني جازعا قاراي شارۋاشىلىقتىڭ ەمدىك قاسيەتى بار ەشكى سۇتىنەن بولەك ىرىمشىك, ءتاتتى سۇزبە سەكىلدى 10-نان استام ءونىم ءتۇرى نارىققا شىعارىلادى. ءىس ىلگەرىلەپ جاتسا, سەرىكتەستىك ەكسپورتتى دا قولعا الماق. قازىردىڭ وزىندە ەشكى سۇتىنە كورشى قىتاي ەلى قىزىعۋشىلىق تانىتىپ وتىر. ايماقتاعى ايرىقشا جوبانى ازىرگە سەرىكتەستىك ءوز قارجىسىمەن دامىتىپ كەلەدى. سوندىقتان كاسىپكەرلەر ءونىمنىڭ وسى تۇرىنە سۋبسيديا ءبولىنىپ, ونى ساتۋعا مەملەكەتتىك دەڭگەيدە قولداۋ بولسا دەيدى. "وسى مارت ايىنان باستاپ ەشكى لاقتايدى. ەشكى لاقتاعان سوڭ ءبىز ونى ساۋامىز. ءبىر ەشكىدەن 3-5 ليتر ءسۇت الۋدى جوسپارلاپ وتىرمىز. ۇكىمەتتەن سۇرايتىنىمىز – تەك ءبىزدى قولداۋ. قازىر 337 باس الدىق. بىراق ءبىر-ەكى جىلدان كەيىن 5 مىڭ باسقا دەيىن جەتكىزەمىز دەگەن جوسپارىم بار", - دەيدى شارۋاشىلىق ديرەكتورى ەرمەك لۇقپانوۆ.