وقو-دا الداعى 5 جىلدا 205 مەكتەپ سالىنادى

وڭتۇستىك قازاقستان وبلىسىندا الداعى 5 جىلدا 205 مەكتەپ سالىنادى. سونداي-اق بەيىمدەلگەن عيماراتتا ورنالاسقان ءبىلىم وشاقتارى مەن ءۇش اۋىسىمدا ءبىلىم بەرەتىن مەكتەپتەردىڭ قاتارى ازايادى, -دەپ حابارلايدى قازاقپارات. ستاتيستيكا مالىمەتتەرگە سۇيەنسەك, ەلىمىزدە ءاربىر بەسىنشى بالا وڭتۇستىك قازاقستان وبلىسىندا تۋادى. ءبىر جىلدا وڭىردە 70 مىڭنان استام ءسابي دۇنيەگە كەلەدى. وسى كورسەتكىشكە قاراپ, سوڭعى جىلدارى وبلىستاعى حالىق ءوسىمى جىل ساناپ ارتىپ وتىرعاندىعىن بايقاۋعا بولادى. ياعني, وڭتۇستىك قازاقستان وبلىسى دەموگرافيالىق دامۋ جاعىنان رەسپۋبليكادا الدىڭعى قاتاردا. ناتيجەسىندە جىل سايىن مەكتەپتەردەگى وقۋشىلار سانى شامامەن 30 مىڭعا وسكەن. وبلىستاعى 1021 مەكتەپتىڭ 256-سى بەيىمدەلگەن عيماراتتا ورنالاسسا, ونىڭ 82-ءسى ساماننان سالىنعان. 31 ەلدى مەكەندە مەكتەپ جوق. ال, 29 مەكتەپ ءۇش اۋىسىمعا ءوتۋدىڭ الدىندا تۇر. وسى كۇرمەۋلى ماسەلەلەردى شەشۋ ماقساتىندا الداعى 5 جىلدا وبلىستا 205 مەكتەپ سالىنباق. بۇدان بولەك, «بالاپان» باعدارلاماسى اياسىندا 3 پەن 6 جاس ارالىعىنداعى بالالاردى مەكتەپكە دەيىنگى ۇيىمدارمەن قامتۋ ماسەلەسى مەملەكەتتىك- جەكەمەنشىك ارىپتەستىك اياسىندا شەشىمىن تابادى. وسى باستامانىڭ ارقاسىندا الداعى 3 جىلدا بالالاردى بالاباقشامەن قامتۋ دەڭگەيىن 100 پايىزعا جەتكىزۋ جوسپارلانىپ وتىر.