شاھار كوركىن ادەمى ايالداما دا اشادى

الماتى, استاناداعىداي كولىك كەپتەلىسىنە حالقىنىڭ سانى ءبىر ميلليونعا جەتكەن شىمكەنت تۇرعىندارى دا ۇيرەنىپ قالدى. حالىق كوپ, ماشينا كوپ. بىراق, باسقالاي رەتسىزدىكتەر حالىقتىڭ مازاسىن الۋدا. تۇرار رىسقۇلوۆ پەن بايدىبەك بي داڭعىلىنىڭ قيىلىسقان تۇسىندا قوعامدىق كولىكتەر مەن تاكسيس­تەر شارشى جەر قالدىرماي ءيىن تىرەسىپ تۇرادى. ءارى قارايعى اۋىلدارعا جول جۇرەتىن ادامدار دا وتە كوپ. باجىلداعان كولىك, قول كوتەرگەن جولاۋشى. كەش­قۇرىم بۇل جەردەن ءوز كولىگىڭمەن ءوتۋ قيىننىڭ قيىنى. شىمكەنت قالاسىنىڭ قوعامدىق كەلىسىم ءماجى­لىسىندە وقو كاسىپوداقتار كەڭەسىنىڭ توراعاسى عاني قارابەكوۆ وسى سۇراقتى قالا اكىمى عابيدوللا ءابدىرا­حىموۆقا قويدى. «كومەشبۇلاق, قاتىنكوپىر, لەڭگىر جانە گيپەر حاۋس تاكسوپاركتەرىندەگى رەتسىزدىكتى قالاي شەشۋگە بولادى؟» دەگەن سۇراققا قالا اكىمى بىلاي دەپ جاۋا­پ بەردى: – اتالعان تاكسوپاركتەر قوعامدىق كولىك قوزعالىسى مەن جولاۋشىلارعا كوپ كەدەرگى كەلتىرۋدە. ەكى اپتا بۇرىن ءدال وسى ماسەلە بويىنشا ارنايى جينالىس وتكىزگەن بولاتىنبىز. ول پاركتەردى ەۋروپالىق قالالاردىڭ ۇلگىسىنە ساي جاڭارتپاقشىمىز. بۇل اۆتوپاركتەرگە تەك ارنايى تىركەلگەن مارشرۋتتار عانا كىرە الادى. ال جولاۋشىلار ەمىن-ەركىن, ەشقانداي كەدەرگىسىز كىرىپ-شىعاتىن بولادى. ءدال قازىرگى جاعدايدا جوعارىدا اتالعان تاكسوپاركتەردىڭ ماسەلەسىنە تىيىم سالا المايمىز. ارنايى جول بەلگىلەرىن ورناتۋ ارقىلى رەتتەيمىز, – دەدى اكىم. سونىمەن قاتار, ايالداما ماسەلەسىنە دە پىكىرىن ءبىلدىردى. – الداعى 2 ايدىڭ ىشىندە قالا بويىنشا 104 جاڭا ايالداما ورناتىلاتىن بولادى. ونىڭ باسىم كوپشىلىگى قالاعا جاڭادان قوسىلعان ەلدى مەكەندەرگە تيەسىلى. كەيبىر ايالدامالار دۇكەنگە اينالىپ كەتكەن. ءبىز ايالداما باسشىلارىنا ءبىر-اق تالاپ قويىپ وتىرمىز. ايالداما ساۋلەت جانە قالا قۇرىلىسى باسقارماسىنىڭ جوباسىنىڭ نەگىزىندە سالىنۋعا ءتيىس. ويتكەنى, ول – قالا كوركى. ارقايسىسى وزىمبىلەرمەندىككە سالسا, شاھار كەلبەتىنە اسەر ەتۋى مۇمكىن, – دەدى قالا اكىمى. باقتيار تايجان, «ەگەمەن قازاقستان» وڭتۇستىك قازاقستان وبلىسى