«ەگەمەن قازاقستان» رگ» اق باسقارما توراعاسى دارحان قىدىرالى مەن «ۇلتتىق تەستىلەۋ ورتالىعى» رمك ديرەكتورى رامازان الىمقۇلوۆ ءوزارا ىنتىماقتاستىق تۋرالى مەموراندۋمعا قول قويدى.
اتالعان كەلىسىم نەگىزىندە تاراپتار ۇلتتىق بىرىڭعاي تەستىلەۋگە دايارلاۋ بويىنشا بىرلەسكەن ءىس-قيمىل جوسپارىن قابىلدادى. ياعني, الداعى ۋاقىتتا باس باسىلىم بيىلعى تۇلەكتەر مەن جوعارى وقۋ ورنىنا قۇجات تاپسىرۋشىلارعا ارنالعان ۇلتتىق بىرىڭعاي تەستىلەۋ سۇراقتارى مەن جاۋاپتارىن جاريالاي باستايدى. دارحان قۋاندىق ۇلى گازەت ىشىندەگى كىتاپشا تۇرىندە جاريالاناتىن بۇل تەست ماتەريالدارى ۇبت-عا دايارلاۋعا كومەكتەسەتىنىن ايتتى. سونىمەن بىرگە, اتالعان جوبانىڭ وقىرمانداردىڭ باسىم بولىگىن قۇرايتىن ءبىلىم بەرۋ, جالپى بيۋدجەتتىك سالا قىزمەتكەرلەرىنە قولداۋ كورسەتۋ جانە ينتەرنەت جۇيەسىمەن قامتىلماعان الىس اۋىلدارداعى وقىرماندارعا قولايلى مۇمكىندىك تۋعىزۋ ەكەنىن اتاپ ءوتتى.
– بۇگىندە گازەتىمىزدە ءبىلىم سالاسىنا ارنالعان ەكى بەت تۇراقتى تۇردە شىعا باستادى. «ءتالىم» بەتى مۇعالىمدەر ادىستەمەسى مەن مەكتەپ سالاسىنا, بالا تاربيەسىنە ارنالسا, «ءبىلىم» بەتى سالانى تۇتاس قامتيدى. ءبىز بۇگىنگى كەلىسىم اياسىندا بيىلعى تەستىلەۋ ەرەكشەلىكتەرى مەن جاڭا ماماندىقتاردى تاڭداۋ, گرانتتار تۋرالى مالىمەتتەردى وقىرمان نازارىنا ۇسىنباقپىز. باسقا دا تەحنيكالىق ماسەلەلەر قامتىلاتىن وسى جوبا ارقىلى تۇلەكتەر وزدەرىنە قاجەتتى مالىمەتتەرگە قول جەتكىزە السا, پسيحولوگيالىق تۇرعىدان دايىن بولىپ, دۇرىس تاڭداۋ جاساسا, كوزدەگەن ماقساتىمىزدىڭ ورىندالعانى, دەدى د.قىدىرالى.
«ۇلتتىق تەستىلەۋ ورتالىعى» رمك ديرەكتورى رامازان سيحىم ۇلى 200 مىڭنان استام وقىرمانى بار «ەگەمەن قازاقستان» گازەتىمەن بىرلەسكەن جوبانى جۇزەگە اسىرۋ ۇلكەن مارتەبە ەكەنىن اتاپ ءوتتى.
– قازاقستاننىڭ تۇكپىر-تۇكپىرىنە تارايتىن ەلىمىزدەگى ەڭ ءىرى باسىلىم ارقىلى جۇزەگە اساتىن جوبا شەڭبەرىندە بيىلعى ۇبت-عا قاتىسۋشىلار دەڭگەيىنىڭ جوعارىلاۋىنا مۇددەلىمىز, دەدى ر.الىمقۇلوۆ.
ءوز كەزەگىندە باسىلىم باسشىسى بۇل جوبانىڭ وقىرمان سۇرانىسىن قاناعاتتاندىراتىن باستاما بولارىنا سەنىم ءبىلدىردى.
دۋمان اناش, «ەگەمەن قازاقستان»
