ۇلتتىق بانك بازالىق مولشەرلەمەنى ازايتتى

قازاقستان رەسپۋبليكاسىنىڭ ۇلتتىق بانكى بازالىق مولشەرلەمەنى +/-1% دالىزبەن 11% دەڭگەيىنە دەيىن تومەندەتۋ تۋرالى شەشىم قابىلدادى. 2017 جىلعى قاڭتاردىڭ قورىتىندىسى بويىنشا ينفلياتسيا 6-8%-دىق نىسانالى ءدالىز شەگىنە ەندى. ينفلياتسيالىق كۇتۋلەردىڭ تومەندەۋى, ىشكى ۆاليۋتا جانە اقشا نارىقتارىنداعى تۇراقتىلىق پەن احۋالدى الدىن الا بولجاۋدىڭ ارتۋى, ىسكەرلىك بەلسەندىلىكتىڭ قايتا قالپىنا كەلۋى, سونداي-اق سىرتقى ەكونوميكالىق جاعدايلاردىڭ قولايلى بولۋى اقشا-كرەديت جاعدايلارىن جۇمسارتۋعا نەگىز بولدى. بازالىق مولشەرلەمەنىڭ جاڭا دەڭگەيى باعا جانە قارجىلىق تۇراقتىلىق اراسىنداعى ۇزاقمەرزىمدى تەڭگەرىمدى كورسەتەدى جانە, تيىسىنشە, اقشا-كرەديت ساياساتىن ودان ءارى جۇمسارتۋ الەۋەتى شەكتەۋلى. بازالىق مولشەرلەمە بويىنشا شەشىم مىناداي فاكتورلار ەسكەرىلە وتىرىپ قابىلداندى. 2017 جىلعى قاڭتاردا جىلدىق ينفلياتسيا 7,9%-دى قۇراپ باياۋلادى جانە ۇلتتىق بانكتىڭ بولجامدارىنا تولىق سايكەس كەلەدى. جەكەلەگەن تاۋار نارىقتارىندا, اقىلى قىزمەتتەر نارىقتارىندا باعانىڭ جىلدام ءوسۋى ينفلياتسيانىڭ جالپى دەڭگەيىنىڭ سەرپىنىنە ايتارلىقتاي اسەر ەتپەيدى جانە باسقا تۇتىنۋشىلىق تاۋارلار مەن قىزمەتتەر نارىقتارىنداعى قالىپتى باعا ۇردىستەرىمەن وتەلەتىن بولادى. حالىقتىڭ ينفلياتسيالىق كۇتۋلەرىنە قاتىستى قاڭتاردا جۇرگىزىلگەن پىكىرتەرىمگە سايكەس رەسپوندەنتتەردىڭ ينفلياتسيانىڭ بولاشاقتاعى دەڭگەيىنە قاتىستى كۇتۋلەرىنىڭ بايقالىپ وتىرعان جاقسارۋ ءۇردىسى ولاردىڭ پرو-ينفلياتسيالىق ارەكەتتەرىنىڭ جۇمسارعانىن كورسەتىپ وتىر. ينفلياتسيالىق كۇتۋلەردىڭ ساندىق باعاسى حالىقتىڭ كۇتۋلەرىنىڭ نىسانالى ءدالىز شەڭبەرىندە قالىپتاساتىنىن جانە ناقتى ينفلياتسيا مانىنەن تومەن (قاڭتاردا – 6,6%) دەڭگەيدە بەلگىلەنەتىنىن كورسەتىپ وتىر. بۇل رەتتە ينفلياتسيانىڭ جوعارى بولاتىنىن كۇتەتىن رەسپوندەنتتەردىڭ ۇلەسى وتكەن جىلدىڭ ورتاسىنان بەرى ەڭ تومەنگى مانگە ازايدى. وسىلايشا, قولايسىز كۇيزەلىستەر بولماعان جاعدايدا, ينفلياتسيا ورنىقتى تۇردە بۇكىل 2017 جىل بويى, سونداي-اق 2018 جىلدىڭ 1-جارتىجىلدىعىندا نىسانالى باعدار شەگىندە بولادى. حالىقتىڭ دا, ۆاليۋتا نارىعىنا كاسىبي قاتىسۋشىلاردىڭ دا دەۆالۆاتسيالىق كوڭىل-كۇيى ازايۋدا, بۇل پىكىرتەرىم ناتيجەلەرىنەن جانە ۆاليۋتا تاۋەكەلدەرىن حەدجيرلەۋ قۇنىنان كورىنىپ وتىر. دەپوزيتتىك نارىق بويىنشا دەرەكتەر بانكتىك سالىمداردىڭ دوللارسىزدانۋ پروتسەسىنىڭ جالعاسىپ جاتقانىن جانە سالىمشىلاردىڭ ۇلتتىق ۆاليۋتانى ارتىق كورۋ ءۇردىسىنىڭ ساقتالىپ وتىرعانىن كورسەتىپ وتىر. الدىن الا دەرەكتەر بويىنشا شەتەل ۆاليۋتاسىنداعى دەپوزيتتەر ۇلەسى 2017 جىلعى قاڭتاردىڭ سوڭىندا 53%-عا دەيىن تومەندەدى. ەكونوميكانى قايتا قالپىنا كەلۋ بەلگىلەرى انىق كورىنۋدە. ەكونوميكانىڭ بازالىق سالالارىنىڭ دامۋىن كورسەتەتىن قىسقامەرزىمدى ەكونوميكالىق ينديكاتور 2017 جىلعى قاڭتاردا 103,8%-دى قۇراپ, قالىپقا كەلەتىن ءوسۋ ايماعىندا بولىپ وتىر. 2017 جىلى ناقتى ءىجو-ءنىڭ ءوسۋى 2%- دان اساتىن دەڭگەيدە بولجانىپ وتىر. ىسكەرلىك بەلسەندىلىكتىڭ قايتا قالپىنا كەلۋىنىڭ جانە ىشكى اقشا جانە ۆاليۋتا نارىقتارىنداعى تۇراقتىلىقتىڭ جاعىمدى بەلگىلەرىنىڭ بولۋىنا قاراماستان, ەكونوميكانىڭ ودان ءارى دامۋى ءۇشىن, ءبىرىنشى كەزەكتە, ينفلياتسيالىق پروتسەستەر ءۇشىن الەۋەتتى تاۋەكەلدەرى بار سىرتقى جانە ىشكى كۇيزەلىستەردىڭ تۋىنداۋ ىقتيمالدىعى ساقتالۋدا. ولاردىڭ ىشىنەن الەمدىك تاۋار جانە قارجى نارىقتارىنداعى باعا بەلگىلەنىمدەرىنە وتە قاتتى تاۋەلدىلىكپەن, سونداي-اق ساۋدا ارىپتەستەرى ەلدەرىنىڭ ەكونوميكالارىن قالپىنا كەلتىرۋ جىلدامدىعىمەن بايلانىستى سىرتقى تاۋەكەلدەردى دە, بيۋدجەت شىعىستارىن ۇلعايۋ جاعىنا قاراي قايتا قاراۋدى دا اتاپ وتكەن ءجون. بازالىق مولشەرلەمە بويىنشا بولاشاقتاعى شەشىمدەر ىشكى سۇرانىستىڭ ىرگەلى فاكتورلارىنىڭ بۇدان كەيىنگى سەرپىنىنە جانە قارجى سەكتورىنداعى احۋالدىڭ ورنىقتىلىعىنا بايلانىستى بولادى. بازالىق مولشەرلەمە بويىنشا كەزەكتى شەشىم 2017 جىلعى 10 ساۋىردە استانا ۋاقىتى بويىنشا 17.00-دە جاريالانادى.