قازاقستان 117 ەلگە 960-تان استام تاۋار ءتۇرىن ەكسپورتتايدى. بۇل تۋرالى قر ينۆەستيتسيالار جانە دامۋ ءمينيسترى جەڭىس قاسىمبەك مينيسترلىكتىڭ كەڭەيتىلگەن القا ماجىلىسىندە ءمالىم ەتتى.
«فەرروحرومدى 188 مىڭ تونناعا (+21% زاتتاي) ارتىعىمەن ەكسپورتتادىق. بىراق, اقشالاي ەكسپورتتىق ءتۇسىم 15 ملن. دوللارعا تومەندەدى. كاتودتى مىستىڭ ەكسپورتى فيزيكالىق كولەمدە 36 مىڭ تونناعا ءوستى, بىراق تومەندەگەن قۇندىق ءمانى 90 ملن. اقش دوللارىنان استام.(كاتودتى مىستىڭ ەكسپورتتىق باعاسى ورتاشا ەسەپپەن 950 دوللارعا, سارى فوسفور 1400 دوللارعا تومەندەدى.)»,- دەدى مينيستر.
وسىعان بايلانىستى قىتاي, يران, تۇركيا نارىعىنا شىعۋ جونىندەگى, ساۋدا ميسسيالارىن ۇيىمداستىرۋ, ەكسپورتتىق كەلىسىمدەردى قارجىلاندىرۋ, شىعىندى وتەۋ كەلىسىمدەرىن جۇزەگە اسىرۋ جولىمەن ەكسپورتتاۋشىلارعا كومەكتەسۋ جۇمىستارى كۇشەيتىلدى.
مينيستر جەڭىس قاسىمبەكتىڭ ايتۋىنشا, وسى جۇمىستاردىڭ ناتيجەسىندە ەلەكتروتەحنيكا (+38,8%-تەن 134,3 ملن.دولل, دەيىن), دايىن مەتالل بۇيىمدارى (+11,4% 92,2 ملن.دولل دەيىن), رەزينا جانە پلاستماسسا بۇيىمدارى (+14,5% 55 ملن.دولل.دەيىن), قۇرىلىس ماتەريالدارى (+43,6%-تەن 50,2 ملن.دولل. دەيىن), جانە تاعى باسقا دايىن ءونىم ەكسپورتى ارتاتىن بولادى.
«اتالعان جۇمىستى كۇشەيتۋ ءۇشىن قر ۇكىمەتى جانىنان ەكسپورت جونىندەگى ۇلتتىق كەڭەس, ال كازەكسپورتگارانت بازاسىندا مامانداندىرىلعان ۇلتتىق كومپانيا «KAZAKH EXPORT» قۇرىلادى.
جالپى, 2017 جىل وڭدەلگەن ەكسپورت ءوسىمىنىڭ قالپىنا كەلگەن جىلى بولادى دەپ ەسەپتەيمىز»,-دەدى مينيستر ج.قاسىمبەك.
قر ينۆەستيتسيالار جانە دامۋ ءمينيسترى ەىدۇ ستاندارتىنا سايكەس ەلدىڭ ينۆەستيتسيالىق كليماتىن جەتىلدىرۋ بويىنشا جۇمىستاردى جالعاستىرۋدا.
بۇعان دەيىن ەىدۇ ينۆەستيتسيا جونىندەگى كوميتەتى ەىدۇ كەڭەسىنە قازاقستاندى قاتىسۋشى رەتىندە شاقىرۋ شەشىمىن قابىلدادى. كەڭەستىڭ شەشىمى بيىل ناۋرىز-ءساۋىر ايلارىندا بەلگىلى بولادى دەپ كۇتىلۋدە.
بارلىق ينۆەستورلار ءۇشىن «ءبىر تەرەزە» قاعيداسى ەنگىزىلدى (300-دەن استام مەملەكەتتىك قىزمەت). بۇگىندە ول ۇلكەن سۇرانىسقا يە بولىپ وتىر. وتكەن جىلدىڭ قورىتىندىسى بويىنشا, 5500-دەن استام ءوتىنىش كەلىپ ءتۇستى جانە شامامەن 8000 مەملەكەتتىك قىزمەت كورسەتىلدى. قازىر ينۆەستورلارعا قولداۋ كورسەتەتىن اۆتوماتتاندىرىلعان جۇيەنى ازىرلەۋ بويىنشا جۇمىستار ءجۇرىپ جاتىر. سونىمەن قاتار, ينۆەستيتسيالىق ومبۋدسمەن ينستيتۋتى قىزمەت ەتەدى.
ينۆەستيتسيا تارتۋ بويىنشا جۇمىستار جوعارعى دەڭگەيدە كۇشەيتىلدى. اتاپ ايتقاندا, باسىمدىققا يە 10 ەلدە (اقش, ۇلىبريتانيا, يتاليا, وڭتۇستىك كورەيا, يران, جاپونيا, گەرمانيا, فرانتسيا, قىتاي, ءۇندىستان) ينۆەستيتسيا تارتۋ بويىنشا ارنايى كەڭەسشىلەر بەلگىلەندى, سونىمەن قاتار, شەتەلدە «Kaznex Invest» اق-نىڭ 5 ايماقتىق فرونت-كەڭسەسى اشىلدى (اقش, گەرمانيا, تۇركيا, ءباا, قحر).
«Kaznex Invest» اق بازاسىندا ينۆەستيتسيا جونىندەگى «كazakh Invest» مامانداندىرىلعان ۇلتتىق كومپانياسى قۇرىلادى, ول ۇكىمەتتىڭ اتىنان ماقساتتى تۇك جانە ءىرى ينۆەستورلارمەن كەلىسسوزدەر جۇرگىزەدى.
«ايماقتىق دەڭگەيدە وبلىس اكىمدەرىنىڭ باسشىلىعىمەن ينۆەستيتسيا تارتۋ جونىندەگى كەڭەس قۇرىلدى. قازىر مەملەكەت باسشىسىنىڭ تاپسىرماسى بويىنشا, ەكسپورت جانە ينۆەستيتسيا تارتۋ جۇيەسىن قايتا فورماتتاۋ بويىنشا جۇمىستاردى باستادىق»-دەپ اتاپ ءوتتى جەڭىس قاسىمبەك.
