اقپان اقىرىپ تۇر. سەنبى-جەكسەنبى كۇندەرى شىعىس قازاقستاننىڭ قۇتقارۋشىلارى 65 ادامدى قار قۇرساۋىنان قۇتقاردى.
وبلىستىق توتەنشە جاعداي دەپارتامەنتىنىڭ ماماندارى تۇرعىندارعا قالىڭ قاردىڭ جاۋاتىنى, بوران سوعاتىنى جونىندەگى حابارلاندىرۋلار دەر كەزىندە جىبەرىلىپ جاتسا دا, بۇعان قۇلاق اساتىنداردىڭ قاتارى از ەكەنىن ايتادى.
دەمالىس كۇنگى قۇتقارۋ جۇمىستارى نەگىزىنەن «سەمەي-قاراۋىل» جانە «كىشى ۆلاديميروۆكا-قاراعايلى» تراسساسىندا جۇرگىزىلگەن. وزدەرىنىڭ جەڭىل ماشينالارىمەن جولعا شىققان تۇرعىندار قالىڭ قارعا باتىپ قالعان. وسىنىڭ كەسىرىنەن جول قوزعالىسى شەكتەلگەن. دەپارتامەنتتىڭ ءورت ءسوندىرۋ جانە اۆاريالىق قۇتقارۋ جۇمىستارى قىزمەتىنىڭ ماماندارى «سەمەي-قاراۋىل» تراسساسىنىڭ 30 شاقىرىمىندا 31 ادامدى قار قۇرساۋىنان شىعارعان. ونىڭ ۇشەۋى – بالالار. جانە وسى جولدىڭ 50 شاقىرىمىندا تاعى دا ءۇش جولاۋشىعا جاردەم كورسەتىلگەن.
قۇتقارۋشىلار ءدال وسى ۋاقىتتا بەسقاراعاي اۋدانى اۋماعىنداعى «كىشى ۆلاديميروۆكا-قاراعايلى» تراسساسىنىڭ 18 شاقىرىمىندا 21 ادامعا كومەك قولىن سوزادى. سونىمەن قاتار «شەمونايحا-سەكيسوۆكا» تراسساسىنىڭ 25 شاقىرىمىندا دەپارتامەنت قىزمەتكەرلەرى جەرگىلىكتى اكىمدىكپەن بىرلەسە وتىرىپ 10 كىسىنى اق ۇلپانىڭ «قاقپانىنان» الىپ شىققان.
قار قۇرساۋىنان قۇتقارىلعان بارلىق ازاماتتار جىلىتۋ ورىندارىنا اپارىلىپ, جاقىن ماڭداعى ەلدى مەكەندەرگە جەتكىزىلگەن كورىنەدى. زارداپ شەككەن ەشكىم جوق.
سينوپتيكتەر مۇنداي قولايسىز اۋا رايى وڭىردە ءالى بىرنەشە كۇنگە دەيىن ساقتالاتىنىن ايتادى. دەپارتامەنت قىزمەتكەرلەرى ايماق تۇرعىندارىنا الىس ساپارلارعا شىقپاۋدى ەسكەرتەدى.
ازامات قاسىم,
«ەگەمەن قازاقستان»
