سۋ نەگە شۋعا اينالدى؟

وڭىردە اۋىلداردى ورتا­لىق­تاندىرىلعان سۋ جۇيەلەرىمەن جابدىقتاۋ ءۇشىن 2013-2016 جىل­دار ارالىعىندا «اقبۇلاق» باع­دار­لاماسى بەكىتىلگەن-ءدى. ءبىز جازىپ وتىرعان ماي اۋدانىندا ماي توپتىق سۋ قۇبىرىن قايتا قۇرۋ جۇمىستارى 2011 جىلى باستالىپ, 2016 جىلدىڭ 10 قازانىندا اياقتالۋى كەرەك ەدى. توپتىق سۋ قۇبىرى 11 مىڭداي ادامى بار اۋداننىڭ 23 اۋىلىنا سۋ جەتكىزەتىن بولعان-دى. وتكەن شاقپەن ايتۋعا ءماجبۇرمىز. سويتسەك, اۋدان ورتا­لىعى كوكتوبە, باسكول, ءتىپتى, شالعايداعى اقشيمان اۋىلدارىن ورتالىقتاندىرىلعان سۋ جۇيەسىنە قوساتىن جوبا ەندى عانا دايىن­دالىپ جاتسا كەرەك. وبلىس اكىمدىگىنىڭ سايتىندا اۋدان ورتالىعى كوكتوبە اۋى­لى­نىڭ تۇرعىندارى دا سۋ قۇرىل­عىلارىنىڭ جۇمىسى ءبىر كۇن بار, ءبىر كۇن جوق, ىشەتىن تازا سۋ تابا الماي وتىرعاندارىن جازىپتى. ال مايتۇبەك اۋىلىنىڭ تۇرعىن­دارى بولسا ىشۋگە جاراماسا دا, قۇدىق سۋىن پايدالانۋدا. ءبىز­گە حابارلاسقان تۇرعىندار سۋ­دى تازارتىپ بەرەتىن كەشەندى بلوك ءمودۋلى جوقتىعىن ايتىپ شا­عىمداندى. نەگىزى, اۋىلعا كەشەندى بلوك ءمودۋلىن سالۋ جوباسى وسىدان 7 جىل بۇرىن باستالىپتى. مەردىگەر كوم­پانيا مىندەتىن دۇرىس اتقارماي, اقىرى قىلمىستىق جاۋاپ­كەرشىلىككە تارتىلىپ, جۇ­مىس توقتاپ قالىپتى. ال اۋدان باسشىلىعى مايتۇبەك اۋىلىن دا ورتالىقتاندىرىلعان سۋ جۇيەسىنە قوسۋدى جوسپارلاپ وتىرسا كەرەك, بىراق, بۇل جۇمىستىڭ قاشان ىسكە اساتىنى تاعى دا بەلگىسىز. جوبا جاسالماعان. سوندىقتان, ءبىراز ۋاقىت شىداي تۇرۋعا تۋرا كەلەر, دەگەن ەكەن اۋدان اكىمى ارداق قاڭ­تارباەۆ جۋىردا وتكەن مايتۇبەك اۋىلى تۇرعىندارىمەن بولعان ەسەپتى كەزدەسۋىندە. ەڭ باستىسى, اۋىلعا مودۋل كەرەك پە, الدە ورتالىق سۋ جۇيەسى قاجەت پە, قايسىسى ءتيىمدى دەگەن ماسەلەنىڭ شەشىمى بولۋى كەرەك. جاڭا جولداۋدا «اكىمدەر وڭىرلىك جانە جەرگىلىكتى ماڭىزى بار ماسە­لەلەردى شەشۋگە ءتيىس...» دەپ اتاپ ءوتتى ەلباسى. اۋىل شىدادى, ءالى دە شىدار. بىراق شىدامنىڭ دا شەگى بار ەمەس پە؟.. فاريدا بىقاي, «ەگەمەن قازاقستان» پاۆلودار وبلىسى, ماي اۋدانى