ۇلتتىق اسكەري-پاتريوتتىق ورتالىقتا بولدى

پارلامەنت سەناتىنىڭ ءباسپاسوز قىزمەتى حابارلاعانىنداي, جۇما كۇنى قازاقستان رەسپۋبليكاسى پارلامەنتى سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ ءتورايىمى داريعا نازارباەۆا قازاقستان قارۋلى كۇشتەرىنىڭ ۇلتتىق اسكەري-پاتريوتتىق ورتالىعىندا بولدى. ورتالىق مەملەكەتتىك ورگان­داردىڭ, قارۋلى كۇشتەردىڭ, قالا­لىق اسكەري-پاتريوتتىق كلۋبتار مەن اسكەري كافەدرالاردىڭ, «جاس ۇلان» جانە «جاس قىران» بالا­لار مەن جاسوسپىرىمدەر ۇيىمدار­ى­نىڭ وكىلدەرى, «جاس ۇلان» رەس­پۋبليكالىق اسكەري مەكتەبىنىڭ ءتار­بيەلەنۋشىلەرى قاتىسقان كەزدەسۋدە پاتريوتتىق تاربيە ماسەلەلەرى كەڭىنەن تالقىلاندى. قورعانىس ءمينيسترى ساكەن جاسۇزاقوۆ جىل سايىن «ايبىن» جيىنى, ەرلىك ساباقتارى, «جىگەر» اسكەري-پاتيروتتىق لاگەرلەرىن ءوت­كىزۋ سەكىلدى شارالار كەشەنى جۇزەگە اسىرىلاتىنىن, سونىمەن قاتار, جاستاردىڭ اسكەري-پاتريوت­تىق تاربيەسىن تالداۋ بارىسىندا وسى جۇمىستاردى ودان ءارى جەتىلدىرۋ جانە جۇيەلەۋ قاجەتتىگىن كورسەتىپ وتىرعانىنان حاباردار ەتتى. قارۋلى كۇشتەر باس شتابى باستىعىنىڭ ورىنباسارى م.تالا­سوۆ جەتكىلىكتى قۇقىقتىق جانە وقۋ-ماتەريالدىق بازانىڭ بولماۋى, مەملەكەتتىك ورگاندار مەن قوعامدىق بىرلەستىكتەردىڭ شاشىراڭقىلىعى, سونداي-اق, جاستاردى تاربيەلەۋدەگى وزەكتى ماسەلەلەردى ورتاعا سالدى. د.نازارباەۆا مەملەكەت باس­شىسى, پارلامەنت جانە ۇكىمەت­تىك ەمەس ۇيىمداردىڭ تاراپىنان پاتريوتتىق تاربيەگە باسا نازار اۋدارىلىپ وتىرعانىن اتاپ ءوتتى. سەناتور ەلىمىزدىڭ ورتا مەك­تەپ­تەرىنە كادەت سىنىپتارىن, وقۋ ورىن­دارىنا العاشقى اسكەري دا­يىن­دىق ساعاتتارىن قوسىمشا ەن­گىزۋ جانە قازاقستانداعى اسكەري-پات­­ريوت­تىق قوزعالىستى دامىتۋ ست­را­تە­گياسىن ازىرلەۋ قاجەتتىگىن ايتتى. شاراعا سەناتورلار مۇحتار التىنباەۆ, گەورگي كيم, ءماجى­لىس دەپۋتاتتارى زاعيپا باليەۆا, باقىتبەك سماعۇل قاتىستى. ولار جاس پاتيوتتاردىڭ ساۋالدارىنا جاۋاپ بەرىپ, مۇراجاي جادىگەر­لەرىمەن تانىستى.