قازاقستان سۋرەتشىلەر وداعىنىڭ مۇشەسى گەورگي سوكوۆ الۋان جانردا جانە ءتۇرلى تەحنيكامەن جۇمىس ىستەيتىن قىلقالام شەبەرى. ول پەيزاج جانرىنا كوپ قالام تارتپاعانىن ايتسا دا, وسىدان شامالى ۋاقىت بۇرىن كورەرمەندەرىنە پلەنەرلىك جۇمىستارىن ۇسىنعان بولاتىن. ەندى ول قوستانايلىقتارعا گرافيكالىق شىعارمالارىن تارتۋ ەتتى. كورمەنى سۋرەتشى «اق پەن قارا» دەپ اتاپتى. ول كورمەنىڭ اشىلۋ سالتاناتىندا «اق پەن قارانىڭ» ءمانىسىن ءتۇسىندىرىپ ءوتتى.
– مەن بۇل جولى تەك گرافيكالىق جۇمىستارىمدى كورسەتۋدى ماقسات ەتتىم. ويتكەنى, ءبىزدىڭ كورەرمەندەر كوركەمسۋرەت ونەرىنىڭ التىن ورداسىنا بالايتىن مايلى بوياۋدى, كەسكىندەمەنى جاقىن تۇتادى, ال گرافيكاعا كوڭىل ءبولمەيدى. مەن وسى تۇسىنىكتى جوققا شىعارعىم كەلدى. ونەر ءبىر جانردان ءجانە بىرىڭعايلىقتان تۇرماۋى ءتيىس. ءار جانردىڭ, تەحنيكانىڭ ايتارى, كەرەمەتتىگى بولۋى كەرەك. مەن اق قاعاز, قارا قالاممەن دە كوپ دۇنيە ايتىلاتىنىنا كورەرمەن نازارىن اۋدارعىم كەلدى, – دەدى گەورگي ميحايلوۆيچ.
سۋرەتشىنىڭ 20 جىل ىشىندە سالعان سەكسەننەن اسا گرافيكالىق شىعارمالارى مازمۇنى جاعىنان دا سان الۋان. ول الەم جانە ورىس كلاسسيكالىق ادەبيەتى شىعارمالارى كەيىپكەرلەرىن ءبىراز گرافيكالىق ەڭبەكتەرىنە ارقاۋ ەتكەن. مىسالى, «رونساردىڭ ولەڭدەرىنە» لينوناقىش توپتاماسى, ا.پۋشكين مەن م.بۋلگاكوۆتىڭ تانىمال تۋىندىلارىنا ارنالعان پاراقتار سونىڭ ايعاعى. سونىمەن قاتار, گرافيكالىق تۋىندىلار سيۋجەتتەرىندە دالا سالت اتتىلارى تاقىرىبى دا سۋرەتشى قيالىنان تىس قالماعان.
– گرافيكالىق جۇمىستار كوپ تەر توگۋدى قاجەت ەتەدى. قازىر سۋرەتشىلەر ونداي جۇمىسقا بارا بەرمەيدى. گەورگي ميحايلوۆيچ سەكىلدى قىلقالام ونەرىنىڭ ەڭبەك تورىلارى عانا وعان ەرىنبەيدى. كارتينالارى بىرىنەن ءبىرى وتەدى, كورەرمەندەر تاڭدانىسىن جاسىرا الماي تۇر, – دەيدى سۋرەتشىنىڭ ارىپتەسى تاتيانا يزيۋموۆا.
گەورگي ءميحايلوۆيچتىڭ ايتۋىنشا, ونىڭ گرافيكالىق جۇمىستارى سۋرەتشى رەتىندەگى ىزدەنىستەرىنىڭ دە ناتيجەسى. ەڭ باستىسى, سۋرەتشى قىلقالام ارقىلى وي ايتۋى كەرەك قوي. الۋان ءتۇستى پايدالاناتىن كەسكىندەمە ءومىر اقيقاتىنا جاقىن, ال اق پەن قارادان عانا تۇراتىن گرافيكا ءوزىنىڭ شەكتەۋلى مۇمكىندىگى سەكىلدى ومىردەگى شارتتى تۇسىنىكتەردى بەرۋگە قولايلى. سۋرەتشىنى گرافيكالىق جۇمىستارعا جەتەلەگەن سەبەپتىڭ ءبىرى دە وسى ەكەن. ونىڭ ەڭبەكتەرىندەگى جوعارى ورىنداۋ مادەنيەتىن, باي قيال, مانەرلىلىك, اق پەن قارا تۇستەردىڭ كەرەعارلىعىن ۇتىمدى پايدالانۋدى ارىپتەستەرى دە, كورەرمەندەر دە ەرەكشە باعالادى.
ءنازيرا جارىمبەتوۆا, «ەگەمەن قازاقستان»
قوستاناي
