قانات روبسوندى نوكاۋتقا ءتۇسىردى

سەنبى كۇنى اقش-تىڭ ۋيلمينگتون قالاسىندا كاسىپقوي بوكستان ءبىرىنشى ورتا سالماقتا ونەر كورسەتەتىن جەرلەسىمىز قانات يسلام برازيليالىق روبسون ءاسيستى ءبىرىنشى راۋندتا نوكاۋتقا ءتۇسىردى. سپورتشىنىڭ كارەراسى ونەر ادام­دارىنا قاراعاندا قىسقا بولادى. بوكسشىلارعا 30 جاستان اسقان سوڭ, شارشى الاڭدا 12 راۋند جۇدىرىقتاسىپ ءجۇرۋ وڭايعا سوقپايدى. قازىر قاناتتىڭ جاسى 32-دە. بيىل 33-كە تولادى. سوندىقتان چەمپيوندىق بەلبەۋگە تالاسقانىن قالايمىز. ايتپەسە ۋاقىت ءوتىپ بارادى. بۇل جولى قانات بوكس كەشىنىڭ باستى جەكپە-جەگىندە ەمەس, كىشى روي دجونس پەن بوببي گانني كەزدەسۋىنىڭ اندەركاردىندا ونەر كورسەتتى. قارسىلاسى وسىعان دەيىن شارشى الاڭعا 19 رەت شىققان. ونىڭ ىشىندە 16 جەكپە-جەكتە جەڭىسكە جەتىپ, ءۇش رەت ۇتىلعان. كاسىپقوي بوكستا جۇرگەنىنە ون جىلدان اسقان. اقش-تا العاش رەت جۇدىرىقتاستى. بۇعان دەيىن ەكى رەت كانادادا, ءبىر رەت جاڭا زەلانديادا, قالعان كەزدەسۋلەرىن ءوز ەلىندە وتكىزگەن. الەمدىك رەيتينگتەگى كورسەتكىشى دە اسا ءماز ەمەس (boxrec.com سايتىندا 240-ورىن). جەرلەسىمىزگە روبسوندى ۇتۋ قيىنعا سوقپادى. ءبىرىن­شى راۋندتا-اق سۇلا­تىپ سالدى. ءسويتىپ, قازاق بوكسشىسى سپورت­تىق مانسابىندا 23-جەڭىسىنە قول جەتكىزدى. وسىنداي كەزدەسۋدىڭ قاناتقا ابىروي اپەرە قويمايتىنىن قازاقستان كاسىپقوي بوكس فەدەراتسياسىنىڭ ۆيتسە-پرەزيدەنتى ۆيكتور دەميانەنكو «Vesti.kz» سايتىنا بەرگەن سۇحباتىندا ايتىپتى. – مۇنداي جەكپە-جەك قانات يسلامعا قاجەت ەمەس. جاڭا بيىككە كوتەرىلۋ ءۇشىن دەڭگەيى جوعارى بوكسشىلارمەن جولىق­قانى دۇرىس. قازىرگى قارسىلاسى بىرنەشە مارتە جەڭىلگەن, رەيتينگى دە جوعارى ەمەس. مۇنداي قارسىلاس نە ءۇشىن كەرەك؟ جالپى, وسىنداي كەزدەسۋلەر قاناتقا نە بەرەدى؟ – دەيدى دەميانەنكو. بۇل كاسىبي ماماننىڭ جاناشىر­لىقپەن ايتقان پىكىرى دەپ ويلايمىز. قازاق حالقى باتىر ۇلىن جاقسى كورەدى. ونىڭ تولاعاي تابىستارعا قول جەتكىز­گەنىن, الەمدىك ارەنادا باعى جانعانىن كورگىسى كەلەدى. ەندەشە, قانات جانە ونىڭ پروموۋتەرىنىڭ ويلانعانى دۇرىس بولاتىن شىعار. بەك تولەۋوۆ, جۋرناليست استانا