كوكسايداعى قار كوشكىنى اپات ايتىپ كەلمەيتىنىن كورسەتتى

قاڭتار ايىندا قار كورمەگەن جامبىل وبلىسى اقپان ايىندا قالىڭ قاردىڭ استىندا قال­دى. اقپان ايىنىڭ العاش­قى كۇندەرىنەن-اق قىس قاھا­رىن تانىتىپ, مەزگىل مىنە­زىن كورسەتىپ تۇر. قاردىڭ قا­لىڭ جاۋعانى سونشالىق, ەلدىمە­كەن­دەر اراسىندا كولىك قوزعالىسى قيىندادى. ءتىپتى, كەيبىر ازاماتتار مۇن­داي قىستىڭ سوڭعى ون جىلدىڭ كولەمىندە بولماعانىن ايتادى. ال ۇيالى تەلەفونعا سوڭعى كەزدەرى «الماتى – تاش­كەنت» تاسجولىنىڭ جابىلعان­دىعى تۋرالى حابارلامالار دا ءجيى ءتۇسىپ جاتتى. الايدا, تابي­عاتتىڭ توسىن مىنەزىنە قار­سى تۇراتىن قاۋقار جوق. كۇرە جول­داردى قانشا كۇرەگەنمەن, كۇن سايىن جاۋعان قاردىڭ تۇرعىنداردى ابىگەرگە سالعانى انىق. اپات ايتىپ كەلمەيدى. 17 اق­پان كۇنى جامبىل وبلى­سىن­دا توتەنشە جاعداي ورىن الىپ, قالىڭ ەلدى ءدۇر ءسىل­كىن­دىردى. جۋالى اۋدانى, كوك­ساي شاتقالىندا اسكەري جات­تىعۋ كەزىندە قار كوشكىنى ءجۇ­رىپ, 7 ءاس­كەري قازا تاپتى. توسىن­نان كەلگەن اپات سالدارى­نان اسكەريلەر قالىڭ قاردىڭ استىندا قالىپ قويعان. كوكساي شاتقالىندا 91678 اسكەري بولىمشەسىن جوس­پارلى جاۋىنگەرلىك دايىن­دىقتان وتكىزۋ بارىسىندا كەنەتتەن قار كوشىپ, قايعىلى وقيعانىڭ ورىن العانىن سول كۇنى رەسمي تۇردە قازاقستان رەس­پۋب­ليكاسى قورعانىس مينيستر­لىگىنىڭ ءباسپاسوز قىزمەتى ءمالىم­دە­دى. ال ەلىمىزدىڭ ىشكى ىستەر مينيستر­لىگى توتەنشە جاعدايلار كوميتەتىنىڭ رەسمي وكىلى رۋسلان يمانقۇلوۆتىڭ ايتۋىنشا, جالپى, جيىرمادان استام ارنايى جاساق ساربازى قارعا كومىلىپ قالعان. وبلىستىق توتەنشە جاعداي­لار دەپارتامەنتى ءباسپاسوز قىزمەتىنىڭ باسشىسى ساۋلە مۇناتاەۆا ورىن العان توتەنشە جاعدايعا بايلانىستى دەپارتامەنت تاراپىنان 75 ادام مەن 7 تەحنيكانىڭ وقيعا ورنىنا شۇعىل جىبەرىلگەنىن ايتادى. سونداي-اق, اپاتقا بايلانىستى وبلىستىق دەپارتامەنت «شۇعىل جەلىنى» ىسكە قوستى. جانە وقيعا ورنىنا قۇتقارۋ بولىمشەسىنىڭ 185 قىزمەتكەرى مەن 24 تەحنيكا جۇمىلدىرىلعان. قۇتقارۋ جۇمىستارى سول كۇنى تۇنگى ساعات ون بىرگە دەيىن جۇرگىزىلگەن. قايعىلى وقيعا 17 اقپان كۇنى ءتۇس مەزگىلىندە بولعان. توتەنشە جاعدايلار دەپارتامەنتىنىڭ كەزەكشى بولىمىنە قورىقشى الىمبەكوۆتەن جۋالى اۋدانى, الاتاۋ اۋىلىنان 35-40 شاقىرىم جەردە ورنالاسقان كوكساي شاتقالىندا قار كوشكىنى ءجۇرىپ, 23 اسكەريدىڭ قار استىندا قالعانى تۋرالى حابار كەلىپ تۇسەدى. ارادا ءبىر ساعاتقا جۋىق ۋاقىت وتكەندە قورىقشى دەپارتامەنتتىڭ كەزەكشى بولىمىنە تاعى دا حابارلاسىپ, قار استىنان 4 اسكەريدى الىپ شىققانىن ايتادى. ناتيجەسىندە, قۇتقارۋشىلاردىڭ ەڭبەگىمەن قاردان زارداپ شەككەن 16 ازامات قۇتقارىلىپ, ولارعا ءتيىستى مەديتسينالىق كومەكتەر كورسەتىلدى. كوكسايداعى كوشكىنگە وراي, قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆتىڭ جامبىل وبلىسىنداعى قايعىلى وقيعانى تەرگەۋ بارىسىن ءوز باقىلاۋىنا الاتىنى حابارلانعان بولاتىن. ال 18 اقپان كۇنى ەلىمىزدىڭ قورعانىس ءمينيسترى ساكەن جاسۇزاقوۆ وبلىسقا ارنايى كەلدى. قورعانىس ءمينيسترى قار كوشكىنىنەن زارداپ شەككەن اسكەري قىزمەتشىلەردىڭ حال-جاعدايىن تارازداعى اسكەري گوسپيتالعا ءوزى بارىپ ءبىلدى. سونداي-اق, مينيستر ساكەن جاسۇزاقوۆ پەن وبلىس اكىمى كارىم كوكىرەكباەۆ جۋالى اۋدانىنىڭ ورتالىعى باۋىرجان مومىش ۇلى جانە كۇركىرەۋسۋ اۋىلدارىنا بارىپ, قايتىس بولعان تىلەۋجان كەڭەسوۆ پەن مۇحيت تۇرىسماعامبەتوۆتىڭ جانە ماقسات شاكەننىڭ وتباسىنا كوڭىل ايتتى. قاتارداعى جاۋىنگەر تىلەۋجان قۋاتجان ۇلى 1993 جىلى, ەفرەيتور مۇحيت بالماعانبەت ۇلى 1991 جىلى ب.مومىش ۇلى اۋىلىندا دۇنيەگە كەلگەن. قاتارداعى جاۋىنگەر ماقسات قۇرمانعازى ۇلى 1995 جىلى كۇركىرەۋسۋ اۋىلىندا تۋعان. سونداي-اق, قورعانىس ءمينيسترى مەن وبلىس اكىمى تاراز قالاسىنا دا كەلىپ, قازا تاپقان اۋەسباي ەرىسباەۆتىڭ وتباسىندا بولدى. كىشى سەرجانت اۋەسباي كومەكباي ۇلى 1992 جىلى تاراز قالاسىندا دۇنيەگە كەلگەن. قازا بولعان قالعان ءۇش ازاماتتىڭ دا اتى-ءجونى بەلگىلى بولدى. 1988 جىلى تۋعان كىشى سەرجانت ءامىر ارالباەۆ وڭتۇستىك قازاقستان وبلىسىنىڭ تۇلكىباس اۋدانىنان, 1991 جىلى تۋعان اعا لەيتەنانت الىشەر موشاباەۆ الماتى وبلىسىنىڭ ۇشتوبە قالاسىنان جانە 1991 جىلى تۋعان كىشى سەرجانت ماقسات قىدىرباەۆ قىزىلوردا وبلىسىنىڭ شيەلى اۋدانىنان. كەشە قورعانىس مينيسترلىگى 91678 اسكەري ءبولىمىنىڭ (وڭىرلىك قولباسشىلىعى) اۋماعىندا جۋالى اۋدانىنداعى قار كوش­كىنىنەن قازا تاپقان اسكەري قىزمەتشىلەرمەن قوشتاستى. جامبىل وبلىسى اكىمدىگىنىڭ باسپا­سوز قىزمەتى حابارلاعانىنداي, قازا تاپقان اسكەريلەردىڭ ءمايىتى تۋىستارىنا جەتكىزىلەدى. وقيعا ورىن العان كۇنى-اق وبلىس اكىمى كارىم كوكىرەكباەۆتىڭ تاپسىرماسىمەن قۇتقارۋشىلار جاساعى مەن تەحنيكالار جۇمىلدىرىلعان بولاتىن. دەگەنمەن, قالىڭ ەلدى قامىقتىرعان قايعىلى وقيعا ورىن الدى. توسىننان كەلگەن تاعدىردىڭ جازۋىنا ەشقانداي امال-ايلا جوق. بەيمەزگىل ساتتە باقيعا اتتانىپ كەتە بارعان ازاماتتاردىڭ ورنى ويسىراپ قالدى. قانشا جەردەن تاعدىردىڭ توسىن سىناعى, جازمىشتىڭ جازۋى دەسەك تە, قايعىنىڭ قالىڭ بۇلتى كوپتىڭ كوكەيىنەن كوپكە دەيىن كوشپەسى انىق. جۋالى اۋدانىنىڭ اكىمى باقتيار كوپ­بوسىنوۆ قايتىس بولعان ءار ازاماتتىڭ وتباسىنا ازىرگە 200 مىڭ تەڭگەدەن قولداۋ كورسەتىلەتىنىن ايتتى. سونداي-اق, وبلىستاعى اسكەري قىزمەتشىلەر دە قولداۋ كورسەتۋگە دايىن. بىراق كوپتىڭ كوڭىلىندە كۇرەڭ مۇڭ قالدىرعان كوكسايدىڭ كوز جاسى ارماندا كەتكەن ازاماتتاردىڭ اقىرعى دەمىن ۇزاق ۋاقىت ۇمىتا المايدى... حاميت ەسامان, «ەگەمەن قازاقستان» جامبىل وبلىسى