وڭتۇستىك قازاقستاندا اگرارلىق سەكتوردى دامىتۋ ماسەلەسى تالقىلاندى

وڭتۇستىك قازاقستان وبلىسى اكىمدىگىندە پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆتىڭ قاتىسۋىمەن اگروونەركاسىپ كەشەنىن دامىتۋدىڭ مەملەكەتتىك باعدارلاماسىن جۇزەگە اسىرۋ بويىنشا كەڭەيتىلگەن ءماجىلىس ءوتتى, دەپ حابارلايدى وبلىس اكىمدىگىنىڭ رەسمي سايتى. ۆيتسە-پرەمەر اۋىل شارۋاشىلىعى وندىرىستىك كووپەراتيۆتەرىن ىرىلەندىرۋ بويىنشا اتقارىلىپ جاتقان جۇمىستاردى باياندادى. «مەملەكەت باسشىسى جولداۋدا اگرارلىق سەكتور ەكونوميكانىڭ جاڭا درايۆەرىنە اينالۋى ءتيىس ەكەنىن اتاپ ءوتتى. وسى تاپسىرماعا ساي اگروونەركاسىپتىك كەشەندى دامىتۋدىڭ جاڭا مەملەكەتتىك باعدارلاماسى ازىرلەندى. ونداعى نەگىزگى ماقسات – ءۇي شارۋاشىلىقتارى مەن ۇساق شارۋاشىلىقتاردى كووپەراتيۆتەرگە بىرىكتىرۋ, ءونىمدى قاجەتتى ينفراقۇرىلىممەن قايتا وڭدەۋدى ۇلعايتۋ. وتكەن جىلى وسى تاپسىرما اياسىندا ەلىمىز بويىنشا 15 مىڭ جەكە قوسالقى شارۋاشىلىقتى قامتىعان 157 كووپەراتيۆ قۇرىلدى. ولاردىڭ بازاسىندا 100-دەن استام ءسۇت قابىلداۋ پۋنكتى مەن جەتى مىڭنان استام وتباسىلىق بورداقىلاۋ الاڭى ۇيىمداستىرىلدى», – دەدى ا.مىرزاحمەتوۆ. ەلىمىزدىڭ اۋىل شارۋاشىلىعى مينيسترلىگى الداعى بەس جىل ىشىندە 500 مىڭنان استام جەكە ءۇي شارۋاشىلىقتارى مەن شاعىن فەرمەرلەردى كووپەراتيۆتەرگە تارتىپ, ءونىمنىڭ وڭدەۋ ساپاسىن جاقسارتۋعا كۇش سالماق. بۇل باعىتقا مەملەكەت بيۋدجەتىنەن 57 ملرد تەڭگە باعىتتالىپ وتىر. نەسيە شارۋالارعا 6 پايىزدىق جەڭىلدىكپەن ۇلەستىرىلەتىن بولادى. ونداعى نەگىزگى تالاپ – كووپەراتيۆكە بىرىگەتىن شارۋا قوجالىقتاردىڭ سانى 20-دان كەم بولماۋى ءتيىس. ۆيتسە –پرەمەر سونداي-اق سۋبسيديالاۋ قاعيداتتارىنىڭ قايتا قارالىپ جاتقانىنا دا كەڭىنەن توقتالدى. بۇگىندە 11 سۋبسيديا ءتۇرى الىنىپ تاستالىپ, 35 سۋبسيديا ءتۇرىنىڭ نورماتيۆتەرىنە وزگەرىستەر ەنگىزىلگەن. اتالعان ماقسات-مىندەتتەر ەلباسى جارلىعىمەن بەكىتىلگەن اگروونەركاسىپتىك كەشەندى دامىتۋدىڭ 2017-2021 جىلدارعا ارنالعان جاڭا مەملەكەتتىك باعدارلاماسىن ىسكە اسىرۋدىڭ العىشارتتارى رەتىندە بەلگىلەنىپ وتىر. جيىن بارىسىندا ەلىمىزدىڭ اۋىل شارۋاشىلىعى مينيسترلىگىنەن ارنايى كەلگەن ديرەكتسيا باسشىلارى جينالعاندارعا كووپەراتيۆ قۇرۋدىڭ نەگىزگى العى شارتتارى مەن سۋبسيديالاۋ, قۇجاتتاندىرۋ ماقساتىنداعى قاعيداتتاردى جان-جاقتى ءتۇسىندىردى. باعدارلامانىڭ باستى ماقساتى – اۋىلدىق جەرلەردە اۋىل شارۋاشىلىعى كووپەراتسيالارىن دامىتۋ. ونىڭ اياسىندا اۋىل شارۋاشىلىعىنداعى ەڭبەك ونىمدىلىگىن 38 پايىزعا, جالپى ءونىمىن 30 پايىزعا, ازىق-ت ۇلىك تاۋارلارىن ەكسپورتتاۋ كولەمىن 600 ملن اقش دوللارىنا ارتتىرۋ جانە يمپورت كولەمىن 400 ملن اقش دوللارىنا تومەندەتۋ قاراستىرىلعان.