دۇنيەجۇزىلىك بوكس سەرياسى: زاكير سافيۋللين وزبەك بوكسشىسىنان باسىم ءتۇستى

تالدىقورعان قالاسىندا ءوتىپ جاتقان دۇنيەجۇزىلىك بوكس سەرياسىندا (WSB) قازاقستاندىق «Astana Arlans» پەن وزبەكستاندىق «Ozbek tigers» كوماندالارى قولعاپ ءتۇيىستىردى. شارشى الاڭعا ەكىنشى بولىپ قازاقستاندىق زاكير سافيۋللين مەن وزبەك بوكسشىسى مۋرودجان احماداليەۆ شىقتى. كەزدەسۋدىڭ ءبىىرىنشى راۋندىندا مۋرودجان احماداليەۆ جابىق ويىن كورسەتتى. وتانداسىمىز نەگىزىنەن العا ۇمتىلۋمەن بولدى. دەگەنمەن, وزبەك بوكسشىسى ۇرىمتال تۇستاردا سوققىلارىن باعىتتاپ قالۋعا تىرىسىپ باقتى. كەزدەسۋدىڭ ەكىنشى راۋندىندا مۋرودجان قاتەلىكتەرىن تولتىرىپ, شابۋىلداماق بولعان. بىراق زاكيردىڭ مىسى باسىپ, وزبەكستاندىقتىڭ جوسپارىن جۇزەگە اسىرۋىنا مۇمكىندىك بەرمەدى. ءۇشىنشى راۋند تا ءدال وسى باعىتتا ءوربىدى. جەرلەسىمىز قارسىلاسىن قورعانىستان شىعارماي تومپەشتەۋمەن بولدى. ارا-تۇرا قارسى سوققىلارمەن باعىتتاعانمەن, باسىمدىققا يە بولمادى. دەگەنمەن, تورەشىلەردىڭ ەكەۋى راۋند قورىتىندىسىندا وزبەكستاندىقتى جەڭىسكە لايىق دەپ ەسەپتەگەن ەكەن. ءتورتىنشى راۋندتا قوس سپورتشى اشىق بوكسقا شىقتى. بىراق وتانداسىمىزدىڭ ماڭدايىنا, قابىرعاسىنا باعىتتاعان سوققىلارىنان وزبەكستاندىق بوكسشى ەسەڭگىرەپ قالاتىنداي كورىندى. سوڭعى ءۇش مينۋتتا دا سافيۋللين ءدوپ سوققىلارى باسىم بولدى. مۋرودجان ءتىپتى, تىزەرلەپ قۇلاعانمەن, تورەشى ونى ەسەپكە المادى. قورىتىندىسىندا رينگ يەسى زاكير سافيۋللين جەڭىسكە جەتتى.