دۇنيەجۇزىلىك بوكس سەرياسى: ولجاس ساتتىباەۆ جەڭىسپەن باستادى

تالدىقورعان قالاسىندا ءوتىپ جاتقان دۇنيەجۇزىلىك بوكس سەرياسىندا (WSB) قازاقستاندىق «Astana Arlans» پەن وزبەكستاندىق «Ozbek tigers» كوماندالارى قولعاپ ءتۇيىستىردى. العاش بولىپ شارشى الاڭعا 52 كيلو سالماقتا وتانداسىمىز ولجاس ساتتىباەۆ پەن ابرورجان كوديروۆ شىقتى. وسى ماۋسىمدا كوماندانىڭ جاڭا كاپيتانى بولىپ تاعايىندالعان جەرلەسىمىز العاشقى راۋندتا بارىنشا شابۋىلعا كوڭىل ءبولىپ, وزبەكستاندىق قارسىلاسىن سوققىلارىنىڭ استىنا الدى. الايدا, ەكىنشى راۋندتا كوديروۆ بەلسەندىرەك قيمىلداپ, ساتتىباەۆتىڭ تەگەۋرىنىن توقتاتۋعا تىرىستى. كەلەسى ءۇش مينۋتتا جەرلەسىمىز ايقىن باسىمدىققا يە بولدى. بىرنەشە رەت بۇرىشقا تاقاپ الىپ ءدال سوققىلارىن وتكىزە ءبىلدى. ءۇش راۋندتىڭ قورىتىندىسى بويىنشا ساتتىباەۆ الدا بولدى. جەكپە-جەكتىڭ ءتورتىنشى راۋندىندا ابرورجان لاس ويىنىمەن كوزگە ءتۇسىپ جاتتى. ءساتى كەلسە اياعىمەن باسىپ قالىپ, شىنتاعىمەن بىلدىرمەگەن بولىپ ۇرىپ جاتتى. سوڭعى بەسىنشى راۋندتا ولجاس ساق قيمىلداپ, قارسىلاسىنىڭ شابۋىلىنان دەر كەزىندە سىتىلىپ ءجۇردى. قورىتىندىسىندا وتانداسىمىز جەڭىسكە جەتتى.